කටාර් රාජ්‍යය තම ගුවන් කලාපයේ ගුවන් ගමන් තාවකාලිකව අත්හිටුවන බව එරට විදේශ අමාත්‍යාංශය නිවේදනය කර තිබේ.

පවතින යුධමය තත්ත්වය හේතුවෙන්  මෙම තීරණය ගත් බව  එරට විදේශ අමාත්‍යාංශය නිවේදනය කර ඇත.

ඒ අනුව කටාර් හි හමාඩ් ජාත්‍යන්තර ගුවන්තොටුපොළට පියාසර කිරීමට නියමිත සියලු ගුවන් යානා ඒ ආසන්න වෙනත් ගුවන්තොටුපොළ වෙත පියාසර කෙරෙනු ඇත.

මේ අතර කටාර්හි පිහිටා ඇති මැදපෙරදිග විශාලතම අමෙරිකානු හමුදා කඳවුර වන අල් උඩෙයිඩ් ගුවන් කඳවුර වෙත ඉරාන ප්‍රහාරයක් එල්ලවීමේ අවදානමක් මතුව ඇති බව විදෙස් මාධ්‍ය වාර්තා කර තිබුණි.

විදෙස් මාධ්‍ය වාර්තාකර ඇත්තේ, එම කඳවුර තුළ අමෙරිකානු පුරවැසියන් 8,000ක් පමණ වාසය කරන බවය.

මේ අතර කටාර්හි සිටින අමෙරිකා එක්සත් ජනපදය සහ එක්සත් රාජධානිය පුරවැසියන්ට දැනුම් දීමක් සිදුකර තිබේ.

එම දැනුම්දීම මගින් අමෙරිකානු රාජ්‍ය දෙපාර්තමේන්තුව සඳහන් කර ඇත්තේ, නැවත දැනුම් දෙන තුරු එම ස්ථානවල රැඳී සිටින ලෙසය.

 පසුගිය 19 වැනිදා නිරිතදිග චීනයේ යුනාන් පළාතේ කුන්මින් නගරයේ දී ඇරඹුනු නවවැනි චීන-දකුණු ආසියානු ප්‍රදර්ශනය හෙට (24) අවසන් වේ.

“සමගිය, සහයෝගීතාව සහ සංවර්ධනය වෙනුවෙන් එක්ව කටයුතු කිරීම” යන තේමාව යටතේ පැවැත්වෙන මෙම ප්‍රදර්ශනයට ශ්‍රී ලංකාව මෙවර එක්වූයේ ‘ගෞරවනීය ආරාධිත රට’ ලෙසයි.

චීන-ශ්‍රී ලංකා ද්විපාර්ශ්වික වෙළඳාම 2024 දී ඇමරිකානු ඩොලර් බිලියන 5.36 ක වාර්තාගත ඉහළම අගයට ළඟා වූ අතර එය වසරින් වසර 13.4% ක වැඩිවීමකි. මේ හේතුවෙන් දකුණු ආසියානු කලාපය තුළ චීනයේ වේගයෙන්ම වර්ධනය වන වෙළඳ හවුල්කරුවා බවටද ශ්‍රී ලංකාව පත්ව ඇත.

චීන-දකුණු ආසියානු ප්‍රදර්ශනය තුළ ශ්‍රී ලංකා ප්‍රදර්ශන කුටිය වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා අතින් විවෘත කෙරුණි.

මෙම ප්‍රදර්ශනය තුළ ශ්‍රී ලංකාව හට හිමිවූ සුවිශේෂී ස්ථානය හා ඉන් ශ්‍රී ලංකාවට ලැබිය හැකි ප්‍රතිලාභ පිළිබඳව ‘ශ්‍රී ලංකා මිරර්’ වෙනුවෙන් ජ්‍යේෂ්ට මාධ්‍යවේදී හා දේශපාලක විචාරක කුසල් පෙරේරා මහතා හා චීනයේ CGTN රූපවාහිනියේ ලී චියුයුවැන් මහත්මිය අතර කෙටි කතාබහක් පසුගියදා සිදුවිය.

