යාපනය ඩෙල්ෆ් දූපතේ නිවසක් තුළදී, තියුණු ආයුධවලින් පහරදී පුද්ගලයින් 05 දෙනෙකු ඝාතනය කිරීමේ සිදුවීම සම්බන්ධයෙන් සැකකරුවෙකු අත්අඩංගුවට ගෙන ඇත.
පොලීසිය සඳහන් කළේ, 51 හැවිරිදි අදාළ පුද්ගලයා අද (23) උදෑසන කයිට්ස්, පුංකුඩිතිව් හීදි අත්අඩංගුවට ගෙන ඇති බවයි.
සැකකරු වෙනත් ප්‍රදේශයකට පලායාමට සූදානම්ව සිටියදී විමර්ශන සිදුකළ යාපනය කොට්ඨාස අපරාධ විමර්ශන ඒකකය එලෙස සැකකරු අත්අඩංගුවටගත් බව පොලිසිය පැවසීය.
සැකකරු සතුව තිබී ඝාතනයවූ කිහිපදෙනකු භාවිතා කළ ජංගම දුරකථන තුනක්, නිවසින් සොරාගත් පවුම් දහයකට අධික බරින් යුත් රන් භාණ්ඩ සොයාගත් බවත් පොලිසිය සඳහන් කළේය.
පෙරේදා ඩෙල්ෆ් පොලිසිය වෙත ලැබුණ තොරතුරක් අනුව අදාළ නිවස පරීක්ෂා කිරීමේදී කපාකොටා ඝාතනයකළ කාන්තාවන් තිදෙනාගේ සහ පිරිමි පුද්ගලයින් දෙදෙනකුගේ සිරුරු සොයාගත් බවත් තුවාල ලබා සිටි වයෝවෘද කාන්තාවක් ප්‍රතිකාර සඳහා යාපනය ශික්ෂණ රෝහල වෙත ඇතුලත් කළ බවද පොලිසිය පැවසීය.
එලෙස කපාකොටා ඝාතනය කොට ඇත්තේ යාපනය, ඩෙල්ෆ්, මාවිලා වරාය අසල පදිංචි කාර්තිකේසු නාගේශ්වරී (83), නාගනාධි බාලසිංහම් (82) හා විදේශගතව සිට පැමිණි බාලසිංහම් කන්මනිපිල්ලේ (76) සහ ඇගේ ස්වාමිපුරුෂයා වූ වේලායුදම්පිල්ලේ නාගේන්ද්‍ර රත්නම් (78) සහ යාපනයේ පදිංචිව සිටි මහාදේවන් (75) යන පිරිසය.
එක් කාන්තාවක් නිවසේ ඇඳමත ඝාතනය කොට ඇති අතර අනෙක් කාන්තාවන් හා පිරිමි පුද්ගලයින් දෙදෙනා නිවසේ විවිද ස්ථානවලදී ඝාතනය කොට තිබූ බව පැවසේ.
තියුණු ආයුධයකින් හිසට පහරදී මෙම ඝාතන සිදුකොට ඇති බව පොලිසිය සඳහන් කළේය.
පොලිසිය වෙත ඝාතනයන් පිළිබඳ වාර්තාවීමත් සමඟ ඝාතකයා අත්අඩංගුවටගැනීම සඳහා ඩෙල්ෆ් සිට කුරිකට්ටුවාන් දක්වා මගීප්‍රවාහන බෝට්ටුසේවය තාවකාලිකව නවතා දැමීමට පියවරගත්තද සැකකරු කයිට්ස් වෙත පලාගොස් සිට ඇති බවද පොලිසිය පැවසීය.
පොලිසිය පැවසූයේ සැකකරු විදේශරටක පදිංචිව සිට වසර ගණනකට පෙර යාපනය වෙත පැමිණ ඇති බවත් ඔහු පොලියට මුදල් ලබාගෙන ගෙවීම් පැහැර හැර ඇති බවට අනාවරණයවූ බවත්ය.
මියගිය පුද්ගලයින්ගේ මරණයන් සම්බන්ධයෙන් මහෙස්ත්‍රාත් පරීක්ෂණය ඊයේ (22) කයිට්ස් මහෙස්ත්‍රාත් එස්. ගජනිත්‍යබාලන් මහතා විසින් සිදුකළ අතර පශ්චාත් මරණ පරීක්ෂණයන් සඳහා සිරුරු යාපනය ශික්ෂණ රෝහල වෙත රැගෙනයාම සිදුකෙරිණ.
තුවාල ලැබූ කාන්තාවගේ තත්වය බරපතල නොවන බවත් ඇයගෙන් ප්‍රකාශ ලබාගන්නා බවත් පොලිසිය පැවසීය.
අත්අඩංගුවටගත් සැකකරු රැදවුම් නියෝග මත ප්‍රකාශ ලබාගැනීමට නියමිත බවත් පැවසීය.
ඩෙල්ෆ් පොලිසිය, යාපනය කොට්ඨාස අපරාධ විමර්ශන ඒකකය ඇතුළු විශේෂ පොලිස් කණ්ඩායම් කිහිපයක් ඝාතනයන් සම්බන්ධයෙන් වැඩිදුර විමර්ශන සිදුකරයි.
