දුම්රිය අවලංගුවීම හේතුවෙන් සිදුවන දෛනික පාඩුව සම්බන්ධයෙන් විගණනයක් කරන ලෙස කෝපා කමිටුවෙන් නිර්දේශ කරන ලදි.

මෙසේ නිර්දේශ ඉදිරිපත් වූවේ ශ්‍රී ලංකා දුම්රිය දෙපාර්තමේන්තුවේ 2023 වර්ෂයේ විගණකාධිපති වාර්තාව හා වර්තමාන කාර්යසාධනය සම්බන්ධයෙන්සාකච්ඡා කිරීමට රජයේ ගිණුම් පිළිබඳ කාරක සභාව (COPA) පාර්ලිමේන්තු මන්ත්‍රී අරවින්ද සෙනරත් මහතාගේ සභාපතිත්වයෙන් පසුගියදා (05) පාර්ලිමේන්තුවේදී රැස්වූ අවස්ථාවේදීය.

පසුගිය මැයි මස 08 වැනිදා මෙම කාරක සභාව හමුවට ශ්‍රී ලංකා දුම්රිය දෙපාර්තමේන්තුව කැඳවූ අවස්ථාවේදී 2023 වර්ෂයේ විගණකාධිපති වාර්තාව
සලකා බැලීම සිදු වූ අතර එහිදී අනාවරණය වූ කරුණු මත නැවත මෙම ආයතනය සම්බන්ධයෙන් සාකච්ඡා කිරීමට තීරණය කෙරිණි. මේ සඳහා හිටපු දුම්රිය සාමාන්‍යාධිකාරීවරු සහ හිටපු අමාත්‍යාංශ ලේකම්වරුන්ද කැඳවීමට තීරණය කෙරුණු අතර ඒ අනුව එම නිලධාරීන්ද මෙම කාරක සභා රැස්වීම සඳහා සහභාගී විය.

පවත්වා ඇති විගණන හා කළමනාකරණ කමිටු රැස්වීම් ප්‍රමාණවත් නොවීම පිළිබඳව කමිටුවේ අවධානය යොමු වූ අතර 2021 වර්ෂයේ සිට 2024 වසර
දක්වා කළමනාකරණ කමිටු රැස්වීම් ප්‍රමාණවත් අයුරින් පවත්වා නොමැතිවීම පිළිබඳව කාරක සභාව හිටපු අමාත්‍යාංශ ලේකම්වරුන්ගෙන් සහ හිටපු දුම්රිය
සාමාන්‍යාධිකාරීවරුන්ගෙන් කරුණු විමසන ලදි. මේ අනුව එම හිටපු නිලධාරීන් පෙන්වා දුන්නේ කොරෝනා වෛරසයේ ව්‍යාප්තිය සහිත කාලසීමාව
තුළ කළමනාකරණ කමිටු රැස්වීම් පැවැත්වීම් අඩපණ වූ බවයි. නමුත් 2024 වර්ෂයේ එය විධිමත් කිරීමට සැලසුම් කර තිබුණත් නිලධාරීන් ස්ථාන මාරුවීම
නිසා සැලසුම්කර තිබූ අවසන් රැස්වීම පැවැත්වීමට නොහැකි වූ බව ඔවුහු පෙන්වා දුන්හ. 

මෙහිදී කමිටුව පෙන්වා දුන්නේ මෙම තත්ත්වය නිසා ආයතනයේ කාර්යක්ෂමතාව අවම වී ඇති බවත්, මෙය 2022 වර්ෂයේ දුම්රිය වාර 64ක්, 2023 වර්ෂයේ දුම්රිය වාර 61ක් සහ 2024 වර්ෂයේ දුම්රිය වාර 46ක් ප්‍රමාද වී ධාවනය වීමට හේතුවක් වී ඇති බවත්ය. මේ නිසා දීර්ඝව මේ සම්බන්ධයෙන් සාකච්ඡා කිරීම සිදු වූ අතර අනතුරුව දෛනිකව සිදුවන දුම්රිය ප්‍රමාදවීම් සහ ඒවා වළක්වා ගැනීමට ගන්නා පියවර පිළිබඳ වාර්තාවක් අමාත්‍යාංශයට ඉදිරිපත් කරන ලෙස කාරක සභාව නිර්දේශ කළේය.

එසේම දුම්රිය අවලංගුවීම හේතුවෙන් සිදුවන දෛනික පාඩුව සම්බන්ධයෙන් විගණනයක් කරන ලෙසද කමිටුව නිර්දේශ කරන ලදි.

