මුදල් විශුද්ධිකරණය වැළැක්වීමේ පනත යටතේ අත්අඩංගුවට ගෙන රක්ෂිත බන්ධනාගාර ගත කර සිටි හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ ඇප මත මුදා හරින ලෙස කොළඹ මහේස්ත්‍රාත් අධිකරණය නියම කර තිබේ.

දීර්ඝ කරුණු සලකා බැලීමකින් අනතුරුව කොළඹ අතිරේක මහෙස්ත්‍රාත් මංජුල රත්නායක මහතා මෙම නියෝගය නිකුත් කළේය.

(පෙර පුව​ත: 2025 ජනවාරි 27, පෙ.ව.10:12)

යෝෂිතව අධිකරණයට රැගෙන එයි

මුදල් විශුද්ධිකරණය වැළැක්වීමේ පනත යටතේ අත්අඩංගුවට ගෙන රක්ෂිත බන්ධනාගාරගත කර සිටින හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ මේ වන  විට කොළඹ මහෙස්ත්‍රාත් අධිකරණයට ඉදිරිපත් කර තිබේ.

පෙරේදා බෙලිඅත්ත ප්‍රදේශයේදී අත්අඩංගුවට ගනු ලැබූ යෝෂිත රාජපක්ෂ මහතා අද (27) දින දක්වා රක්ෂිත බන්ධනාගාර ගත කරන ලෙස කොළඹ අතිරේක මහෙස්ත්‍රාත්වරිය නියෝග කර තිබුණි.

ඒ අනුව බන්ධනාගාර නිලධාරීන් විසින් යෝෂිත රාජපක්ෂ මේ වන විට අධිකරණයට රැගෙන විත් තිබේ.

මෙම නඩුවේ පැමිණිල්ල වෙනුවෙන් අතිරේක සොලිසිටර් ජෙනරාල් දිලීප පීරිස් මහතා ඇතුළු රජයේ නීතිඥවරු පිරිසක් පෙනී සිටී.

(පෙර පුව​ත: 2025 ජනවාරි 27, පෙ.ව.7:14)

ඩේසි ආච්චිට රත්මලානේ ගේ ගන්න උදව් කළ යෝෂිත අද අධිකරණයට

රත්මලාන ප්‍රදේශයේ ඉඩමක් සහ නිවසක් රුපියල් ලක්ෂ තුන්සිය හතළිහකට මිලදී ගැනීම සම්බන්ධයෙන් මුදල් විශුද්ධිකරන පනත යටතේ අත්අඩංගුවට ගෙන රිමාන්ඩ් බාරයට පත්කළ හිටපු ජනාධිපති මහින්ද රාජපක්ෂ මහතාගේ දෙවැනි පුත් යෝෂිත රාජපක්ෂ අද (27) කොළඹ අතිරේක මහෙස්ත්‍රාත් මංජුල රත්නායක මහතා වෙත ඉදිරිපත් කිරීමට නියමිතය.

අපරාධ පරීක්ෂණ දෙපාර්තමේන්තුව හා නීතිපතිවරයා විසින් ලබාදුන් උපදෙස් පරිදි පෙරේදා (25) දක්ෂිණ අධීවේගී මාර්ගයේ බෙලිඅත්ත පිවිසුමේදී අත්අඩංගුවට ගත් සැකකාර යෝෂිත රාජපක්ෂ මහතා කොළඹ අතිරේක මහෙස්ත්‍රාත් පවිත්‍රා සංජීවනී පතිරණ මහත්මියගේ ගේ නිල නිවස වෙත ඉදිරිපත් කිරීමෙන් අනතුරුව අද (27) දක්වා රිමාන්ඩ් බාරයට පත්කර තිබිණි.

