සමුද්‍රීය ආරක්ෂාව සහ සයිබර් ආරක්ෂාව ඇතුළු තොරතුරු හුවමාරු කරගැනීම ඇතුළු කාරණා රැසක් සම්බන්ධව ඉන්දියාව සහ ශ්‍රී ලංකාව අතර ඉකුත් මාසයේදී අත්සන් කරන ලද ආරක්ෂක සහයෝගිතා ගිවිසුමේ තොරතුරු economy next වෙබ් අඩවිය විසින් එළි දක්වා ඇත.

ශ්‍රී ලංකාව වෙනුවෙන් මෙම ගිවිසුමට ආරක්ෂක ලේකම් එයාර් වයිස් මාර්ෂල් (විශ්‍රාමික) සම්පත් තුයියකොන්තා සහ මෙරට ඉන්දියානු තානාපති සන්තුෂ් ජා විසින් අත්සන් කරන ලදි.

economy next වෙබ් අඩවිය දක්වා ඇති පරිදි මෙම ගිවිසුම පිටු 09 කින් යුතු අතර එය වගන්ති 12 කින් යුතුය.

ඉන්දියාව සමග අත්සන් කරන ලද ආරක්ෂක ගිවිසුමේ ඇතුළත් කාරණා සම්බන්ධව මාධ්‍යවේදීන් පසුගිය දිනවල කැබිනට් මාධ්‍ය හමුවේදී රජයේ කැබිනට් මාධ්‍ය ප්‍රකාශක, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතාගෙන් කරන ලද විමසීමේදී කියා සිටියේ තොරතුරු දැන ගැනීමේ පනත යටතේ (RTI) අදාළ තොරතුරු ලබා ගත හැකි බවය.

දිගින් දිගටම වැසි සහිත අයහපත් කාලගුණික තත්ත්වය නිසා මේ වසරේදී ලුණු කැටයක්වත් නිෂ්පාදනය කිරීමට නොහැකිවූ බව ලංකා ලුණු සමාගමේ සභාපති ඩී.නන්දනතිලක මහතා කියයි.

හම්බන්තොට පමණක් නොව අලි මංකඩ ඇතුළු ලුණු නිෂ්පාදනය කරන සෑම ස්ථානයකටම මෙම අයහපත් කාලගුණික තත්ත්වය බලපා තිබෙන බවද ඔහු කීවේය.

මෙම තත්ත්වය බරපතළ වූයේ ඉකුත් වසරේදී (2024) බවත්, ලංකා ලුණු සමාගම ඉකුත් වසරේදී මෙට්‍රික් ටොන් 125,000 ක ලුණු තොගයක් නිෂ්පාදනය කිරීමට ඇස්තමේන්තු කළද, නමුත් අයහපත් කාලගුණික තත්ත්වය නිසා නිෂ්පාදනය කිරීමට හැකි වූයේ මෙට්‍රික් ටොන් 40,000ක් පමණක් බවද සභාපතිවරයා පැවසීය.

සාමාන්‍යයෙන් සෑම වසරකම මාර්තු මාසයේදී ලුණු කැඩීම ආරම්භ කළද, අයහපත් කාලගුණික තත්ත්වය ඊට බාධාවක් වූ බවද ඔහු කීවේය.

වෙළෙඳපොළේ කැට ලුණුවල යම් හිඟයක් පැවැතියත් මේස ලුණුවල අඩුවක් නොමැති බවද ඔහු කීවේය.

ලංකා සතොසට ලංකා ලුණු සමාගම විසින් මේස ලුණු ග්‍රෑම් 400 ඇසුරුම් ලක්ෂයක් පෙරේදා (14 වැනිදා) දිනයේත් නිකුත් කිරීමට කටයුතු කළ බවත්, ඊයේ (15 වැනිදා) දිනයේදී තවත් ඇසුරුම් ලක්ෂයක් නිකුත් කිරීමට කටයුතු යොදා තිබූ බවත් සභාපතිවරයා කියා සිටියේය.

මූලාශ්‍රය – අරුණ 

ලුණු පැකට් එකක් රුපියල් හැටක් වීමට වසර 76 ගියත් ලුණු පැකට් එක රුපියල් හාරසිය කිරීමට මේ ආණ්ඩුවට මාස හතෙන් හැකි වී ඇති බව ජාතික නිදහස් පෙරමුණේ නායක විමල් වීරවංශ මහතා කියයි.