මෙහිදී පෙරේරා මහතා පවසා තිබුණේ මෙම වේදිකාවෙන් ප්‍රයෝජන ගෙන චීනය හා ද්වීපාර්ශ්වික වෙළඳ කටයුතු වර්ධනය කිරීම සඳහා, තේ වැනි සාම්ප්‍රදායික අපනයන නිෂ්පාදන වලින් ඔබ්බට ගොස් අපනයන නිෂ්පාදන විවිධාංගිකරණයට ලක් කළ හැකි ආකාරය පිළිබඳව යළි සිතා බැලිය යුතු බවයි.

මෙම වේදිකාවේ පිළිඹිබු වන බලශක්ති පරිවර්තනය හා ඩිජිටල් ආර්ථිකය වැනි නැගී එන ක්ෂේත්‍ර අතරින් ශ්‍රී ලංකාවට වඩාත්ම වැදගත් වන්නේ තාක්ෂණය, බලශක්තිය හා පරිසරය යන ක්ෂේත්‍ර වල එකතුවක් යැයි තමාට හැඟෙන බවද ඔහු කියා සිටියේය.

එය ශ්‍රී ලංකාවට දිගු ක්‍රියාවලියක් වනු ඇති බව පැවසූ ඔහු, මෙම ක්‍රියාවලියට ඉඩ සැලසෙන පරිදි ලංකාවේ ජාතික ආර්ථිකයද සැලසුම් කළ යුතු බව අවධාරණය කළේය.

වැඩිදුරටත් අදහස් දැක්වූ පෙරේරා මහතා පවසා සිටියේ ආරක්ෂණවාදයට පිවිසෙන යුරෝපය මෙන් නොව චීනය විවෘත වෙමින් පවතින බව තමාට හැඟෙන බවයි. 

චීනයේ මෙම ආර්ථික විවෘතභාවය සියලු දකුණු ආසියානු රටවල් වෙත දැවැන්ත අවස්ථාවක් උදා කරන බවත්, චීනය මෙන්ම දකුණු ආසියාවද විවෘත විය යුතු බවත් ඔහු වැඩිදුරටත් පැවසීය.

“ආරක්ෂණවාදය ආර්ථික වර්ධනය සඳහා උත්ප්‍රේරකයක් වන්නේ නැත. චීනය දැනටමත් විවෘතව පවතින අතර එහි ආර්ථිකය ගෝලීය වෙළඳාම මත වර්ධනය වෙමින් පවතී. ඔවුන් සෑම තැනකම ගෙන ගොස් ඇත්තේ ඔවුන්ගේ විවෘතභාවයයි… දකුණු ආසියාවේ අපත් විවෘත විය යුතුයි,” යැයි ඔහු වැඩිදුරටත් පැවසීය.

(වීඩියෝ : CGTN)

සබැඳි පුවත් :

119 හදිසි ඇමතුම් අංකය අවභාවිතා කිරීම වළක්වාගැනීම සඳහා පොලීසිය විසින් මහජනතාවගෙන් ඉල්ලීමක් කර තිබේ.

නිවේදනයක් නිකුත් කරමින් පොලිස් මාධ්‍ය ප්‍රකාශක කාර්යාලය සඳහන් කරන්නේ, 119 ක්ෂණික දුරකතන ඇමතුම් මධ්‍යස්ථානය වෙත ඇමතුම් ලබාදෙමින් මෙම සේවාව අවභාවිතා කරන අවස්ථාවන් නිරීක්ෂණය වී ඇති බවය.

