වර්තමානය වනවිට සීගිරිය අවට දිනෙන් දින ඉදිවන අනවසර ඉදිකිරීම් යුනෙස්කෝ ලෝක උරුම ලැයිස්තුවෙන් සීගිරිය ඉවතට විසිකිරීමේ අවදානමක් මතුකර ඇතැයි බුද්ධශාසන, ආගමික හා සංස්කෘතික කටයුතු අමාත්‍ය, ආචාර්ය හිනිදුම සුනිල් සෙනෙවි මහතා පවසයි.

සීගිරිය අතීතයේ සිට වර්තමානය දක්වාම ලංකාද්වීපයේ අසිරිය ලෝකයට කියාපාන දැවැන්ත සංකේතයකි. ක්‍රි.ව. 05 වන ශතවර්ෂයේදී කාශ්‍යප රජු විසින් රාජධානියක් සහ සැලසුම් සහගත නගරයක් බවට පත්කළ සීගිරි පර්වතයේ වාස්තු විද්‍යාත්මක හා ගෘහ නිර්මාණ ශිල්පීය සැකසුම් සහ බිතුසිතුවම් ලෝකයේම අවධානය දිනාගනු ලැබීය.

1982 වසරේදී යුනෙස්කෝ ලෝක උරුමයක් බවට සීගිරිය ප්‍රකාශ කරන ලද්දේ අතිවිශාල දෙස් විදෙස් ආකර්ශනයක් හිමිකර දෙමින්ය. නමුත් වර්තමානය වනවිට සීගිරිය අවට දිනෙන් දින ඉදිවන අනවසර ඉදිකිරීම් යුනෙස්කෝ ලෝක උරුම ලැයිස්තුවෙන් සීගිරිය ඉවතට විසිකිරීමේ අවදානමක් මතුකර ඇතැයි අමාත්‍යවරයා පෙන්වා දෙයි.

“මෙම අනවසර ඉදිකි‍රීම් මෙවැනි සංවේදී තැන්වල සිදුවෙලා තියෙන්නේ පසුගිය රජයන් මේ වෙනුවෙන් කටයුතු කළ විදිහ සහ අවසරදීමේ පිළිවෙලක් නැති නිසා. සීගිරියේ පර්වතයේ ඉඳලා 200 සීමාව සහ යාර 400 සීමාව කියන කොටස ඇතුළේ අනවසර ඉදිකිරීම් 124ක් තියෙනවා. ඒවා ඉවත් කරන්න අවශ්‍ය කටයුතු අපි දැන් දියත් කරලා තියෙනවා. ආයතන 15 එකතු කරලා අන්තර් ආයතනික කමිටුවක් හදලා තියෙනවා. රජය මේ අයව ඉවත් කරන්න බලාපොරොත්තු වෙන්නේ ප්‍රාමාණික වැඩපිළිවෙලක් හදලා”යැයි සංස්කෘතික කටයුතු අමාත්‍යවරයා කියා සිටියේය.

ලෝක උරුම සීගිරියට බලපෑම් කරන අනවසර ඉදිකිරීම් ඉවත් කිරීම සඳහා සැලසුම් සකස් කර ඇතැයි පුරාවිද්‍යා දෙපාර්තමේන්තුවේ අධ්‍යක්ෂ ජනරාල් මහාචාර්ය ඩී. තුසිත මැන්දිස් මහතා සඳහන් කරනවා.

ඔහු සඳහන් කළේ, සීගිරිය යුනෙස්කෝ ලෝක උරුම ලැයිස්තුවෙන් ඉවතට විසිවී යාමේ තර්ජනයක් නැතත්, සීගිරිය අවට භූ දර්ශනය රැකගන්නා ලෙස යුනෙස්කෝ සංවිධානය දැනුම් දී ඇති බවයි.

“සීගිරිය කියන්නේ ගල විතරක්ම නෙමේ. මේක වටා ලෙන් පද්ධතියක් තියෙනවා, සුසාන තියෙනවා. මෙන්න මේ භූ දර්ශනයට තමා යුනෙස්කෝවෙන් ආරක්ෂා කරන්න කියලා කියන්නේ. යුනෙස්කෝවෙන් එහෙම තර්ජනයක් තවම ඉදිරිපත් වෙලා නෑ. නමුත් අනවසර ඉදිකිරීම් වේගයෙන් වැඩි වුණොත් ඉදිරියේදී තරජනයක් වෙන්න පුළුවන් කියන තත්ත්වයක අපි ඉන්නවා”යැයි මහාචාර්ය ඩී. තුසිත මැන්දිස් මහතා කියා සිටියේය.

(දිනමිණ)

ශ්‍රී ලංකාවේ ඉන්දීය මහ කොමසාරිස් සන්තෝෂ් ජා මහතා ඉන්දියාවේ අග්‍රා හි කේන්ද්‍රීය හින්දි සංස්ථාන් ආයතනයේ පැවැත්වෙන‍ හින්දි ගුරු පුහුණුව සඳහා තෝරා ගන්නා ලද හින්දි ගුරුවරුන් 35 දෙනා හමු විය. 

