ශ්‍රී ලංකා හිටපු ප්‍රවීණ ක්‍රිකට් ක්‍රීඩකයන් වන මහේල ජයවර්ධන සහ කුමාර සංගක්කාර හිමිකාරිත්වය දරන අවන්හලේ ‘‘කකුළුවා’’ වෙළෙඳ ලකුණට සමාන වෙළෙඳ ලකුණ හා එම අවන්හලේ ප්‍රදර්ශිත සූපවේදී ක්‍රියාකාරකම් අනුකරණය කිරීම වළක්වමින් වාරණ නියෝග දෙකක් අධිකරණය නිකුත් කළේය.

මහේල ජයවර්ධන සහ කුමාර සංගක්කාර හිමිකාරිත්වය දරණ මිනිස්ට්‍රි ඔෆ් ක්‍රැබ් (Ministry of Crab) අවන්හල් අයත් ක්‍රබ් ක්‍රෝබ් පුද්ගලික සමාගම (Crab corb (pvt) Ltd) බුද්ධිමය දේපල පනත යටතේ පැවරූ නඩුවක් සලකා බැලීමෙන් අනතුරුව ද කිංග් ක්‍රැබ් (The King Crab) අවන්හල් පවත්වාගෙන යන කොළඹ 03 පිහිටි ගවමන්ට් හෝල්ඩින් පුද්ගලික සමාගමට (Gourmet Holdings) සහ එහි ප්‍රධාන සූපවේදී එඩ්වඩ් බෙනඩික් යන අයට එරෙහිව එම වාරණ නියෝගය නිකුත් කළේය.

කොළඹ වාණිජ මහාධිකරණ විනිසුරු කේ.පී. ප්‍රනාන්දු විසින් එම වාරණ දෙක නිකුත් කළේය.

විත්තිකාර ද කිංස් ක්‍රැබ් අවන්හල් සමාගම බුද්ධිමය දේපල පනතේ විධිවිධාන උල්ලංඝනය කරමින් අසාධාරණ තරගයක නියැලීමට කටයුතු කර ඇති බව පැමිණිලිකාර මිනිස්ට්‍රි ඔෆ් ක්‍රැබ් අවන්හල් සමාගම වෙනුවෙන් සුදත් පෙරේරා නීතිඥ සමාගමේ උපදෙස් පරිදි පෙනී සිටි නීතිඥ මනෝජ් බණ්ඩාර කරුණු ඉදිරිපත් කරමින් දන්වා සිටියේය.

මීට පෙර පැමිණිලිකාර අවන්හල් ජාලයේ සේවය කළ බෙනඩික් නමැති සූපවේදියා පැමිණිලිකාර සමාගමෙන් ඉවත්ව, එම සමාගමේ කීර්තිනාමය හා ප්‍රසිද්ධ භාවය උපයෝගී කර ගනිමින් ඊට සමාන වෙළෙඳ ලකුණ, එහි වර්ණ හා වචන ප්‍රදර්ශනය කරන වෙළෙඳ ලකුණක් යොදාගෙන, පැමිණිලිකාර සමාගමේ සූපවේදී මෙනුවට (පටුනට) සමාන ආකාරයෙන් පාරිභෝගිකයන්හට සේවය සපයන බව නීතිඥ මනෝජ් බණ්ඩාර අධිකරණයට දන්වා සිටියේය.

පැමිණිලිකාර සමාගම ලෝකයේ රටවල් කිහිපයක සිය අවන්හල් ජාලය ව්‍යාප්ත කර ඇති අතර, ආසියාවේ හොඳම අවන්හල් 50 අතරට වසර 08 ක් තිස්සේ තේරී පත්වී ඇති ප්‍රමුඛ පෙළේ අවහන්හලක් බව සඳහන් කළ නීතිඥ මනෝජ් බණ්ඩාර, පැමිණිලිකාර සමාගමේ කීර්තිනාමය, වෙළෙඳ ලකුණ හා එහි පාඨයන්ද සූපවේදී සටහන භාවිත කිරීම වළක්වන වාරණ නියෝගයක් නිකුත් කරන ලෙස ඉල්ලා සිටියේය.

එම කරුණු සලකා බැලූ විනිසුරුවරයා පැමිණිලිකාර සමාගමේ වෙළෙඳ ලකුණට සමාන කකුළුවන්ගෙන් යුත් හා පාටකින් යුත් වෙළෙඳ ලකුණක් භාවිත කිරීම, සූපවේදී සටහනක් භාවිත කිරීම වළක්වමින් වාරණ නියෝග දෙකක් නිකුත් කළේය.

මූලාශ්‍රය – අරුණ