“ඝාතනය වූ නීතීඥ විජේදාස කොළඹ ගෙනාවේ රනිල්, බටලන්ද වාර්තාව නිල එකක් කරන්න ආණ්ඩුවට පුලුවන්”

බටලන්ද වාර්තාව පාර්ලිමේන්තුවට ඉදිරිපත් කර එය නිල වාර්තාවක් බවට පත් කිරීමට ජාතික ජනබලවේග ආණ්ඩුවට හැකියාව පවතින බවත්, ඒ සඳහා ආණ්ඩුවට බහුතරය පවතින බවත් පෙරටුගාමී සමාජවාදී පක්ෂයේ ප්‍රධාන ලේකම් කුමාර් ගුණරත්නම් මහතා කියයි.

එම පක්ෂය විසින් කොළඹදී ඊයේ (10 වැනිදා) පවත්වන ලද මාධ්‍ය හමුවකදී ඔහු මේ බව කියා සිටියේය.

අල් ජසීරා සමග හිටපු ජනාධිපති රනිල් වික්‍රමසිංහ පවත්වන ලද සම්මුඛ සාකච්ඡාවෙන් ඉදිරිපත් වන කරුණු අනුව පෙනී යන්නේ ජනතා මර්දනකාරී රාජ්‍යයේ වගකීම ඔහු ඉටු කරමින් සිටින බව යැයිද ඔහු කීවේය.

වැඩිදුරටත් අදහස් දැක්වූ ප්‍රධාන ලේකම්වරයා,

බී.බී.සී වාර්තාකාරිනිය බටලන්ද වාර්තාව පෙන්වලා අහද්දීත් හිටපු ජනාධිපති රනිල් කියන්නේ මෙය නිල වාර්තාවක් නොවෙයි. එය පාර්ලිමේන්තුවේ සම්මත වෙලා නෑ කියලයි.

වින්දිතයන්ට සාධාරණය අවශ්‍යනම් අතුරුදන් වූවන්ගේ දෙමාපියන්ට සාධාරණය අවශ්‍ය නම් සියල්ල සම්බන්ධව යුක්තිය ඉටු කිරීමක් සිදුවිය යුතුයි. බටලන්ද වාර්තාවට අනුව පළමු වතාවට එකසිය පනස් දෙනෙක් පසුකර ඩග්ලස් පීරිස්ට සහකාර පොලිස් අධිකාරී තනතුරට උසස් වීම් ලැබෙනවා. මොහු සහකාර පොලිස් අධිකාරී විභාගය අසමත් අයෙක්. ජනතා විමුක්ති පෙරමුණේ සමහර ක්‍රියාකාරීන් ඉවත් කිරීම සඳහා මොහු කටයුතු කළා. මේ ඉවත් කිරීම කියන එක කොමිසමේ සාකච්ඡා වෙනවා. ඉවත් කිරීම කියන්නේ ඝාතනය කෙරුණා යන්නයි. විජේදාස ලියනාරච්චි කියන්නේ ජනතා විමුක්ති පෙරමුණේ ප්‍රසිද්ධ කථිකයෙක්. නීතිඥවරයෙක්. 1988 ඔහුව පැහැර ගෙන අතුරුදන් කළා. අපි දන්නේ ඔහු ඝාතනය වූ විස්තරය විතරයි. රනිල් වික්‍රමසිංහගේ නියෝග අනුව ඔහුව කොළඹට ගෙනඒම සිදුවූවා කියලා මේ වාර්තාවේ පැහැදිලිව සඳහන්වෙලා තිබෙනවා.“යැයිද ඔහු පැවැසුවේය.

ආණ්ඩුවක් කොයිතරම් ප්‍රකෝපයට පත් කළද ඊට නීති විරෝධීව කටයුතු කිරීමට රජයකට නොහැකි බවත්, ව්‍යවස්ථාව උල්ලංඝනය කර කටයුතු කිරීමට රජයකට නොහැකි බවත් කුමාර ගුණරත්නම් කියා සිටියේය.