පුවත්

ටෝකියෝ සිමෙන්ට් සමූහයේ සභාපති කබ්රාල් NSB සභාපති ධූරයට

Published

2 years ago

May 18, 2023

editor

ජාතික ඉතිරි කිරීමේ බැංකුවේ නව සභාපතිවරයා ලෙස නීති ක්ෂේත්‍රයේ ප්‍රවීණයකු වන ආචාර්ය හර්ෂ කබ්රාල් පත්කර ඇත.

ආචාර්ය හර්ෂ කබ්රාල් මෙරට බුද්ධිමය දේපළ පනත, සමාගම් පනත, වාණිජ නීතිය, වාණිජ බේරුම්කරණය, ජාත්‍යන්තර වාණිජ නීතිය යන ක්ෂේත්‍ර‍යන්හි සිවිල් හා අපරාධ නීතිය සම්බන්ධයෙන් වසර 35 ක අත්දැකීම් බහුල ප්‍ර‍වීණයකි. ඔහු ජනාධිපති නීතිඥයකු ලෙස වසර 17 ක් කටයුතු කර ඇත.

ඔහු ඔස්ට්‍රේලියාවේ කැන්බරා සරසවියේ ආයතනික නීතිය පිළිබඳ පශ්චාත් උපාධිධරයෙක් වන අතර, 2021 වර්ෂය තෙක් වර්ෂ 06 ක් ම පැරීසියේ බේරුම්කරණය පිළිබඳ ජාත්‍යන්තර අධිකරණයේ ජාත්‍යන්තර වාණිජ මණ්ඩලයේ සාමාජිකයකු ලෙස කටයුතු කර තිබේ.

එමෙන්ම, ඒකාබද්ධ ගැටුම් කළමනාකරණය පිළිබඳ සම්මේලනයේ නියෝජිත සාමාජිකයකු (FICM) මෙන්ම ජාත්‍යන්තර වාණිජ ගැටුම් පිළිබඳ විනිශ්චය සභාවේ නියෝජිත සාමාජිකයකු (ICDT) මෙන්ම එක්සත් රාජධානියේ හා අයර්ලන්තයේ වරලත් පාලන ආයතනයේ අධිසාමාජිකයකි.

මෙරට ආයෝජන මණ්ඩලයේ හිටපු සාමාජිකයකු වන ඔහු, ශ්‍රී ලංකාවේ ජාත්‍යන්තර බේරුම්කරණ මධ්‍යස්ථානයේ ආරම්භක අධ්‍යක්ෂ මණ්ඩල සාමාජිකයකු වූ අතර, වත්මන් බේරුම්කරණ පනත කෙටුම්පත් කිරීමෙහි නිරත වී ඇත. ඔහු නීති කොමිෂන් සභාවේද සාමාජිකයකි.

ආචාර්ය කබ්රාල් මෙරට විශාලතම සිමෙන්ති වෙළෙඳපොළ කොටසට හිමිකම් කියන ටෝකියෝ සිමෙන්ට් සමූහයේ සභාපති ධුරයද දරන්නේය.

ඔහු LOLC ෆිනෑන්ස් පීඑල්සී සමාගමේ හිටපු සභාපතිවරයාද වේ. මීට අමතරව සීමාසහිත LOLC රක්ෂණ සමාගම, කොමර්ෂල් ලීසිං ඇන්ඩ් ෆයිනෑන්ස් ලිමිටඩ්, රිචඩ් පීරිස් යන සමාගම්වල ඔහු අධ්‍යක්ෂවරයකු ලෙස කටයුතු කර ඇත.

හැටන් නැෂනල් බැංකුවෙහි වැඩබලන සභාපති ලෙස කටයුතු කර ඇති ඔහු යූනියන් බැංකුවෙහි ජ්‍යෙෂ්ඨ අධ්‍යක්ෂවරයකු‍ ලෙසද කටයතු කර තිබේ. ජාතික වෙළෙඳ ප්‍රතිපත්තිය පිළිබඳ අමාත්‍ය මණ්ඩල කමිටුවෙහි සාමාජිකත්වය දැරූ ඔහු ශ්‍රී ලංකාවේ නීති ප්‍රතිසංස්කරණය පිළිබඳ ජනාධිපති කොමිෂන් සභා සාමාජිකයකි.

