නීති විරෝධී ලෙස එකලස් කරන ලද සුඛෝපභෝගී බී.එම්.ඩබ්ලිව්. වර්ගයේ කාර් රථයක් භාවිත කරන ලදැයි කියන සිද්ධියේ සැකකරු වන හිටපු ඇමැති ජොන්ස්ටන් ප්‍රනාන්දු මහතා අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුවේ සහ පොලිසියේ නිලධාරීන් රැසක් කොටුව මහෙස්ත්‍රාත් අධිකරණය ඉදිරිපිට හා ඒ අවට ඊයේ (21) රැකවල්ලා ගෙන සිට ඇති බව වාර්තා වේ.

අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශයේ නිලධාරීන් විසින් අත්අඩංගුවට ගැනීමට සොයමින් සිටින හිටපු ඇමැති ජොන්ස්ටන් ප්‍රනාන්දු සිය නීතිඥවරුන් මාර්ගයෙන් කොටුව මහෙස්ත්‍රාත් අධිකරණය වෙත භාරවීමට සූදානමක් පවතින බවට ලද තොරතුරක් මත, එලෙස රැකවල් යොදා තිබූ බව පැවසේ.

කොටුව මහෙස්ත්‍රාත් අධිකරණය වෙත පිවිසීමට තිබෙන සියලුම පිවිසුම් මාර්ග ආවරණය පරිදි පොලිසිය එලෙස රැකවල් යොදා තිබී ඇත.

මේ වන විට විදෙස් ගමන් තහනම් කර තිබෙන සැකකාර හිටපු ඇමැති ජොන්ස්ටන් සේවියර් ප්‍රනාන්දු නමැත්තාට අපරාධ පරීක්ෂණ දෙපාර්තමේන්තුව වෙත පැමිණ ප්‍රකාශයක් ලබා දෙන ලෙසට කුරුණෑගල පොලිසිය මගින් 1979 අංක 15 දරණ අපරාධ නඩු විධාන සංග්‍රහයේ 109 (06) යටතේ දැනුවත් කර තිබුණ ද, එය මගහරිමින් සැකකරු කටයුතු කරන බවද අපරාධ පරීක්ෂණ දෙපාර්තමේන්තුවේ නිලධාරීන් කොටුව මහෙස්ත්‍රාත් තනුජා ලක්මාලි වෙත වාර්තාවක් ඉදිරිපත් කරමින් දැනුම් දුන්නේය.

අදාළ සැකකරු අපරාධ පරීක්ෂණ දෙපාර්තමේන්තුවට නොපැමිණ විමර්ශනයට අදාළ සහාය ලබා දීමක් සිදු නොකරන බවද නිරීක්ෂණය වී ඇතැයි, එම දෙපාර්තමේන්තුවේ නිලධාරීන් මහෙස්ත්‍රාත්වරිය වෙත දැනුම්දී තිබේ.

ඒ අනුව අදාළ සැකකරු වන හිටපු ඇමැති ජොන්ස්ටන් ප්‍රනාන්දු අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුවේ නිලධාරීන් විශේෂ විමර්ශනයක් මේ වන විට ආරම්භ කර තිබේ.

සබැඳි පුවත්
ජොන්ස්ටන්ගේ BMW සෙල්ලම ගැන තවත් තොරතුරු එළියට

හිටපු ඇමති ජොන්ස්ටන්ගෙන් සමිතා වාහන 3ක් ගත්තාද?

ජොනීගේ BMW එක ගැන ටැක්සි අබේ වමාරයි; දෑඅවුරුද්දක් ජොනී පැද්දේ මේක CIDය කියයි