ඔහු මේ බව ප්‍රකාශ කළේ ඊයේ (15) කොළඹ ජාතික නිදහස් පෙරමුණ කාර්යාලයේදී පැවැත් වූ මාධ්‍ය හමුවට එක්වෙමිනි.

මෙම මාධ්‍ය හමුවේදී ජාතික නිදහස් පෙරමුණේ නායක විමල් වීරවංශ මහතා වැඩිදුරටත් මෙසේද අදහස් දැක්වීය.

“ වසර 76ක් ගියා ලුණු පැකට් එකක් රුපියල් හැට වෙන්න. මාස හතකින් හැටේ තිබුණු ලුණු පැකට් එක රුපියල් 350යි 400යි. මේක තමයි පුනරුදයේ රඟ. අර හේවගේ කියනවා තිබුණු ආණ්ඩුව වගකියන්න ඕනලු. උන්දැගෙ නෝනට බබෙක් හම්බෙන්න හිටියත් තිබුණු ආණ්ඩුව වගකියන්න ඕනලු. තිබුණු ආණ්ඩුවට තමයි ඒකෙ බිල දාන්නේ. හොඳ වෙලාවට එහෙම එකක් නැහැ. නැත්නම් කරුමෙට වගකියන්න ඕන තිබිච්ච ආණ්ඩුව. මේක පුදුම විහිළුවක් ආණ්ඩුවේ ගොබිලෝ කියන්නේ තිබුණු ආණ්ඩු මේවට වගකියන්න ඕන කියලා. අර හඳුන්නෙත්ති විවෘත කරපු කර්මාන්තශාලාව කෝ වැහිලද. මේ ආණ්ඩුවට අද වෙලා තියෙන්නේ අද ගුරුපත්වීම ගත්තු මිනිහට ප්‍රින්සිපල්කමක් දුන්නා වගෙ වැඩක්.” 

මේ යෝධයෝ ලුණු පැකට් එකෙනුත් මාටියා ගහනවා

“ හාල්වලින්, ලුණු පැකට්වලින් මාටියා ගහපු ආණ්ඩු දැකලා නැහැ. මේ යෝධයෝ ලුණු පැකට් එකෙන් මාටියා ගහනවා. මේ ආණ්ඩුව අලුතෙන් කිසිම තීරණයක් නොගන්න ආණ්ඩුවක්. හාල් මිල පාලනය කරන්න කියලා සතොස දැම්ම ටෙන්ඩර් හතරම අවලංගුයිනේ. ඒ පුද්ගලික හාල්මෝල් හිමියන්ට ඇති පදමට ගෙන්න ගන්න.  ටෙන්ඩරේ දැම්මෙම අවලංගු වෙන්න. හාල් ලාබේ කොහාටද ගෙවිලා යන්නෙ. කවුද ඒ කොටස ගිලගන්නෙ. කන්ටේනර් තුන්සිය ගානෙන් ගහපු මාටියා ගැහිල්ල අපි කවුරුත් දන්නෙ නැහැ. රතු ලැයිස්තුවේ තිබුණු ඒවා කවුරුත් දන්නෙ නැහැ. මේ මාටියා ගැහිල්ල කලේ ඉංග්‍රීසියෙන්. අනිත් එවුන් කළේ සිංහලෙන්. අනුන්ගේ ඕපදූප හොය හොය ඉන්න ළිඳ සංගමයේ ආණ්ඩුවක් මේක. වෙන වැඩක්නම් මුන්දැලා දන්නෙ නැහැ. නැත්නම් ලුණු පැකට් එකක් හොයාගන්න බැරි මට්ටමට යනවද. ලුණුවලින් තොර ආහාර පරිභෝජන රටාවකට ජන සමාජය අරගෙන ගිහිල්ලා පුනරුදයේ පිහිටෙන් අධික රුධිර පීඩනය තුරන් කිරීමේ සෞඛ්‍ය සම්පන්න අනාගතයක් කරා ශ්‍රී ලංකාව ගමන් කරනවා. සාදු සාදු කියලා තමයි අපිට කියන්න තියෙන්නේ.”