ඉදිරි ජනාධිපතිවරණය සඳහා අපේක්ෂකයකු වශයෙන් ඉදිරිපත් නොවන බවට ව්‍යවසායක ධම්මික පෙරේරා මහතා ශ්‍රී ලංකා පොදු ජන පෙරමුණේ මහ ලේකම් නීතිඥ සාගර කාරියවසම් මහතාට ලිපියක් යොමු කර ඇත.

පෞද්ගලික හේතුවක් මත තමා ඉදිරිපත් නොවන බව ඔහු එම ලිපියෙන් දැනුම් දී තිබේ.

නාමල්ද? දිනේෂ්ද?

අද දිනයේදී මාධ්‍ය නිවේදනයක් නිකුත් කරමින් ශ්‍රී ලංකා පොදු ජන පෙරමුණ පවසා තිබුණේ හෙට (අගෝස්තු 06) දිනයේදී සිය ජනාධිපති අපේක්ෂකයාව නිල වශයෙන් ප්‍රකාශයට පත්කරන බවයි.

මේ සඳහා උත්සවය හෙට පෙ.ව. 7.00ට පක්ෂ නායක මහින්ද රාජපක්ෂ මහතාගේ මූලිකත්වයෙන් පක්ෂ මූලස්ථානයේදී පැවැත්වීමට නියමිත බවද එම නිවේදනයේ දැක්වේ.

මේ අතර, ජනාධිපති අපේක්ෂකත්වය බාර ගන්නා ලෙස අගමැති දිනේෂ් ගුණවර්ධනට පොහොට්ටු පක්ෂ නායකයින් ගෙන් ඉල්ලීමක් ලැබී ඇති බව ‘ද ලීඩර්’ වෙබ් අඩවියේ දැක්වේ.

අග්‍රාමාත්‍යවරයා එම යෝජනාව ප්‍රතික්ෂේප කර ඇතැයි අගමැති කාර්යාල ආරංචිමාර්ග සඳහන් කරන බව එම වෙබ් අඩවිය වැඩිදුරටත් වාර්තා කරයි.

කෙසේවෙතත්,  ‘ඩේලි මිරර්’ වාර්තා කර ඇත්තේ පොහොට්ටු පක්ෂයේ ජනාධිපති අපේක්ෂකයා ලෙස හෙට දිනයේදී නාමල් රාජපක්ෂ මහතා නම් කිරීමට නියමිත යැයි පක්ෂ නිර්මාතෘ බැසිල් රාජපක්ෂ මහතා සනාථ කළ බවයි.

අද පෙරවරුවේ පාර්ලිමේන්තුව අමතමින් කතානායක මහින්ද යාපා අබේවර්ධන මහතා නිවේදනය කර තිබුණේ මන්ත්‍රී නාමල් රාජපක්ෂ මහතා ජාත්‍යන්තර සබඳතා පිළිබඳ ආංශීක අධීක්ෂණ කාරක සභාවෙන් ඉල්ලා අස්වී ඇති බවයි.

සබැඳි පුවත් :

නාමල් රාජපක්ෂ කාරක සභාවකින් ඉවත් වෙයි