සැකකරු අතිරේක මහෙස්ත්‍රාත්වරිය හමුවට ඉදිරිපත් කරමින් අපරාධ පරීක්ෂණ දෙපාර්තමේන්තුව දන්වා සිටියේ රත්මලාන සිරිමල් පෙදෙසේ පිහිටි නිවසක් සහ ඉඩමක් රුපියල් ලක්ෂ තුන්සිය හතළිහකට මිලදී ගැනීම සම්බන්ධයෙන් යෝෂිත රාජපක්ෂව සහ ඔහුගේ මිත්තනිය වන ඩේසි පොරස්ට් නැමැත්තියට එරෙහිව මුදල් විශුද්ධීකරණය වැළැක්වීමේ පනත යටතේ විමර්ශනයක් සිදුකළ බවයි.

එම විමර්ශනයට අදාළව සැකකරුවකු ලෙස නම් කිරීමට ප්‍රමාණවත් සාක්කි තිබෙන බවට නීතිපතිවරයා ලබාදුන් උපදෙස් පරිදි සැකකාර යෝෂිත රාජපක්ෂ අත්අඩංගුවට ගත් බව දන්වා සිටියහ. 

සැකකාර යෝෂිත රාජපක්ෂ වෙනුවෙන් නීතිඥ මඬුල්ලක් සමග පෙනී සිටි ජනාධිපති නීතිඥ සම්පත් මෙන්ඩිස් දන්වා සිටියේ 2016 වසරේදී ආරම්භ කළ විමර්ශනයට අදාළව තම සේවාදායකයා අත්අඩංගුවට ගෙන ඇති බවයි. 

එම සිද්ධියට අදාළව විමර්ශන ගොනුව නීතිපති උපදෙස් පතා යොමුකර ඇත්තේ 2017 වසරේ ජනවාරි මාසයේදී බව පෙන්වා දුන් ජනාධිපති නීතිඥවරයා තම සේවාදායකයා සැකකරුවකු ලෙස පත්කරමින් නීතිපතිවරයාගේ උපදෙස් ලැබී ඇත්තේ වසර අටකට පසුව බවද දන්වා සිටියේය. 

මෙම නඩුවේ ප්‍රධාන සැකකාරිය බවට අපරාධ පරීක්ෂණ දෙපාර්තමේන්තුව විසින් නම් කර තිබෙන ඩේසි පොරාස්ට් නැමැත්තිය අධිකරණය මගින් නිකුත් කළ නොතිසියකට අනුව 2016 වසරේදී පෙනී සිටි බවත් එහිදී ඇයට ඇප ලබාදුන් බවත් දන්වා සිටියේය. 

නමුත් තම සේවාදායකයා වන යෝෂිත රාජපක්ෂ අත්අඩංගුවට ගෙන ඇත්තේ එම සිද්ධියට ආධාර අනුබල දීම සහ කුමන්ත්‍රණය කිරීම යටතේ බව පෙන්වා දුන් ජනාධිපති නිතිඥ සම්පත් මෙන්ඩිස් එලෙස අත්අඩංගුවට ගත් යෝෂිත රාජපක්ෂ රිමාන්ඩ් බාරයට පත්කරන ලෙස අපරාධ පරීක්ෂණ දෙපාර්තමේන්තුව ඉල්ලා සිටින්නේ කුමන පදනමින් ද යන්න පිළිබදව ප්‍රශ්න කළේය. 

ඒ අනුව සැකකාර යෝෂීත රාජපක්ෂ ඇප මත මුදාහරින ලෙස ජනාධිපති නීතිඥවරයා ඉල්ලා සිටියේය. 

සැකකරු ඇප මත මුදාහැරීම ප්‍රතික්ෂේප කළ අතිරේක මහෙස්ත්‍රාත්වරිය ඔහු අද (27) තෙක් රිමාන්ඩ් බාරයට පත්කරන ලෙසත් එදිනට විමර්ශනයේ ප්‍රගතිය අධිකරණයට වාර්තා කරන ලෙසත් අපරාධ පරීක්ෂණ දෙපාර්තමේන්තුවට නියම කළාය.