2020 අගෝස්තු 28 දිනැති රාජ්‍ය මුදල් චක්‍රලේඛය අනුව ප්‍රසම්පාදන සැලැස්ම සඳහා ප්‍රධාන ගණන්දීමේ නිලධාරියාගෙන් අනුමතිය ලබා ගත යුතු වුවත් 2024 වර්සයේ ප්‍රසම්පාදන සැලැස්ම සඳහා අදාළ අනුමතිය ලබාගෙන නොතිබීම පිළිබඳවද මෙහිදී අවධානය යොමු වූ අතර මේ සම්බන්ධයෙන් විමර්ශනයක් කරන ලෙස කාරක සභාව නිර්දේශ කළේය.

දුම්රියෙන් හුණුගල් ප්‍රවාහනය වෙනුවෙන් සියෑම් සිටි සිමෙන්ති (ලංකා) සමාගමෙන් 2024 දෙසැම්බර් 31 දිනය වන විට අයවිය යුතු හිඟ ආදායම වන රු. 2,187,326/= අයකර ගැනීම සම්බන්ධයෙන්ද මෙහිදී සාකච්ඡා වූ අතර එම ව්‍යාපෘතිය මේ වන විටද ක්‍රියාත්මක වන බවත් අවශ්‍ය මුදල් නියමිත පරිදි අයකර ගැනීමට කටයුතු කරන බවත් නිලධාරීන් පෙන්වා දුන්නේය.

පසුගිය මැයි මස 22 වැනිදා කෝපා කමිටුවේ සාමාජික මන්ත්‍රීවරුන් රත්මලාන දුම්රිය නඩත්තු අංගනයේ නිරීක්ෂණ චාරිකාවක නිරතවූ අතර මෙහිදී අනාවරණය වූ තොරතුරු සම්බන්ධයෙන්ද එම මන්ත්‍රීවරුන් කාරක සභාව දැනුවත් කළහ. මේ අනුව ගරු මන්ත්‍රීවරුන් පෙන්වා දුන්නේ ඉවත්කළ යුතු යන්ත්‍ර සහ උපකරණවලින් වැඩබිමේ විශාල භූමි ප්‍රමාණයක් ආවරණය වී ඇති බවත්, ඇතැම් යන්ත්‍රෝපකරණ අවශ්‍ය කරන පාරිසරික තත්ත්වයන් තුළ ස්ථාපිත නොවී ඇති බවක් නිරීක්ෂණය වන බවත්, ප්‍රමාණය ඉක්මවමින් ඇතැම් උපකරණ මිලදීගෙන ඇති බවත් ය.

මේ සම්බන්ධයෙන් දීර්ඝව සාකච්ඡා වූ අතර එම් 11 දුම්රිය එන්ජිම් මිලදීගැනීම, වියදම සහ නඩත්තු කිරීමේ වියදම සම්බන්ධයෙන් වාර්තාවක් ලබා දෙන ලෙස නිර්දේශ
කළේය.

මීට අමතරව පසුගිය වසර 5 ඇතුළත ලබාගත් මූල්‍ය ප්‍රගතිය පිළිබඳ සවිස්තරාත්මක වාර්තාවක් කාරක සභාවට ලබාදෙන ලෙසද නිර්දේශ කළේය.

මෙම රැස්වීම සඳහා කාරක සභා සාමාජික නියෝජ්‍ය අමාත්‍ය මේජර් ජෙනරාල් (විශ්‍රාමික) අරුණ ජයසේකර, කාරක සභා සාමාජික මන්ත්‍රීවරයන් වන ජේ.සී. අලවතුවල, එම්. එල්. ඒ. එම්. හිස්බුල්ලා, චන්දන සූරියආරච්චි, ටී.කේ. ජයසුන්දර, රුවන්තිලක ජයකොඩි, නීතීඥ තුෂාරි ජයසිංහ,,(වෛද්‍ය) ජනක සේනාරත්න සහ මංජුල සුරවීරආරච්චි යන මහත්ම මහත්මීන්ඇතුළු රාජ්‍ය නිලධාරීහු පිරිසක් සහභාගී වී සිටියහ.

ජාතික පොලිස් කොමිෂන් සභාවේ අනුමැතිය පරිදි පොලිස් ස්ථානාධිපතිවරුන් 34කට ස්ථාන මාරුවීම් ලබාදී ඇති බව පොලිස් මාධ්‍ය කොට්ඨාසය පවසයි.

