සමගි සන්ධාන ඒකාබද්ධ වෘත්තීය සමිති බලවේගයේ කැඳවුම්කරු වන ආනන්ද පාලිත මහතා මාධ්‍ය හමුවකදී සිදු කළ ප්‍රකාශයක් පදනම් කර ගනිමින් “තෙල් සංස්ථාවේ සභාපතිවරයා පඩිය දෙගුණයකින් වැඩි කරගෙන සහ තෙල් සංස්ථාවේ අධ්‍යක්ෂවරු මහජන මුදලින් කජු කනවා” යනුවෙන් පළ කර ඇති පුවත් අසත්‍ය බව කියමින් ඛනිජ තෙල් නීතිගත සංස්ථාවේ සභාපතිවරයා මාධ්‍යට සිදුකළ බලපෑම නිසා මේ තත්ත්වයේ සත්‍ය අසත්‍යතාවය හෙළිවන තුරු සභාපතිවරයාට තනතුරෙන් ඉල්ලා අස්වන්නැයි ජනපතිවරයාට හිතවත් පාර්ශවවලින් ඉල්ලීම් සිදුකර ඇතැයි වාර්තා වේ.
මේ අතර, ඊයේ (19) කොළඹදී පැවැති මාධ්‍ය හමුවකදී සමගි සන්ධාන ඒකාබද්ධ වෘත්තීය සමිති බලවේගයේ කැඳවුම්කරු ආනන්ද පාලිත මහතා වෘත්තිය සමිති සහයෝගයෙන් බලයට පැමිණි වර්තමාන ආණ්ඩුව දැන් සිදුකරන්නේ මාධ්‍ය මර්දනය කරමින් මාධ්‍යයට තොරතුරු ලබාදෙන වෘත්තීය සමිති මර්දනය කරමින් ඔවුන් අපරාධ පරීක්ෂණ දෙපාර්තමේන්තුවට ගෙන යන බව පවසා බියවද්දන බවට ද චෝදනා කළේය.
තමන් කිසිවිටකත් අසත්‍ය තොරතුරු මාධ්‍යට නොදුන් බවත් තමන් ප්‍රකාශ කළ සියලුම තොරතුරු සාක්ෂි සහිතව ඔප්පු කළ හැකි බව ද ඔහු එහිදී කියා සිටියේය.
ඔහු පෙන්වා දෙන්නේ ආණ්ඩුව බලයට පත්වුයේ විවේචනයන් සියල්ලටම ඇහුම්කන් දෙන බවත් මාධ්‍යට අවශ්‍ය නිදහස ලබාදෙන බවත් පවසා වුවත් දැන් සිදුවන්නේ ආණ්ඩුවේ කිසිවකුට හෝ විරුද්ධව යමක් ප්‍රකාශ කළහොත් එය ප්‍රකාශ කරන තැනැත්තා මෙන්ම එය පළ කරන මාධ්‍යත් නීතිය හමුවට ගෙන ඒම බවය.
මෙම මාධ්‍ය හමුවේදී වැඩිදුරටත් අදහස් දැක්වූ සමගි සන්ධාන ඒකාබද්ධ වෘත්තීය සමිති සම්මේලනයේ කැඳවුම්කරු ආනන්ද පාලිත මෙසේද පැවැසුවේය.
පාලිත මහතා වැඩිදුරටත් මෙසේද කීය.
‘18 වනිදා ‘අරුණ’ පත්තරේ මුල් පිටුවේ පළ වුණා තෙල් සංස්ථාවේ සභාපතිවරයා පඩිය දෙගුණයකින් වැඩි කරගෙන කියල පුවතක් සහ තෙල් සංස්ථාවේ අධ්‍යක්ෂවරු මහජන මුදලින් කජු කනවා කියලා පුවතක් පළ වෙලා තිබුණා.
මේක දැකපු ගමන් තෙල් සංස්ථාවේ සභාපතිවරයා රාජකරුණා සහෝදරයා මෙම පුවත්පත වාර්තා කරලා තියෙන කරුණු අසත්‍යයි කියලා නිවේදනයක් නිකුත් කරලා. රජයේ ප්‍රවෘත්ති අධ්‍යක්ෂ ජනරාල්වරයාත් ඒ නිවේදනයම උපුටා දක්වලා සියලුම මාධ්‍ය වෙත දැනුම් දෙනවා ඒක පළ කරන්න කියල.”
” සාමාන්‍ය ක්‍රමය නම් මෙහෙම පුවතක් පළ වුණාම ඒ පැත්තෙන් කියන්න ඕනේ මෙන්න මේ මේ කරුණු වැරදියි කියලා. මම කජු කෑවේ නැහැ කියලා. මම වැටුප් දෙකක් ගත්තේ නැහැ කියලා. මට සහ මගේ බිරිඳට දරුවන්ට සීමාව ඉක්මවලා වෛද්‍ය දීමනා ගත්තේ නැහැ කියලා. මම තිබුණ වැටුපට වැඩිය වැටුප් ගත්තේ නැහැ කියලා සභාපතිවරයා කියන්න ඕනේ. එහෙම කිව්වා නම් මාධ්‍යට පුළුවන් නිවැරැදි කිරීමක් ලෙස එය පළ කරන්න. එහෙම නැතුව අසත්‍ය කිව්වට වැඩක් නැහැනේ. මේ යන්නේ මර්දනයක්. වත්මන් ආණ්ඩුවට බලයට එන්න සහය දුන්නේ වෘත්තිය සමිති. ඒ සමිතිවලට තොරතුරු දෙන්නේ රජයේ නිලධාරින් පුද්ගලික සමාගම්වල අය නෙමේ. තෙල් සංස්ථාවේ විදුලිබල මණ්ඩලයේ වරායේ හිටපු රටට ආදරය කරපු නිලධාරින් තමයි මේ ආණ්ඩුවට තොරතුරු දුන්නේ. දැන් ආණ්ඩුව බලයට ඇවිල්ල කරන්නේ ඒ තොරතුරු දුන්න අයව මර්දනය කරන එක. සී අයිඩී එකට ගෙනියන්න හදන එක.”