පොලීසිය පැවසුවේ, වර්ථමානය වනවිට මෙම මධ්‍යස්ථානය වෙත වාර්තා වන ඇමතුම් සම්බන්ධයෙන් සලකා බැලීමේදී පොලීසිය ක්ෂණිකව ක්‍රියාත්මක වීමට අවශ්‍ය පැමිණිලිවලට අමතරව අසත්‍ය පැමිණිලි හා වෙනත් ක්ෂණික සේවාවන් වෙත යොමු කළ යුතු පැමිණිලිද ලැබෙන බවය.

එමෙන්ම වෙනත් සේවාවන් මඟින් එම අවශ්‍යතාවය ඉටු කර ගැනීමට හැකියාව පැවතියද (පාරිභෝගික සේවා සම්බන්ධ පැමිණිලි, අල්ලස් සම්බන්ධ පැමිණිලි, රාජ්‍ය ආයතන මඟින් සිදුවන අක්‍රමිකතා සම්බන්ධ පැමිණිලි ඉඩම් ආරවුල්, මුදල් ආරවුල් වැනි පොලිසියේ සහාය ක්ෂණිකව අවශ්‍ය නොවන අවස්ථා සම්බන්ධයෙන් වන පැමිණිලි) ඇතැම් පැමිණිලි මෙම හදිසි ඇමතුම් අංකය හරහා බොහෝ විට ඉදිරිපත් කිරීමට මහජනතාව විසින් කටයුතු කරනු ලබන බව පොලීසිය පවසයි.

ඒ අනුව, හදිසි අවස්ථාවකදී පොලිස් 119 ක්ෂණික ඇමතුම් මධ්‍යස්ථානය වෙත සම්බන්ධ වීමට ඇති හැකියාව අවම වන බව පොලීසිය පෙන්වා දෙයි.

මෙලෙස අනවශ්‍ය පැමිණිලි සඳහා කාලය ගත කිරීම තුළින් 119 හදිසි ඇමතුම් අංකය ඔස්සේ පොලිසියේ සහාය ක්ෂණිකව ලබා දිය යුතු අත්‍යවශය වන හදිසි පැමිණිල්ලක් ඉදිරිපත් කිරීම සඳහා ඇමතුමේ වැඩි කාලයක් රැඳී සිටීමට සිදුවේ.

මෙසේ අසත්‍ය පැමිණිලි ඉදිරිපත් කිරීම සම්බන්ධයෙන් අධිකරණය වෙත කරුණු වාර්තා කර අදාළ පුද්ගලයින්ට විරුද්ධව නීතිමය ක්‍රියාමාර්ග ගැනීමට කටයුතු කර ඇති අතර මෙම සේවාව අවභාවිතා කර ඇති අවස්ථාවන්හි ඊට අදාළ දුරකතන අංකය මඟින් 119 ක්ෂණික දුරකථන ඇමතුම් මධ්‍යස්ථානයට ලැබෙන දුරකතන ඇමතුම් තාවකාලිකව අත්හිටුවීමට කටයුතු කරනු ලබයි.

එබැවින් කාර්යක්ෂමව හා ඵලදායී ලෙස සේවය ලබාගැනීමට මෙම සේවාව භාවිතා කිරීමේදී නිසි අවබෝධයෙන් යුතුව, පොලිසියේ සහය ක්ෂණිකව ලබාගත යුතු අවස්ථා හඳුනාගනිමින් කටයුතු කරන ලෙසටත් පොලීසිය මහජනතාවගෙන් ඉල්ලා සිටී.

මහජනතාවට මුහුණ දීමට සිදුවන යම් ආපදාවක් හෝ පොලිස් නිලධාරීන්ගේ සහාය ක්ෂණිකව ලබා ගැනීමට අවශ්‍ය අවස්ථාවකදී ඒ සඳහා පොලිස් නිලධාරීන් ක්ෂණිකව ක්‍රියාත්මක කිරීමේ අරමුණින් 119 ක්ෂණික දුරකතන ඇමතුම් සේවාව 2004 වර්ෂයේදී ආරම්භ කරන ලදී.