වර්තමාන ආර්ථික තත්ත්වය සහ මහබැංකුවේ කාර්ය භාරය සම්බන්ධයෙන් සියලු මන්ත්‍රිවරුන් දැනුම්වත් කිරීම සඳහා පාර්ලිමේන්තුවේ ඊයේ (03) කැඳවා තිබූ සාකච්ඡාවට පැමිණ සිට ඇත්තේ ආණ්ඩු පක්ෂය හා විපක්ෂය නියෝජනය කරමින් රාජ්‍ය ඇමැතිවරු දෙදෙනෙක් සහ මන්ත්‍රිවරු සිවුදෙනෙක් පමණක් බව වාර්තා වේ.

කථානායක මහින්ද යාපා අබේවර්ධනගේ ප්‍රධානත්වයෙන් පැවැති මෙම සාකච්ඡාවට මහබැංකු අධිපති ආචාර්ය නන්දලාල් වීරසිංහ මෙන්ම පාලක මණ්ඩලයේ සහ මුදල් ප්‍රතිපත්ති මණ්ඩලයේ සාමාජිකයෝ ද එක්ව සිට ඇත.

මෙම සාකච්ඡාව කැඳවා තිබුණේ මහ බැංකුවේ කර්තව්‍ය සම්බන්ධයෙන් සෑම මාස හතරකටම වරක් පාර්ලිමේන්තුව විසින් හෝ එහි යම් කමිටුවක් විසින් විමසනු ලැබිය යුතු බවට වන පාර්ලිමේන්තුව සම්මත කර තිබෙන නව නීතිය අනුවය. 

මේ සම්බන්ධයෙන් පසුගිය සතිය පුරාම සියලු මන්ත්‍රිවරු දැනුවත් කිරීමට ද පාර්ලිමේන්තුව පියවර ගෙන තිබිණි.

එහෙත් ඊයේ පැවැති සාකච්ඡාවට සහභාගි වී ඇත්තේ ආචාර්ය සුරේන් රාඝවන් සහ අශෝක ප්‍රියන්ත යන රාජ්‍ය ඇමැතිවරු සහ කොළඹ දිස්ත්‍රික් මන්ත්‍රි ප්‍රේමනාත් සී. දොළවත්ත, අනුරාධපුර දිස්ත්‍රික් මන්ත්‍රි වීරසේන ගමගේ, කළුතර දිස්ත්‍රික් මන්ත්‍රි අනුප පැස්කුවල්, පත් කළ මන්ත්‍රි ඒ.එච්.එම්. ෆවුසි හා විපක්ෂය නියෝජනය කරමින් මාතර දිස්ත්‍රික් මන්ත්‍රි වීරසුමන වීරසිංහ යන මහත්වරුන් පමණි.

විදේශීය පෞද්ගලික ණය හිමියන් සමග පවතින ඇමරිකානු ඩොලර් බිලියන 12.5ක් වන ණය ප්‍රතිව්‍යුහගත කිරීම පාර්ලිමේන්තුවේ අනුමැතියකින් තොරව සිදුකිරීමට සුදානමක් පවතින බව මෙහිදී අනාවරණය වී තිබේ. 

එම ණය වෙනුවෙන් සියයට විසි හතරක් තරම් විශාල පොලියක් ගෙවීමට සිදු වන බව මෙම අවස්ථාවේ දී අදහස් දක්වා ඇති මන්ත්‍රි වීරසුමන වීරසිංහ මහතා සඳහන් කර ඇත. 

ඒ සඳහා පාර්ලිමේන්තුවේ අනුමැතිය ලබා නොගැනීම බරපතළ තත්ත්වයක් බව ද විදේශීය ණය ප්‍රතිව්‍යුහගත කිරීමට අදාළ යෝජනාව පාර්ලිමේන්තුවට ඉදිරිපත් කර සම්මත කර ගත් ආකාරයට මෙම පෞද්ගලික ණය හිමියන්ගේ ණය ප්‍රතිව්‍යුහගත කිරීමේ යෝජනාවත් අනිවාර්යයෙන්ම පාර්ලිමේන්තුවට ඉදිරිපත් කර සම්මත කර ගත යුතු බව මන්ත්‍රිවරයා අවධාරණය කර තිබේ. 

එම යෝජනාව රාජ්‍ය ඇමැති ආචාර්ය සුරේන් රාඝවන් ද අනුමත කර ඇත.

ඒ සම්බන්ධයෙන් තීරණ ගන්නේ මහබැංකුව නොව මුදල් අමාත්‍යාංශය යැයි ඊට ප්‍රතිචාර වශයෙන් මහැබංකු අධිපතිවරයා පවසා තිබේ.

ඇතැම් දේශපාලන පක්ෂ පවසන ආකාරයට ජාත්‍යන්තර මූල්‍ය අරමුදල සමග ඇති කරගෙන තිබෙන එකඟතාවන් වෙනස් කිරීමට හැකියාවක් පවතින්නේ ද යන්න හා එසේ කළහොත් ඇතිවිය හැකි බලපෑම සම්බන්ධයෙන් රාජ්‍ය ඇමැති ආචාර්ය සුරේන් රාඝවන් කළ ප්‍රශ්න කිරීමේ දී මහබැංකු අධිපතිවරයා නිසි පිළිතුරක් දී නොමැත. 

තමන් ඊට පිළිතුරු දුනහොත් එය දේශපාලනික කාරණාවක් වන බව ඒ මහතා සඳහන් කර තිබේ.

මූලාශ්‍රය – අරුණ