ජනපති අරමුදලින් ක්‍රියාත්මක කරන ජනාධිපති ශිෂ්‍යත්ව 2024 වැඩසටහන මේ වන විට රට පුරා ක්‍රියාත්මක කර තිබේ.

මධ්‍යම පළාත් ආණ්ඩුකාරවරයාගේ ප්‍රධානත්වයෙන් මෙම ශිෂ්‍යත්ව ප්‍රදානය කිරීමේ උත්සවය නුවරඑළිය හා මහනුවර දිස්ත්‍රික්කවල අද (16) දිනයේ පැවැත්වේ.

මෙම වැඩසටහන වෙනුවෙන් නුවරඑළිය හා මහනුවර දිස්ත්‍රික්කවල අද සහ හෙට (17) දිනයන් වල පාසල් වාර විභාග නොපැවැත්වෙන ආකාරයට විභාග කාල සටහන සකස් කර ඇති බවට මේ වනවිට රජයට චෝදනා එල්ල වෙමින් පවතී.

මධ්‍යම පළාතේ පාසල්වල පසුගිය 10 දින ආරම්භ වූ වාර විභාගය 19 වෙනිදා දක්වා පැවැත්වෙන නමුත් ජනාධිපතිවරයාගේ දේශපාලන ව්‍යාපෘතිය වෙනුවෙන් දින දෙකක් විභාග නොපැවැත්වීම ජනාධිපතිවරයෙක් ලෙස ලජ්ජාවට පත් විය යුතු බවත් කිසිම දියුණු සමාජයක සිදු නොවන අන්දමේ තුන්වැනි පන්තියේ වැඩක් බව ලංකා ගුරු සංගමයේ ලේකම් ජෝසප් ස්ටාලින් මහතා පවසයි.

ගුරුවරයින්ගේ අතිශය සාධාරණ වෘත්තීය ගැටලුවක් වෙනුවෙන් කරන අරගලය කඩාකප්පල්කාරි ත්‍රස්තවාදී ව්‍යාපෘති ලෙස දකින ආණ්ඩුව, ජනාධිපතිවරයාගේ දේශපාලන ව්‍යාපෘතියක් වෙනුවෙන් මේ ආකාරයෙන් දරුවන්ගේ අධ්‍යාපන කටයුතු කඩාකප්පල් කිරීම අර්ථ දක්වන්නේ කෙසේදැයි ලේකම්වරයා විමසා සිටී.

ප්‍රතික්ෂේප කළ යුත්තේ මේ පිළිකුල් සහගත දේශපාලනය බව ඔහු පවසන්නේය.

ජනාධිපති ශිෂ්‍යත්ව වැඩසටහන – 2024 මධ්‍යම පළාත් සමාරම්භය සනිටුහන් කරමින් මාතලේ දිස්ත්‍රික්කයේ තෝරාගත් පාසල් සිසු සිසුවියන් 3134 දෙනෙකුට ශිෂ්‍යත්ව ප්‍රදානය කිරීම මධ්‍යම පළාත් ආණ්ඩුකාර නීතිඥ ලලිත් යූ ගමගේ මහතා ගේ ප්‍රධානත්වයෙන් පසුගිය (13) දින මාතලේ එඩ්වඩ් ක්‍රීඩාංගනයේ දී පැවැත්වුණි.

ජනපති අරමුදල මගින් රුපියල් බිලියන 4ක මූල්‍ය ප්‍රතිපාදන ශිෂ්‍යත්වය වැඩසටහන සඳහා වෙන්කර තිබේ.

ශිෂ්‍යත්ව වැඩසටහන යටතේ ජනාධිපතිවරණයට පෙර දිවයිනේ සමස්ත පාසල් 10,126 ආවරණය වන පරිදි, 1 ශ්‍රේණියේ සිට 11 ශ්‍රේණිය දක්වා අධ්‍යාපනය ලබන සිසුන් 100,000කට ශිෂ්‍යාධාර ලබාදීම සිදු කෙරෙනු ඇත.