මේ කතාව ජනාධිපති ලේකම් කාර්යාලයත් දන්නවා…
“ඉකුත් දෙසැම්බර් හයවැනිදා මම ගියා ජනාධිපති ලේකම් කාර්යාලයට ජනාධිපතිවරයා කාර්ය බහුල නිසා මට හමුවෙන්න පුළුවන් වුණේ ජනාධිපති කාර්ය මණ්ඩල ප්‍රධානියා සහ අධ්‍යක්ෂ ජනරාල්වරයා. එහිදී මම පැහැදිලිවම කිව්වා ඔවුන් මේ තෙල් සංස්ථාවට පත්කරලා තියෙන සභාපතිවරයා සහ අධ්‍යක්ෂ මණ්ඩලයේ විශාල ගැටලු තියෙන බව. ඉන් පස්සේ ඔවුන් ඒ වෙලාවෙම දුරකථන ඇමතුමක් දුන්න ජනාධිපතිවරයාගේ නීති උපදේශිකාවකට එවිට ඇය කියලා තියනවා ඒ මම කියපු කරුණු ඔක්කොම සම්බන්ධයෙන් දත්ත තියනවා ඒවා සත්‍යයි කියලා. මම ඇහුවා ඇයි එහෙනම් ක්‍රියාමාර්ග ගන්නේ නැත්තේ කියලා. තව කරුණු හොයනවා කිව්වා. එතකොට ඔහු කිව්වා ජනාධිපතිවරයා හවස හමුවෙනවා. මම කියන්නම් ඒ ඔක්කොම කියලා. නමුත් කියලා නැහැ. මම ඉන් පස්සේ මාධ්‍ය හමුවක් පවත්වලත් මේ ගැන කිව්වා එත් වැඩක් වුණේ නැහැ.”
“ජනාධිපතිවරයාට මේ කරුණු යොමුනොවන්නේ රටේ ජනතාවගේ අභාග්‍යයට. නමුත් ‘අරුණ’ පුවත්පත මෙය වාර්තා කළා. එය ඉන් පස්සේ අනෙක් නාළිකාත් වාර්තා කළා. ඒකෙන් පස්සේ තමයි මේ ගැන අවධානය ආවේ. දැන් එනවා මර්දනය. මේක වාර්තා කරපු එකට තමයි මේ මර්දනය එන්නේ. දැන් මගේ ෆයිල් එකක් අරගෙන ගිහිල්ල කියනවා මන් දන්නේ නැහැ මොකක්ද ෆයිල් එක කියල. නමුත් මම හොරකම් කරලා දුෂණය වංචා කරපු කෙනෙක් නෙමේ ඕනේ එකක් හෙළි කරගන්න මට ඒ ගැන ප්‍රශ්නයක් නැහැ. සියලුම දත්ත ලේඛන මම කියපු දෙවල් මට ඔප්පු කරලා පෙන්වන්න තියනවා. ජනාධිපතිවරයනේ මේ සභාපතිවරයාව පත්කළේ.”
“ඉන්ධන මිල අඩු නොකර සේවකයන්ට බෝනස් දෙන්නේ නැතුව සැප විඳින සංස්ථාවේ නිලධාරින් ගැන තමයි මම හෙළි කළේ. මේ රටේ මිනිස්සු ඇත්ත දැනගන්න ඕනේ. මම කියන්නේ එන්න විවාදයකට සභාපතිවරයා උත්තර දෙන්න. මට ඔහු එක්ක තරහක් නැහැ. ඔහුගේ වැඩපිළිවෙළ එක්කයි ගැටලුවක් තියෙන්නේ. මම කියන්නේ සභාපතිවරයා ආණ්ඩුවට හිතවත් නම් විශේෂ දීමනා ගන්නේ නැතුව. ඔහුට හිමි දේ විතරක් ගන්න එක ඔහු කරන්න ඕනේ. මම ඉල්ලීමක් කරනවා ජනාධිපතිගෙන් ඔබටත් වුවමනා තියනවනම් මාව සිරගත කරන්න. නමුත් සංස්ථාවේ තියෙන සීසීටිවී මකන්න දෙන්න එපා. සීසීටීවීවලින් බලාගන්න පුළුවන් වාහන භාවිත කරන්නේ කවුද කියල. CAB අංක 2355 දරණ බෙන්ස් රථය භාවිත කරන්නේ මේ සභාපති දැන්. ඒ වගේම තව සුඛෝපභෝගී වාහන කිහිපයක් ඔහු ප්‍රමුඛ නිලධාරින් භාවිත කරනවා. නමුත් මොවුන් කිව්වේ වාහන එපා කියලයි. සේවකයන් විඳවනවා මෙයාලා සැප විඳිනවා. මම කියන්නේ සභාපති කළ යුත්තේ තොරතුරු හෙළි කරන අයත් වාර්තා කරන මාධ්‍යත් මර්දනය කරමින් අපරාධ පරීක්ෂණ දෙපාර්තමේන්තුවට ගෙනියනවා කියලා බියවද්දන එක නෙමේ සත්‍ය රටට කියන එක. සත්‍ය හෙළි කිරීම ආණ්ඩුවට අපරාධයක් නම් දඟගෙයි දාන්න එපා මාව එල්ලලා මරන්න.”
සබැඳි පුවත්
