Connect with us

පුවත්

නුවරඑළියේ රක්ෂිත වලට යාම හා කඳු තරණය තහනම් කරයි

Published

on

නුවරඑළිය දිස්ත්‍රික්කය තුළ පිහිටි වනජීවි සහ වන සංරක්ෂණ රක්ෂිත වලට මින් ඉදිරියට ඇතුළුවීම හෝ එම කඳු තරණය කිරීම සහ කඳවුරු බැදීම අද (04) දින සිට සපුරා තහනම් කර තිබේ.

අද පැවති මාධ්‍ය හමුවකදී නුවරඑළිය දිස්ත්‍රික් ලේකම් නන්දන ගලබඩ මහතා මේ බව අවධාරණය කළේය.

තලවකැලේ ග්‍රේට් වෙස්ටර්න් කඳු මුදුණේ අභිරහස් ලෙස මියගොස් සිටි හඳුනා නොගත් කාන්තා මළසිරුරක් හමුවීමෙන් අනතුරුව මෙම තීරණයට එළැඹ ඇත.

වනජීවි දෙපාර්තුමේන්තුව, වන සංරක්ෂණ දෙපාර්තුමේන්තුව සහ පොලීසියේ නිලධාරින් සමග අද නුවරඑළිය දිස්ත්‍රික් ලේකම් කාර්යාලයේ පැවති විශේෂ සාකච්ඡාවකින් අනතුරුව මෙම තීරණය ගත් බව ඒ මහතා වැඩිදුරටත් පැවසීය.

“පසුගිය දිනයක නුවරඑළිය ග්‍රේට් වෙස්ටර්න් කඳු මුදුණ ආශ්‍රිතව කාන්තාවක් මියයාමේ සිද්ධිය පදනම් කරගනිමින් අද දවසේ වනජීවි දෙපාර්තමේන්තුව, වන සංරක්ෂණ දෙපාර්තමේන්තුව සහ නුවරඑළිය පොලිස් නිලධාරීන් එකතුව සාකච්ඡා කරලා තීරණයක් ගත්තා මින් ඉදිරියට වන සංරක්ෂණ දෙපාර්තමේන්තුවට, වනජීවි දෙපාර්තමේන්තුවට අයිති ප්‍රදේශවල සංචාරය කරනවා නම්, කඳු නගිනවා නම් ඒ පිරිස් මූලික වශයෙන් තමන්ගේ නම, ගම, හැඳුනුම්පත, දුරකථනය අංකය සහ අදාළ විස්තර අඩංගු ඉල්ලුම්පත්‍රයක් අදාළ ආයතනවලට යොමු කිරීමෙන් අවසර ලබා ගන්න ඕනේ. ඉන් අනතුරුව එය ආසන්නතම පොලීසියට ඉදිරිපත් කරලා පොලිස්තානයෙත් එකඟතාවය ලබාගැනීමෙන් අනතුරුව සංචාරය කිරීම හෝ කඳු නැගීම කරන්න පුළුවන්. පසුව එම ගමන අවසන් කරලා පොලිස්තානය වෙත පැමිණිමට අපහසුතාවයක් තිබේනම් දුරකථන මාර්ගයෙන් හෝ ඒ ගමන අවසන් කළ බව දැණුම් දෙන්න ඕනේ. එසේ නොවන ඕනෑම කෙනෙක් වනජීවි කලාපය හෝ වන සංරක්ෂණ කලාපය තුළ සංචාරය කරනවා නම් ඒ අයට අදාළ ආයතන වලට තිබෙන නීති වලට අනුව අත්අඩංගුවට ගැනීම කරන්න කියලා අදාළ ආයතන දැනුම්දීලා තියෙනවා.”

(නිවුස්රේඩියෝ)

පුවත්

විකිරණ යන්ත්‍රය ඇණහිටීමෙන් ගාල්ලේ පිළිකා රෝගීන් විශාල අර්බුදයක

Published

on

By

ගාල්ල ජාතික රෝහලේ පිලිකා ඒකකයේ ලීනියර් ඇක්සලරේටර් පිලිකා විකිරණ ප්‍රතිකාර කටයුතු ඇණහිට ඇති බව වාර්තා වේ.

රජයේ විකිරණ විද්‍යා තාක්ෂණවේදීන්ගේ සංගමය විසින් පෙන්වා දෙන්නේ  දිවයින පුරා රෝහල් වල තිබෙන යන්ත්‍ර දහයෙන් තවත් 4ක් අර්බුදයේ පවතින බවය.

