පේරාදෙණිය නගරයේ සිදුවූ නායයාමකින් පුද්ගලයෙකු මියගොස් වෙළඳ සැල් හතරකට හානි සිදුව තිබේ.

මහනුවර දිස්ත්‍රික් ආපදා කළමනාකරණ සහකාර අධ්‍යක්ෂ ඉන්දික රණවීර මහතා සඳහන් කළේ ඊයේ රාත්‍රි නායයෑම සිදුව ඇති බවයි.

මියගොස් ඇත්තේ 68 හැවිරිදි පුද්ගලයෙකි.

නායයෑම හේතුවෙන් කොළඹ නුවර මාර්ගයේ එක් මංතීරුවක් අවහිර වී තිබේ.

ඔහු ප්‍රකාශ කළේ පවතිත අවදානම් තත්ත්වයත් සමග අවට වෙළඳසැල් හා ගොඩනැගිලි කිහිපයක පිරිස් එම ස්ථානයෙන් ඉවත් කළ බවයි.

වැලිගල්ල හා ගෙලිඔය අතර පාරට ගසක් කඩා වැටිලා

මේ අතර නුවරඑළිය කොළඹ ප්‍රධාන මාර්ගයට වැලිගල්ල හා ගෙලිඔය අතරදී ගස් කඩා වැටීමෙන් වාහන ධාවනය ඇණහිට තිබේ.

පොලිසිය පැවසුවේ, බලංගොඩ සීලගම ප්‍රදේශයෙන් පස් කඳු වැටීම හේතුවෙන් බදුල්ල කොළඹ ප්‍රධාන මාර්ගයේ රථවාහන ධාවනය තවදුරටත් ඇණහිට තිබේ.

අත්තනගලු ඔය අසල ජනතාවට නිවේදනයක්  

වර්ෂාවත් සමග අත්තනගලු ඔය දෙපස ජනතාව අවධානයෙන් සිටින්නැයි වාරිමාර්ග දෙපාර්තමේන්තුවේ ජල විද්‍යා අංශයේ අධ්‍යක්ෂ එස් පී සී සුගීෂ්වර මහතා පවසයි.

දිවයින පුරා වැසි තත්ත්වයේ වර්ධනයක් 

මේ අතර දිවයින පුරා වැසි තත්ත්වය තවදුරටත් වර්ධනය වීමක් අද අපේක්ෂා කරන බව කාලගුණ විද්‍යා දෙපාර්තමේන්තුව පවසයි.

එම දෙපාර්තමේන්තුව සඳහන් කළේ, මධ්‍යම සබරගමුව බස්නාහිර වයඹ උතුරුමැද සහ ඌව පළාත්වලට අද පස්වරු එකෙන් පසුව මිලි මීටර් 100 ක පමණ .තද වැසි ඇතිවිය හැකි බවයි.

උතුරු හා නැගෙනහිර පළාත්වල ඇතැම් ස්ථානවලට උදෑසන කාලයේ දී ද වැසි ඇතිවිය හැකි බව කාලගුණ අණාවැකියේ සඳහන් ය.

ගිගුරුම් සහිත වැසි සමග තාවකාලිකව තද සුළංවලින්  හා අකුණු අනතුරුවලින් ආරක්ෂා වන්නැයි කාලගුණ විද්‍යා දෙපාර්තමේන්තුව ජනතාවට දැනුම් දෙයි.

මේ අතර බදුල්ල, මහනුවර, කෑගල්ල, කුරුණෑගල, මාතර, රත්නපුර ,ගම්පහ හම්බන්තොට හා  මාතලේ දිස්ත්‍රික්කවලට පැනවූ නායයෑමේ අනතුරු ඇගවීම් නිවේදනය අද පස්වරුව දක්වා දීර්ඝ කර තිබේ.