මහ බැංකු බැඳුම්කර වංචාව සම්බන්ධයෙන් සිදුකරන විමර්ශනවලට අදාළව අධිකරණය විසින් ඉදිරිපත් කරන ලෙස නියම කර තිබෙන ගිණුම් වාර්තා මෙතෙක් ඉදිරිපත් නොකිරීම සම්බන්ධයෙන් ලබන දෙසැම්බර් මස 11 වනදා අධිකරණයේ පෙනී සිට කරුණු දක්වන ලෙස කොළඹ මහෙස්ත්‍රාත් අධිකරණය අද (12) ශ්‍රී ලංකා මහ බැංකුවේ මූල්‍ය බුද්ධි අංශයට නියම කර තිබේ.

මෙම සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව විසින් ගොනුකර තිබෙන පැමිණිල්ල අද කොළඹ ප්‍රධාන මහෙස්ත්‍රාත් තනූජා ලක්මාලි මහත්මිය හමුවේ කැඳවා තිබුණි.

එම අවස්ථාවේදී සිද්ධිය සම්බන්ධයෙන් ඇප මත මුදාහැර සිටින පර්පචුවල් ට්‍රෙෂරීස් සමාගමේ අධ්‍යක්ෂ අර්ජුන් ඇලෝසියස් ඇතුළු සැකකරුවන් අධිකරණයේ පෙනී සිට ඇත.

එහිදී සැකකරුවන් වෙනුවෙන් පෙනී සිටි ජනාධිපති නීතිඥ සම්පත් මෙන්ඩිස් මහතා අධිකරණය හමුවේ කරුණු දක්වමින් මෙම නඩුව අවසන් වශයෙන් කැඳවනු ලැබුවේ ඉකුත් වසරේ නොවැම්බර් මස බව පෙන්වා දී තිබේ.

එදින මෙම සැකකරුවන්ගේ සමාගම් වලට අදාල ගිණුම් වාර්තා ඉදිරිපත් කරන ලෙස ශ්‍රී ලංකා මහා බැංකුවේ මූල්‍ය බුද්ධි අංශයට අධිකරණය විසින් නියෝගයක් නිකුත් කළත් මේ දක්වා එම වාර්තා අධිකරණයට ඉදිරිපත් කර නොමැති බව පෙන්වා දුන් ජනාධිපති නීතිඥවරයා පැමිණිලිකරුවන්ට මෙම නඩුව පවත්වාගෙන යාමට උනන්දුවක් නැතිනම් මෙම නඩුව සම්බන්ධයෙන් තීන්දුවක් ගන්නා ලෙසත් මහෙස්ත්‍රාත්වරියගෙන් ඉල්ලා සිටියේය.

මෙම අපරාධය සම්බන්ධයෙන් මේ වන විටත් සිය සේවාදායකයින්ට එරෙහිව ත්‍රී පුද්ගල මහාධිකරණ විනිසුරු මඩුල්ල ඉදිරියේ නීතිපතිවරයා විසින් නඩු පවරා තිබෙන බවත් ඔහු පෙන්වා දී ඇත.

මෙහිදී අපරාධ පරීක්ෂණ දෙපාර්තමේන්තුවේ නිලධාරියා ද අධිකරණයට දැනුම් දුන්නේ අදාල වාර්තා ඉදිරිපත් කරන ලෙස පෙර අධිකරණය කළ නියෝගය සම්බන්ධයෙන් ශ්‍රී ලංකා මහ බැංකුවේ මූල්‍ය බුද්ධි අංශයෙන් මෙතෙක් ප්‍රතිචාරයක් ලැබී නොමැති බවය.

ඉදිරිපත් වූ කරුණු සලකා බැලූ කොළඹ ප්‍රධාන මහෙස්ත්‍රාත්වරිය මෙම කරුණ සම්බන්ධයෙන් මීළඟ නඩු දින අධිකරණයේ පෙනී සිට කරුණු දක්නට ලෙස ශ්‍රී ලංකා මහා බැංකුවේ මුල්‍ය බුද්ධි අංශයට නියම කළේය.

මෙම නඩුවේ සැකකරුවන් ලෙස පර්පචුවල් ට්‍රෙෂරීස් සමාගම, එම සමාගමේ අධ්‍යක්ෂ අර්ජුන් ඇලෝසියස්, හිටපු මහා බැංකු අධිපති අර්ජුන් මහේන්ද්‍රන් ඇතුළු සැකකරුවන් හත් දෙනෙකු නම් කර තිබේ.