පසුගිය බදාදා  සිට (23.04.2025) ගාල්ල ජාතික රෝහලේ පිළිකා ඒකකයේ රෝගීන් සඳහා විකිරණ ප්‍රතිකාර සිදු කරන ලීනියර් ඇක්සලරේට යන්ත්‍රය රෝගීන්ගේ ප්‍රතිකාර කටයුතු සම්පූර්ණයෙන්ම නවතා දමා ඇත.

රජයේ විකිරණ විද්‍යා තාක්ෂණවේදීන්ගේ සංගමයේ සභාපති චානක ධර්මවික්‍රම මහතා සඳහන් කලේ මීට හේතු වී ඇත්තේ යන්ත්‍රය ස්ථාපනය කර තිබෙන ඒකකයේ සිසිලන පද්ධතියේ ඇතිවී තිබෙන දෝෂය බවය.

සම්පූර්ණ දකුණු පළාතටම තිබෙන එකම විකිරණ ප්‍රතිකාර යන්ත්‍රය මෙම රෝහලේ ස්ථාපනය කර තිබෙන අතර මෙම තත්ත්වය හේතුවෙන් ඉතා විශාල රෝගීන් ප්‍රමාණයකගේ පිළිකා තත්ත්වයන් සඳහා වන විකිරණ ප්‍රතිකාර  සම්පූර්ණයෙන්ම අඩපණ වීී ඇත.

නවීන තාක්ෂණයෙන් යුතු වූ ලීනියර් ඇක්සලරේට යන්ත්‍රය සඳහා උෂ්ණත්වය සහ ආර්ද්‍රතාව පාලනය කළ යුතු අතර ඒ සඳහා වායු සමීකරණ යන්ත්‍ර සහ සිසිලන යන්ත්‍ර (Chiller) භාවිතා කරනු ලැබේ. උෂ්ණත්වය සහ ආර්ද්‍රතාව ප්‍රශස්ත මට්ටමේ නොපවතින්නේ නම් යන්ත්‍රයෙන් ප්‍රතිකාර කටයුතු සිදුකළ නොහැකි වේ. මේ වන විට ලීනියර්  ඇක්සලරේට යන්ත්‍රයක වටිනාකම රුපියල් කෝටි 80 කට ආසන්න වෙයි.

ලංකාවේ රෝහල් පද්ධතිය තුළ ඊනියා ඇක්සලරේට විකිරණ ප්‍රතිකාර යන්ත්‍ර 10 ක් රෝගීන්ට ප්‍රතිකාර කටයුතු සඳහා ස්ථාපනය කර තිබෙන අතර ඉන්
අපේක්ෂා රෝහලේ යන්ත්‍ර 5ක්, මහනුවර ජාතික රෝහලේ යන්ත්‍ර 2ක් සහ ගාල්ල ජාතික රෝහල, යාපනය ශික්ෂණ රෝහල , මඩකලපුව ශික්ෂණ රෝහල යන රෝහල්වල යන්ත්‍ර එක බැගින් ස්ථාපනය කර ඇත.

රජයේ විකිරණ විද්‍යා තාක්ෂණවේදීන්ගේ සංගමය විසින් සඳහන් කරන පරිදි මේ වනවිට එම යන්ත්‍ර වලින් අපේක්ෂා රෝහලේ යන්ත්‍ර 1 , මඩකලපුව ශික්ෂණ රෝහල සහ යාපනයේ ශික්ෂණ රෝහල යන රෝහල් දෙකෙහි තිබෙන යන්ත්‍රද එම යන්ත්‍ර ස්ථාපනය කර තිබෙන ගොඩනැගිලිවල වායු සමීකරණ සහ සිසිලන පද්ධතියේ තිබෙන දෝෂ හේතුවෙන් බරපතල අර්බුදයන්ට ලක්වී ඇත.

එම යන්ත්‍ර පසුගිය කාලය පුරාම දිගින් දිගටම වරින් වර බිඳ වැටීම දැකිය හැකි විය.

මෙම බිඳ වැටීම් සඳහා  හේතු වී ඇත්තේ එම යන්ත්‍ර සඳහා උෂ්ණත්වය සහ ආර්ද්‍රතාව නිසි තත්ත්වයේ පවත්වා නොගැනීමයි. මෙම තත්ත්වය හේතුවෙන් යන්ත්‍රවල කල්පැවැත්ම බලවත් තර්ජනයට ලක් වී ඇති අතරම වරින් වර බිඳ වැටීමහේතුවෙන් රෝගීන්ගේ ප්‍රතිකාර කටයුතුද අඛණ්ඩව පවත්වාගතත නොහැකිව වරින් වර නවතා දැමීමට සිදුවී ඇත.