ශ්‍රී ලංකාව පුරා පිහිටි රජයේ පාසල්වල හින්දි ගුරුවරුන් සඳහා ඉන්දියාවේ පැවැත්වෙන ප්‍රථම පුහුණු වැඩසටහන මෙයයි. මෙම පුහුණු වැඩසටහන ඉන්දීය මහ කොමසාරිස් කාර්යාලයේ සංස්කෘතික අංශය වන ස්වාමි විවේකානන්ද සංස්කෘතික මධ්‍යස්ථානය විසින් අග්‍රා හි කේන්ද්‍රීය හින්දි සංස්ථාන් සමඟ එක්ව සංවිධානය කර තිබේ.ශ්‍රී ලංකාවේ පාසල් 88ක හින්දි භාෂාව විෂයක් ලෙස ඉගැන්වේ. හින්දි භාෂා දැනුම සහ සංස්කෘතික අවබෝධය ඉහළ නැංවීම අරමුණු කරගත් මෙම වටිනා පුහුණු වැඩසටහන සඳහා රජයේ පාසල්වල හින්දි ගුරුවරුන් ශ්‍රී ලංකා රජයේ අධ්‍යාපන අමාත්‍යාංශය විසින් තෝරා ගන්නා ලදී.

මෙම හමුවේදී මහ කොමසාරිස්තුමා ගුරුවරුන්ට සිය සුභාශිංසන පළ කළ අතර ශ්‍රී ලංකාවේ හින්දි අධ්‍යාපනය ප්‍රවර්ධනය කිරීම සඳහා ඔවුන්ගේ දැඩි කැපවීම සහ මාහැඟි දායකත්වය අගය කළේය. එසේම, එතුමා ඉන්දියාව සහ ශ්‍රී ලංකාව අතර අධ්‍යාපනික සහ සංස්කෘතික බැඳීම් ශක්තිමත් කිරීමෙහිලා මෙම මුලපිරීමේ වැදගත්කම අවධාරණය කළේය.

මෙම ගුරුවරුන් ඉන්දීය රජයේ අධ්‍යාපන අමාත්‍යාංශය යටතේ පවතින ප්‍රමුඛ පෙළේ ආයතනයක් වන අග්‍රා හි කේන්ද්‍රීය හින්දි සංස්ථාන් ආයතනයේ සුවිශේෂී පුහුණුවක් ලබනු ඇත. කේන්ද්‍රීය හින්දි සංස්ථාන් ගෝලීය වශයෙන් හින්දි භාෂාව ප්‍රවර්ධනය කිරීමට සහ ඉගැන්වීමට කැප වූ ආයතනයකි. මෙම පුහුණුව අතරතුර ආයතනය විසින් ගුරුවරුන් පිරිස සඳහා සංස්කෘතික සහ ඓතිහාසික වශයෙන් වැදගත් ස්ථාන වෙත  සංචාර ද සංවිධානය කර ඇත. මෙම සුවිශේෂී වැඩසටහන අධ්‍යාපන ක්ෂේත්‍රයේ උන්නතිය සඳහා දෙරටෙහි කැපවීම සහ ශ්‍රී ලංකාව තුළ හින්දි භාෂා අධ්‍යාපනයට පවතින ඉහළ යමින් පවතින ප්‍රමුඛත්වය පිළිඹිබු කරයි.

කඳානේදී අද (03) සිදුවූ වෙඩි ප්‍රහාරයකින් එක් පුද්ගලයෙකු ජීවිතක්ෂයට පත්ව තිබේ.

සිද්ධියෙන් තුවාල ලැබූ හිටපු අමාත්‍ය මංගල සමරවීර මහතාගේ පෞද්ගලික ලේකම්වරයා ලෙස කටයුතු කළ සමීර මනහර මහතා ගේ තත්ත්වය බරපතළ නොවන බව රෝහල් ආරාංචි මාර්ග සඳහන් කරයි.

(පෙර පුවත 2025 ජුලි 03 පෙ.ව.11.02 )

කඳාන වෙඩිතැබීමකින් හිටපු ඇමති ගේ පෞද්ගලික ලේකම්ට තුවාලයි!

යතුරුපැදියකින් පැමිණි දෙදෙනෙකු විසින් මෝටර් රථයක ගමන් කරමින් සිටි පුද්ගලයන් දෙදෙනෙකු හට කඳාන ජනතා පොළ ආසන්නයේදී අද (ජූලි 03) වෙඩි තබා තිබේ.

මෙම සිද්ධියෙන් හිටපු අමාත්‍ය – මංගල සමරවීර මහතාගේ පෞද්ගලික ලේකම් ලෙස කටයුතු කළ සමීර මනහර මහතා ද තුවාල ලබා ඇතැයි වාර්තා වේ.

තුවලකරුවන් රාගම රෝහලට ඇතුළත් කර ඇතැයි පොලිසිය පවසයි.

සිද්ධිය සම්බන්ධයෙන් පරීක්ෂණ ආරම්භ කර තිබේ.