සමාජ ක්‍රියාකාරිකයකු වන ඩෑන් ප්‍රියසාද් වෙඩි තබා ඝාතනය කිරීමට වෙඩික්කරුවන් ලබා දුන්නේ විදෙස්ගත සංවිධානාත්මක අපරාධකරුවකු හා මත්ද්‍රව්‍ය ජාවාරම්කරුවකු වන කංජිපානි ඉම්රාන් බව එම ඝාතනයට අදාළව අත්අඩංගුවට ගත් සැකකරු බස්නාහිර දකුණ අපරාධ කොට්ඨාසය හමුවේ පාපොච්චාරණය කර තිබේ.
මෙලෙස අත්අඩංගුවට ගෙන ඇත්තේ මෙම ඝාතනයේ ප්‍රධානම සැකකරුවන් ලෙස හඳුනාගෙන දැනට ප්‍රදේශවලින් පලාගොස් සැඟව සිටින මීතොටමුල්ලේ බන්දු නමැත්තාගේ සහෝදරයාගේ පුතකු වන දුලාන් මධුසංක නොහොත් ‘දුලා’ නමැති 28 හැවිරිදි අයකි.
එම සැකකරු සන්තකයේ තිබී අයිස් ග්‍රෑම් 05ක් ද සොයාගෙන තිබිණි.
පසුගිය 20 වැනිදා වැල්ලම්පිටිය ප්‍රදේශයේදී තමාට සහ තම මිතුරකුට ඩෑන් ප්‍රියසාද් පහර දී තම ත්‍රිරෝද රථයටද තියුණු ආයුධයකින් ප්‍රහාර එල්ල කර අනර්ථයක් සිදුකළ බවත් ඊට පළිගැනීමක් ලෙස ඔහු ඝාතනය කිරීමට සැලසුම් කළ බවත් සැකකරු පොලිස් ප්‍රශ්න කිරීම් හමුවේ තවදුරටත් පවසා ඇත.
කොළොන්නාව සාලමුල්ල ලක්සඳ සෙවණ මහල් නිවාස සංකිර්ණයේ බී ගොඩනැගිල්ලේ හයවැනි මහලේ නිවසකට පසුගිය (22) රාත්‍රියේ ඇතුළු වූ තුවක්කුකරුවන් දෙදෙනකු විසින් කළ වෙඩි තැබීමකින් සමාජ ක්‍රියාකාරී ඩෑන් ප්‍රියසාද් මිය ගොස් තිබිණි.
මෙම ඝාතනයට අදාළව වැල්ලම්පිටිය පොලිසිය, බස්නාහිර පළාත දකුණ අපරාධ කොට්ඨාසය හා විශේෂ කාර්ය බළකාය පැතිකඩ කිහිපයක් ඔස්සේම පරීක්ෂණ ආරම්භ කළ අතර, එහිදී මෙම ඝාතනයට ඍජුවම සම්බන්ධ සැකකරුවකු පොලිසිය විසින් අත්අඩංගුවට ගෙන ඇත.
මීට අදාළ සැකකරුවන් වන මීතොටමුල්ලේ බන්දු සහ ඔහුගේ පුත්‍රයා වන මාධව සුදර්ශන නමැත්තා අත්අඩංගුවට ගැනීම සඳහා තවමත් පොලිස් පරීක්ෂණ ක්‍රියාත්මක වේ.
වැල්ලම්පිටිය ප්‍රදේශයේදී පසුගිය 20 වැනිදා ඩෑන් ප්‍රියසාද් තමන් හා ගැටුම ඇති කරගැනීමෙන් පසුව අපරාධකරුවකු වන ඩුබායිහී සැඟව සිටින කොළොන්නාවේ ධනුෂ්ක මාර්ගයෙන් කංජිපානි ඉම්රාන් සම්බන්ධ කරගත් බවත් ඉම්රාන්ගේ උපදෙස් මත මෙම ඝාතනය සැලසුම් කළ බවත් සැකකරු පොලිසිය හමුවේ පවසා ඇත.
කොළොන්නාවේ ධනුෂ්ක විසින් කංජිපානි ඉම්රාන් දුරකතන යෙදවුමක් මාර්ගයෙන් සම්බන්ධ කරගත් බවත් 20 වැනිදා වූ පහරදීම ගැන ඔහුගේ උපදෙස් මත (21) වැල්ලම්පිටිය පොලිසියට පැමිණිලි කළ බවත් එම සැකකරු පවා තිබේ.
ඒ අනුව 22 වැනිදා ඩෑන් ප්‍රියසාද් පොලිසියට ගෙන්වා ගෙන ආපසු පිටව යන අවස්ථාවේදී ඔහු ඝාතනය කිරීමට සැලසුම් කර ඇතත් 22 වැනිදා ඩෑන් පොලිසියට නොපැමිණීම හේතුවෙන් එම උත්සාහය ව්‍යාර්ථ වී ඇත.
කෙසේ වෙතත් ඩෑන් ප්‍රියසාද් වැල්ලම්පිටිය සාලමුල්ලේ නිවාස සංකිර්ණයේ සිටින බවට කංජිපානි ඉම්රාන්ට තොරතුරු ලැබී තිබුණු බවත් එම අවස්ථාවේදී ඉම්රාන් දුරකතන ඇමතුමක් මගින් තමා හා සම්බන්ධ වූ බවත් සැකකරු පවසා තිබේ.
කංජිපානි ඉම්රාන් දිවයිනට ගෙන්වන ලෙස හා ඔහුට එරෙහිව අදහස් පළකිරීම සම්බන්ධයෙන් ඩෑන් ප්‍රියසාද් සමග වෛරයෙන් පසුවීම හේතුවෙන් මෙම ඝාතනය සඳහා ඔහු විසින් වෙඩික්කරුවන් ලබාදී ඇති බව විමර්ශනවලදී හෙළිව තිබේ. මාධව සුදර්ශන යනු ඩෑන් ප්‍රියසාද්ගේ බිරියගේ සොයුරිය හා විවාහ වී සිටින පුද්ගලයා බවත් ඔහු හා ඩෑන් අතර කාලාන්තරයක් තිස්සේ වෛරයක් තිබී ඇති බවත් පොලිසිය සඳහන් කළේය.
මේ අතර ඩෑන් ප්‍රියසාද් ඝාතනයට අදාළව ඔහුගේ බිරිඳගේ සහෝදරියකගෙන් ද පොලිසිය ප්‍රකාශ ලබාගෙන ඇත. එහිදී ඇය පවසා ඇත්තේ තමන්ගේ යතුරුපැදිය ඩෑන් ප්‍රියසාද් මැදිහත්වී පසුගිය 22 වැනිදා විකුණාදීම හේතුවෙන් ඉන් ලද මුදලින් සිය නිවසේ මත්පැන් සාදයක් සංවිධානය කළ බවයි.මෙම ඝාතනයට පැය තුනකට පමණ පෙර ඩෑන් පැමිණ තමන් සිය පවුල සමග රාත්‍රියේ පැමිණෙන බව කියා පිටව ගිය බවද ඇය වැඩිදුරටත් පවසා ඇත.
ඝාතනයට ලක්වූ ඩෑන් ප්‍රියසාද්ගේ දේහය බොරැල්ලේ පිහිටි පෞද්ගලික මල් ශාලාවක තැන්පත් කර තිබේ.
පුවත්1 week ago
පුවත්1 week ago
පුවත්6 days ago
පුවත්6 days ago
විදෙස්1 week ago