මෙම යන්ත්‍රවල තිබෙන දෝෂයන් සම්බන්ධයෙන් අදාළ සියලු පාර්ශවයන් නිසි පරිදි දැනුවත් කර ඇතත් එම සිසිලන පද්ධතිය සහ වායු සමීකරණ පද්ධතියේ නඩත්තුව සහ සේවා සැපයීම මේ වන විටත් නිසි පරිදි සිදු කිරීමට අදාල බලධාරීන් අපොහොසත් වී ඇති බව පවසන රජයේ විකිරණ විද්‍යා තාක්ෂණවේදීන්ගේ සංගමය පෙන්වා දෙන්නේ මෙම තත්ත්වය දිගින් දිගටම පැවතිය හොත් ඉතා ඉහළ මිලකින් යුතු මෙම නවීන යන්ත්‍ර වල ආයු කාලය අඩුවන අතර රෝගීන්ගේ ප්‍රතිකාර කටයුතුද අඛන්ඩව පවත්වා ගැනීමට නොහැකි වනු ඇති බවය. විකිරණ ප්‍රතිකාර සඳහා පිළිකා රෝගීන් මාස කීපයක පොරොත්තු ලේඛනවලද රැදී සිටින අතර මෙම වරින් වර යන්ත්‍ර බිඳ වැටීම් හමුවේ එම පොරොත්තු ලේඛන තවදුරටත් ප්‍රමාද වෙන තත්ත්වයක් මේ සමඟ නිර්මාණය වී තිබේ.

රෝගීන්ට විකිරණ ප්‍රතිකාර පෞද්ගලික අංශයෙන් සිදුකර ගැනීම සඳහා ලක්ෂ 5 සිට 17 ක මුදලක් වැය කිරීමට සිදුවන අතර එය මේ රටේ සිටින බහුතර පිලිකා රෝගී ජනතාවකට දැරිය හැකි මට්ටමක නොපවතින්නකි.

Continue Reading

පුවත්

ශ්‍රී ලංකාව ඇමරිකාවට මුහුණ දියයුතු ආකාරය IMF කියාදෙයි

Published

on

By

මෑතකාලීනව එක්සත් ජනපද ජනාධිපතිවරයා විසින් ප්‍රකාශයට පත්කරන ලද තීරුබදු වෙනස්කම්, ශ්‍රී ලංකාවේ ආර්ථික පුරෝකථනයන්ට අභියෝගාත්මක තත්ත්වයක් නිර්මාණය කර ඇති පසුබිමක පවා, ශ්‍රී ලංකාව තම අපනයන වෙළෙඳපොළ විවිධාංගීකරණය කිරීම, ස්ථාවරත්වය සහ වර්ධනය පවත්වා ගැනීම සඳහා ආයෝජන හිතකාමී පරිසරයක් නිර්මාණය කිරීම කෙරෙහි අවධානය යොමු කළ යුතු බව ජාත්‍යන්තර මූල්‍ය අරමුදලේ ආසියා සහ පැසිෆික් දෙපාර්තමේන්තුවේ අධ්‍යක්ෂ ක්‍රිෂ්ණා ශ්‍රීනිවාසන් මහතා පවසයි.

මේ වන විට එක්සත් ජනපදයේ වොෂිංටන් හි පැවැත්වෙන ජාත්‍යන්තර මූල්‍ය අරමුදලේ සහ ලෝක බැංකුවේ 2025 වසන්ත රැස්වීම් (2025 Spring Meetings) හි ඊයේ (24) පැවති Regional Economic Outlook – Asia and Pacific සැසියේදී ඔහු මේ බව පැවසීය.

මෙහිදී වැඩිදුරටත් අදහස් දැක්වූ ජාත්‍යන්තර මූල්‍ය අරමුදලේ ආසියා සහ පැසිෆික් දෙපාර්තමේන්තුවේ අධ්‍යක්ෂ ක්‍රිෂ්ණා ශ්‍රීනිවාසන් මහතා,

“ඉතා මෑතක දී ජාත්‍යන්තර මූල්‍ය අරමුදලේ කණ්ඩායමක් ශ්‍රී ලංකාවේ සංචාරය කළා. නව තීරුබදු ප්‍රකාශයට පත්වෙද්දී පවා ඔවුන් ශ්‍රී ලංකාවේ බලධාරීන් සමඟ සාකච්ඡා කරමින් සිටියේ. එම වාතාවරණය තුළ ලැබී තිබුණු කාලය තීරුබදු බලපෑම සහ ආර්ථිකයේ වර්ධනයට බලපාන ආකාරය පිළිබඳ සාර්ව ආර්ථික රාමුවක් සකස් කිරීමට තරම් ප්‍රමාණවත් වුණේ නැහැ. අපගේ කණ්ඩායම නැවත පැමිණි පසුවත් ඒ සම්බන්ධයෙන් සාකච්ඡා දිගටම කරගෙන ගියා.”

