මැතිවරණයක් කැඳවීමට නියමිත බැවින් ඒ සඳහා සූදානම් වන ලෙස මැතිවරණ කොමිෂන් සභාව විසින් ආයතන කිහිපයකට දැනුම් දී තිබේ.
රජයේ මුද්‍රණාලායාධිපතිනියටත්, පොලිස්පතිවරයාටත් ඒ සම්බන්ධයෙන් දැනුම් දී ඇති බව සඳහන්ය.
එලෙස දැනුම් දී ඇති ආයතන අතර ලංකා විදුලිබල මණ්ඩලය, ජල සම්පාදන හා ජලාපවාහන මණ්ඩලය හා ලංකා ගමනාගමන මණ්ඩලයද වේ.
දිවයින පුරා ඡන්ද මධ්‍යස්ථානවල අඩුපාඩු පිළිබඳ වාර්තාවක් ලබා දෙන ලෙස සියළුම ග්‍රාම නිලධාරීන්ට පසුගිය සතියේදී දැනුම්දුන් බවද මැතිවරණ කොමිෂන් සභාවේ සභාපති ආර්.එම්.එල් රත්නායක මහතා ප්‍රකාශ කලේය
මීට අමතරව නිලධාරීන් සහ වාහන පිළිබඳවද සංගණනයක් පවත්වන ලෙසට සියලු දිස්ත්‍රික් මැතිවරණ ප්‍රධානීන්ට දැනුම් දුන් බව ඔහු කියා සිටියේය.
මැතිවරණ කටයුතු සඳහා සූදානම් වීමේ මූලික අරමුණින් එලෙස උපදෙස් දුන් බව මැතිවරණ කොමිෂන් සභාව සඳහන් කළේය.
ජනාධිපතිවරණය සැප්තැම්බර් 14 සහ ඔක්තෝබර් 16 අතර කාලයේදී පවත්වන බව මැතිවරණ කොමිෂන් සභාව විසින් පසුගියදා පවසන ලදී.
මේ අතර රජයේ මුද්‍රණාලයාධිපතිනි ගංගානි කල්පනා ලියනගේ මහත්මිය ප්‍රකාශ කළේ ජනාධිපතිවරණය සඳහා මැතිවරණ කොමිසම දින නියම කළහොත් ඒ සඳහා අවශ්‍ය සියලු කටයුතු සූදානම් බවය .
