බිත්තර ආනයනය කෙරෙහි යළි අවධානය යොමුව ඇති බව වෙළෙඳ හා වාණිජ කටයුතු අමාත්‍යංශය පවසයි.
වෙළෙඳ හා වාණිජ කටයුතු අමාත්‍යංශය කියා සිටින්නේ මෙරට බිත්තර නිෂ්පාදකයින් විසින් දිගින් දිගටම බිත්තර මිල ඉහළ අගයක පවත්වාගෙන යාම හේතුවෙන් මේ පියවර ගන්නා බවයි.
ඒ සම්බන්ධයෙන් වන විශේෂ සාකච්ඡාවක් හෙට (22) දිනයේ පැවැත්වීමට නියමිත බව වාර්තා වේ.
මෙලෙස බිත්තර මිල නොවෙනස්ව ඉහළ මිලක් පවත්වාගෙන යාම සඳහා නිෂ්පාදකයින් විසින් වෙළෙඳපොළට නිකුත් කරන බිත්තර ප්‍රමාණය සීමා කිරීමට කටයුතු කරන බවටත් මේ වන විට චෝදනා එල්ලවී තිබේ.
එමෙන්ම බිත්තර නිෂ්පාදනය පාලනය කිරීම සඳහා සතුන් මස් පිණිස අලෙවි කිරීම ද සිදුකරන බවට ද තොරතුරු වාර්තා වී ඇත.
බිත්තර නිෂ්පාදකයින් මේවන විට බිත්තරයකින් රුපියල් 25ක පමණ ලාභයක් ගන්නා බවයි පැවසෙන්නේ.
පසුගිය කාලයේදී රජයේ මැදිහක්වීමෙන් ඉන්දියාවෙන් බිත්තර ආනයනය කිරීම සිදු කළ අතර ඉන්දිය බිත්තරයක් අලෙවි කරනු ලැබුවේ රුපියල් 46ක් වැනි මුදලකටය.
මේ අතර, කුකුළු මස්හා බිත්තර ආශ්‍රිත නිෂ්පාදන චීනයට අපනයනය කිරීම සඳහා පැවති බාධක ඉවත්ව ඇති බව කෘෂිකර්ම අමාත්‍යාංශය සඳහන් කර තිබේ.
එම අමාත්‍යාංශය කියා සිටියේ, මහජන චීන සමූහාණ්ඩුවේ රේගු පරිපාලනය පිළිබඳ උප අමාත්‍යවරයා ඇතුළු නිලධාරීන් පිරිසක් සමග පැවති සාකච්ඡාවකදී මෙම බාධක ඉවත් කිරීමට එකඟවූ බවයි.
මීට අමතරව අන්නාසි ආශ්‍රිත නිෂ්පාදන ද චීන වෙළඳපොළ වෙත යොමු කිරීමට අවසර හිමිව ඇති බවද කෘෂිකර්ම අමාත්‍යංශය.
වෙළෙඳ හා වාණිජ කටයුතු අමාත්‍යවරයා ලෙස නලින් ප්‍රනාන්දු මහතා ද කෘෂිකර්ම අමාත්‍යවරයා ලෙස මහින්ද අමරවීර මහතා ද කටයුතු කරනු ලබයි.
නලින් මහතා පාර්ලිමේන්තුවට තේරීපත්වූයේ ශ්‍රී ලංකා පොදුජන පෙරමුණ නියෝජනය කරමින් වන අතර අමරවීර මහතා පාර්ලිමේන්තුවට තේරීපත්වූයේ ශ්‍රී ලංකා නිදහස් පක්ෂය නියෝජනය කරමිනි.