“පුළුල් වශයෙන් බැලුවහොත් ශ්‍රී ලංකාව විශාල වශයෙන් තීරුබදු බලපෑමට ලක්වූ රටක් බව කිව හැකියි. ඇඟලුම් කර්මාන්ත අංශයට ඉන් ඇතිවිය හැකි බලපෑම විශාලයි. තවත් අංශවලට එය බලපානවා. තීරුබදු බලපෑම විශාල වශයෙන් එල්ල විය හැකි රටවල් අතරට ශ්‍රී ලංකාව හොඳ උදාහරණයක්. ශ්‍රී ලංකාව පමණක් නොව, මෙම බලපෑමට හසුවිය හැකි අනෙකුත් රටවල් මේ අවස්ථාවේ දී ඔවුන්ගේ අපනයන වෙළෙඳපොළ විවිධාංගීකරණය, කලාපය තුළ මනා සමෝධානයක් පවත්වා ගැනීම ආදිය හරහා ඇතිවිය හැකි බලපෑම අවම කිරීමට උපකාරී විය හැකියි.”

“එතැනින් ඒහාට ගියොත්, ශ්‍රී ලංකාවේ ආයෝජන ඉහළ නංවා ගැනීම සඳහා පරිසරයක් නිර්මාණය කළ යුතුවෙනවා. එය බදු නිදහස් කිරීම් හරහා කරන දිරිගැන්වීම්වලින් නොවිය යුතුයි. අනිවාර්යයෙන්ම ශ්‍රී ලංකාවේ මූල්‍ය ඒකාබද්ධතාවය හා මූල්‍ය විනය අඛණ්ඩව පවත්වා ගෙන යා යුතු වෙනවා. එම තත්ත්වයන් නොවෙනස්ව පවත්වා ගනිමින් පෞද්ගලික ආයෝජන දිරිගැන්වීම සඳහා අවශ්‍ය පරිසරය සකස් කර දීමෙන් ආයෝජන ප්‍රවර්ධනයට කටයුතු කළ යුතුයි.”

Continue Reading

පුවත්

ජනපති හදිසියේම මහනුවරට යයි

Published

on

By

සිරි දළදා වන්දනාවට සහභාගීවීමට පෝලිම්වල රැඳීසිටින ජනතාව හමුවීම සඳහා ජනාධිපති අනුර කුමාර දිසානායක මහතා ඊයේ (24) රාත්‍රියේ හදිසියේ එම ප්‍රදේශයේ සංචාරයක නිරතවුණි.

සිරි දළදා වන්දනාවට එක්වීම වෙනුවෙන් ලක්ෂ සංඛ්‍යාත සැදැහැවතුන් පිරිසක් මේ වනවිටත් දිගු පෝලිම්වල රැඳී සිටී.

එම ජනතාවගේ අවශ්‍යතා විමසා බැලීම සඳහා ජනාධිපති අනුර කුමාර දිසානායක මහතා ඊයේ රාත්‍රියේ මෙලෙස ස්ථාන කිහිපයක සංචාරය කර තිබේ.

මේ අතර පෝලීම්වල රැඳී සිටින ජනතාව වෙනුවෙන් ඊයේ රාත්‍රියෙත් දන්සල් ක්‍රියාත්මක කෙරුණි.

සිරි දළදා වන්දනාව අද (25) 8වන දිනටත් පැවැත්වීමට නියමිතය.

ඒ අනුව සිරි දළදා වන්දනාව පෙරවරු 11 සිට ආරම්භ කෙරෙනු ඇත.

බලධාරීන් ජනතාවගෙන් ඉල්ලා සිටින්නේ මේ වනවිටත් මහනුවර ප්‍රදේශයට ලක්ෂ 4ක සැදැහැවතුන් පිරිසක් පැමිණ ඇති බැවින් අද දිනයේත් මහනුවරට නොපැමිණෙන ලෙසය.

Continue Reading
Advertisement

Trending

Copyright © 2023 Sri Lanka Mirror. All Rights Reserved