පරිපූරක වෛද්‍ය සේවයට අයත් වෛද්‍ය රසායනාගාර වෘත්තිකයින් සහ භෞත චිකිත්සක වෘත්තිකයින් ආරම්භ කළ වැඩවර්ජනය අද (28) උදෑසන 8.00ට තාවකාලිකව අත්හිටුවන බව පරිපූරක වෛද්‍ය වෘත්තියවේදීන්ගේ ඒකාබද්ධ බල මණ්ඩලයේ සභාපති රවීකුමුදේශ් මහතා පවසයි.

ඔහු පැවසුවේ ඊයේ (27) රාත්‍රියේ පැවති සාකච්ඡාවකින් අනතුරුව මෙම තීරණයට එළඹි බවය .

මේ අතර පරිපූරක වෛද්‍ය වෘත්තීයවේදීන්ගේ  ඒකාබද්ධ බල මණ්ඩලයේ ලේකම් චානක ධර්මවික්‍රම මහතා සඳහන් කලේ,

පරිපූරක වෛද්‍ය සේවාවට අයත් වෛද්‍ය රසානාගාර විද්‍යාඥ වෘත්තිකයන් සහ  භෞතචිකිත්සක වෘත්තිකයන් ආරම්භ කළ වෘත්තිය ක්‍රියාමාර්ගය අද  උදෑසන 8 ට තාවකාලිකව අත්හිටුවීමට ඊයේ රාත්‍රියේ රැස්වූ පරිපූරක වෛද්‍ය සේවාවට අයත් සියලු වෘත්තීය සංගම් නායකයන්ගේ රැස්වීමේදී තීරණය කළා අතර මෙම තීරණය ගැනීමට ඊයේ දවසේ අභියාචනාධිකරණය විසින් නිකුත් කරන ලද තීන්දුවද හේතු  වූ බවය.

නිවේදනයක් නිකුත් කරමින් වැඩිදුරටත් අදහස් දැක්වූ ලේකම්වරයා,

ඊයේ දවසේ රැස්වූ සියලු වෘත්තීය සමිති නායකයන් මෙම ගැටලුවට සෞඛ්‍ය අමාත්‍යාංශ බලධාරීන් විසඳුම් ලබා නොදෙන්නේ නම් ලබන සතියේදී ඒකාබද්ධ වෘත්තීය සමිති ක්‍රියාමාර්ගයකට අවතීරණය වීමට එකඟතාවය පළ කළ අතර හෙට දිනයේ දී මේ පිළිබඳව වැඩිදුර සාකච්ඡා කිරීමට නැවත සියලු වෘත්තිය සමිති නායකයන් කැඳවීමට තීරණය කරන ලද බව ද සඳහන් කලේය.

කෙසේ නමුත් මෙම පරිපූරක වෛද්‍ය සේවාවට අයත් උපාධිධාරීන් රාජ්‍ය සේවයට බඳවා ගැනීමේ  ගැටලුව සම්බන්ධයෙන් නිසී විසඳුමක් ලබා නොදෙන්නේ නම් ඉදිරියේදී තවදුරටත් සෞඛ්‍ය සේවාව තුළ වර්ජන ක්‍රියාමාර්ග ක්‍රියාත්මක වීම නොවැළැක්විය හැකි බව ප්‍රකාශ කරන අතරම සෞඛ්‍ය ඇමතිවරයා ඇතුළු සෞඛ්‍ය බලධාරීන් සාකච්ඡා මාර්ගයෙන් ගැටළු විසඳීම මගහැරමින් මේ ආකාරයෙන් කටයුතු කිරීම බරපතල තත්ත්වයක් බවද ප්‍රකාශ කර සිටි.

මේ පිළිබඳව ජනාධිපතිතුමාගේ  මැදිහත්වීම අත්‍යවශ්‍ය බව ප්‍රකාශ කරන අතරම එසේ නොවන්නේ නම් සෞඛ්‍ය සේවාව තවදුරටත් බරපතල අර්බුදයන්ට ලක්වීම වළක්වා ගත නොහැකි වන බව මේ අනුව පැහැදිලි වන බවද එම නිවේදනයේ සඳහන්ය.

සබැඳි පුවත්