ඩිමෝ පීඑල්සී, හේලීස් පීඑල්සී, ඇලුමෙක්ස් පීඑල්සී, ටෝකියෝ සිමෙන්ට් (ලංකා) පීඑල්සී, සීමාසහිත ටෝකියෝ සුපර් සිමෙන්ට් ලංකා , සීමාසහිත ටෝකියෝ සිමෙන්ට් පවර් ලංකා, සීමාසහිත ටෝකියෝ ඊස්ටන් සිමෙන්ට් සමාගම, සී/ස ටෝකියෝ සුපර් ඇග්‍රිගේට්, සී/ස ටෝකියෝ සුපර් මික්ස්, Chevron Lubricants Lanka PLC,සී/ස සෙලින්කෝ ජීවිත රක්ෂණ සමාගම, CCC-ICLP International ADR Centre (Guarantee) Limited හා සී/ස ඩාලි ප්‍රොපර්ටි හෝල්ඩින්ස් යන ආයතනයන්හි විධායක නොවන ස්වාධීන අධ්‍යක්ෂවරයකු ලෙස මේ වන විට කටයුතු කරන්නේය.

මෙරට සහ විදේශ විශ්වවිද්‍යාල කිහිපයක ජ්‍යෙෂ්ඨ බාහිර කථිකාචාර්යවරයකු ලෙස සේවය කරන ඔහු “ශ්‍රී ලංකාවේ බුද්ධිමය දේපළ නීතිය” ඇතුළු කෘති කිහිපයක්ම පළ කර ඇත.

නව සභාපතිවරයා වැඩ භාර ගන්නා අවස්ථාවට ජාතික ඉතිරි කිරීමේ බැංකුවේ සාමාන්‍යාධිකාරී/ ප්‍රධාන විධායක නිලධාරී අජිත් පීරිස් ඇතුළු නිලධාරීන් සහභාගි වූහ.

පුවත්

දුන්හිඳ බස් අනතුරෙන් 03ක් මියයයි

Published

11 minutes ago

June 21, 2025

editor

බදුල්ල – මහියංගනය ප්‍රධාන මාර්ගයේ දුන්හිඳ හතරේ කණුව ප්‍රදේශයේදී බස් රථයක් මාර්ගයේ පෙරළී යාමෙන් අද (21) සවස 06ට පමණ සිදුවූ අනතුරකින් පුද්ගලයින් තිදෙනෙකු මියගොස් තිබේ.

අනතුරෙන් පුද්ගලයන් 34 දෙනෙකු තුවාල ලබා ඇති බවත්, ඔවුන් බදුල්ල රෝහලට ඇතුළත් කර ඇති බවත් වාර්තා වේ.

මෙලෙස අනතුරට ලක්ව ඇත්තේ තඹුත්තේගම සිට බදුල්ල දක්වා ගමන්කරමින් සිටි වන්දනාකරුවන් පිරිසකි. ඔවුන් තඹුත්තේගම ප්‍රදේශයේ පදිංචිකරුවන් බව පැවසේ.

බදුල්ල පොලීසිය අනතුර සම්බන්ධව වැඩිදුර විමර්ශන ක්‍රියාත්මක කරනු ලබයි. දෙක ආසන්නයේ බස් රථයක් පෙරලී ගොස් තිබේ.

අනතුරින් පුද්ගලයින් 25කට අධික පිරිසක් තුවාල ලබා රෝහල් ගත කර ඇතැයි වාර්තා වේ.

(ඡායාරූපය : Accident1st)

ක්‍රීඩා

මැතිව්ස්, ටෙස්ට් පිටියට සමු දෙයි

Published

39 minutes ago

June 21, 2025

editor

ශ්‍රී ලංකාවේ හිටපු නායක ඇන්ජලෝ මැතිව්ස්, ක්‍රීඩා ලෝලීන්ට ආචාරය දක්වමින් සිය ටෙස්ට් දිවියට අද (21) සමුදුන්නේය.

ඒ, සංචාරක බංග්ලාදේශ කණ්ඩායම සමග පැවැත්වෙන පළමු ටෙස්ට් ක්‍රිකට් තරගයේ දෙවන දිනයේදී තයිජුල් ඉස්ලාම්ගේ පන්දුවක් හමුවේ මොමිනුල් හක් අතට උඩ පන්දුවක් ලබා දෙමිනි.

මෙම තරගය අද දිනයේදී ජය පරාජයෙන් තොරව අවසන් විය.

16 වසරක් පුරාවට ශ්‍රී ලංකා ටෙස්ට් ක්‍රීඩකයෙකු ලෙස ක්‍රීඩා කළ මැතිව්ස්, ටෙස්ට් තරග 119කදී ඉනිම 211ක් ක්‍රීඩා කර තිබේ.

එහිදී ලකුණු 8,214ක් ලබා ගෙන ඇති ඔහු, ටෙස්ට් ශතක 16කට සහ අර්ධ ශතක 45ක් ලබාගැනීමටද සමත් වී තිබේ.

ඊට අමතරව ඔහු විසින් ටෙස්ට් කඩුලු 33ක්ද දවා ගෙන තිබේ.

