හිටපු පාර්ලිමේන්තු මන්ත්‍රිවරයන්ගේ සංසදයේ පළමු රැස්වීම කථානායක ගරු මහින්ද යාපා අබේවර්ධන මහතාගේ ප්‍රධානත්වයෙන් පසුගියදා පාර්ලිමේන්තුවේදී පැවැත්විණි. එම සංසදයේ සභාපති ධුරයට හිටපු ගරු  කථානාකයක දේශමාන්‍ය කරු ජයසූරිය මහතා ඒකමතිකව පත් කරන  ලද්දේ හිටපු නියෝජ්‍ය කථානායක තිලංග සුමතිපාල මහතාගේ සහ  හිටපු පාර්ලිමේන්තු මන්ත්‍රී සුමේධා ජී ජයසේන මහත්මියගේ යෝජනා  ස්ථිරත්වයෙනි.

එයට අමතරව සියළු මන්ත්‍රීවරයන්ගේ එකඟත්වයෙන් සංසදයේ කැඳවුම්කරු ලෙස හිටපු පාර්ලිමේන්තු මන්ත්‍රී ශාන්ත ප්‍රේමරත්න මහතා පත් කෙරිණි.

මෙම රැස්වීමට පාර්ලිමේන්තුවේ මහ ලේකම් කුෂානි රෝහණදීර මහත්මිය සහ සහකාර මහ ලේකම් හංස අබේරත්න මහතාද එක්ව සිටියහ.

මෙහිදී හිටපු පාර්ලිමේන්තු මන්ත්‍රීවරයන් මුහුණ දෙන ගැටලු සම්බන්ධව දීර්ඝ වශයෙන්සාකච්ඡා කළ අතර, එම ගැටලු මගහරවා ගැනීම සඳහා පාර්ලිමේන්තු මහ ලේකම් කාර්යාලය කටයුතු කරන බව පාර්ලිමේන්තුවේ මහ ලේකම් කුෂානි රෝහණදීර මහත්මිය ප්‍රකාශ කළාය.

හිටපු පාර්ලිමේන්තු මන්ත්‍රීවරයන්ගේ දැනුම සහ අත්දැකීම් රටේ අනාගත අභිවෘද්ධිය සඳහා දායක කර ගැනීමේ වැදගත්කම කථානායකවරයා මෙහිදී පෙන්වා දුන්නේය.

ඒ අනුව සංසදය සඳහා ව්‍යවස්ථාවක් සම්පාදනය කිරීමට සහ හිටපු පාර්ලිමේන්තු මන්ත්‍රීවරයන් සතුව ඇති ජාත්‍යන්තර සබඳතා සහ දේශපාලන පරිචය උපයෝගී කර ගනිමින් රටේ සංවර්ධනයට දායක වීම පිණිස අනු කමිටු පිහිටුවීමටද මෙහිදී මන්ත්‍රීවරයන්ගේ එකඟත්වය පළ විය.

ඒ අනුව සුභසාධන කටයුතු පිළිබඳ අනු කමිටුව, ව්‍යවස්ථා කටයුතු පිළිබඳ අනු කමිටුව, දේශපාලන කටයුතු පිළිබඳ අනු කමිටුව, ආර්ථික හා ජාත්‍යන්තර කටයුතු පිළිබඳ අනු කමිටුව වශයෙන් අනු කමිටු පිහිටුවන ලදී.

මෙම රැස්වීමට හිටපු කථානායක කරු ජයසූරිය, හිටපු නියෝජ්‍ය කථානායකවරුන් වන තිලංග සුමතිපාල සහ ආනන්ද කුමාරසිරි, හිටපු පාර්ලිමේන්තු මන්ත්‍රීවරයන් වන ශාන්ත ප්‍රේමරත්න, අනුර බැස්ටියන්, චන්ද්‍රදාස ගලප්පත්ති, රන්ජන් රාමනායක, චන්දන කත්‍රිආරච්චි, ජීවන් කුමාරතුංග, සුමේධා ජී ජයසේන, තිස්ස කරළියද්ද, එම්.එස්.එස්. අමීර් අලි, නොඑල් පද්මසිරි, ආනන්ද කුලරත්න, සමන්තා කරුණාරත්න, හේමා රත්නායක, උපාලි අමරසිරි, තේමිය හුරුල්ලේ, කේසරලාල් ගුණසේකර, සමන්සිරි හේරත්, දීපාල් ගුණසේකර, ප්‍රේමසිරි මානගේ, පී. තිස්සකුට්ටිආරච්චි, උදිත ලොකුබණ්ඩාර, කමලා රණතුංග, ආර්.
නන්දිමිත්‍ර ජී ද සොයිසා, රවීන්ද්‍ර සමරවීර, නන්දන ගුණතිලක, නන්දිමිත්‍ර ඒකනායක, පී දයාරත්න යන මහත්ම මහත්මීන් ඇතුළු හිටපු පාර්ලිමේන්තු මන්ත්‍රීවරයන් පිරිසක් සහභාගී වූහ.