පුවත්

කෝටි 433ක බදු පොලු තැබූ සමාගම් 5ක අධ්‍යක්ෂකවරුන්ගේ දේපළ ආණ්ඩුවට

Published

2 hours ago

June 21, 2025

editor

රුපියල් කෝටි හාරසිය තිස් තුනකට අධික (4,334,997,188) මහා පරිමාණ වැට් බදු පැහැර හැරීම් සිදුකර සිර දඬුවම් ලැබූ සමාගම් 5ක අධ්‍යක්ෂවරුන්ගෙන් හිඟ බදු අයකර ගැනීම සඳහා දේශීය ආදායම් දෙපාර්තමේන්තුව පියවර ගනිමින් සිටින බව වාර්තා වේ.

මෙම සමාගම්වලට හෝ එහි අධ්‍යක්ෂවරුන්ට අයත් දේශීය හා විදේශීය නිශ්චල හා චංචල දේපළ පවරා ගැනීම හෝ වත්කම් පවරා ගැනීමට දේශීය ආදායම් දෙපාර්තමේන්තුව කටයුතු කරමින් සිටියි.

යාන වාහන, යන්ත්‍ර සූත්‍ර, සමාගම් කොටස්, ස්ථාවර තැන්පතු ආදී මොන යම් හෝ දේපළකින් හිඟ බදු මුදල අයකර ගැනීමට පියවර ගනිමින් සිටින බවට වාර්තා වේ.

දේශීය ආදායම් දෙපාර්තමේන්තුව පවසන්නේ, ඒ සඳහා මෙම සමාගම් අධ්‍යක්ෂවරුන්ගේ තොරතුරු පරීක්ෂා කරමින් සිටින බව ය.

සිර දඬුවම් විඳීමෙන් පසුව නිදහස් වූ නමුත් මෙතෙක් බදු මුදල් ගෙවීමට අපොහොසත් වූ මෙම සමාගම්වල අධ්‍යක්ෂවරුන්ගේ හා සමාගම්වල තොරතුරු අනාවරණය විය.

මෙලෙස වැට් බදු මුදල් පැහැර හැරීම සිදුකළ සමාගම් හා පුද්ගලයන්ගේ තොරතුරු මෙසේ ය.

කේ. ඒ. ගීත ප්‍රසංග රුපියල් 46,655,028ක වැට් බදු මුදලක් පැහැර හැර තිබේ. එම සමාගම් අධ්‍යක්ෂවරයා මේ වන විටත් සිර දඬුවම් විඳිමින් සිටියි.

සමාගම් අධ්‍යක්ෂවරුන් වන ආර්. ජී. ඇන්ඩ්‍රාඩෝ රුපියල් 40,066,805ක් සහ ජේ.ඒ. ජයසුන්දර 31,134,367ක හිඟ බදු ගෙවා නැත.

මෙන්ඩිස් සහ සමාගමේ අධ්‍යක්ෂවරුන් වන අර්ජුන ඇලෝසියස් සහ ඇන්තොනි ජෝන් 3,983,937,872 ක මුදලක් ගෙවා නැති බව වාර්තා වේ.

සමරනායක සහ සමාගම, අධ්‍යක්ෂවරුන් එච්.ඒ.ඒ.ආර්.එම්. සමරනායක, ශ්‍රී රජෝර් ෂම්මුගනාදන් සහ ජී.එම්.එම්. තුෂානි රුපියල් 19,283,204ක් වැට් බදු පැහැර හැර තිබේ.

එම සමාගම පැහැර හරින ලද තවත් රුපියල් 213,919,912ක වැට් බදු මුදලක් ඇත. එම සමාගම යොමුකළ ප්‍රතිශෝධන අයැදුම්පත සලකා බලා මහාධිකරණයෙන් ඇප නියම කර ඇත.

සමාගම් අධ්‍යක්ෂ කේ. ඒ. ගීත ප්‍රසංග මේ වනවිටත් දඬුවම් විඳිමින් සිටින අතර අනෙකුත් සමාගම්වල අධ්‍යක්ෂවරුන් සියලු ම දෙනා සිරදඬුවම් විඳීමට පසුව නිදහස් වූ අය නමුත් ඔවුන්ගෙන් බදු මුදල් අයකර ගන්නා බව දේශීය ආදායම් දෙපාර්තමේන්තුව පවසයි.

වැට් බදු ගෙවීම පැහැර හැරීම සිදුකළ විජිත එන්ටප්‍රයිස් පෞද්ගලික සමාගමේ අධ්‍යක්ෂවරුන් එච්. එම්.එම්.බී. ගුණසේකර සහ ටී.කේ. අමරසිංහ රුපියල් 32,512,815ක හිඟ බදු මුදල මේ වන විට ගෙවා ඇත.