කථානායක මහින්ද යාපා අබේවර්ධන මහතාගේ ප්‍රධානත්වයෙන් ආරම්භ වු මැති සබය අද(26) යම් උණුසුම් මුහුණුවරක් ගෙන තිබේ.

පොලිස්පතිවරයා සම්බන්ධයෙන් ශ්‍රේෂ්ඨාධිකරණය ලබා දුන් තීන්දුව පිළිබඳ අග්‍රාමාත්‍ය දිනේෂ් ගුණවර්ධන මහතා අද (26) රජයේ නිල ස්ථාවරය ප්‍රකාශ කලේය.

අග්‍රාමාත්‍යවරයා සිය ප්‍රකාශය මගින් අවධාරණය කළේ වැඩ තහනමට ලක්කර ඇති පොලිස්පතිගේ නියෝගය බල රහිත කිරීම සඳහා කථානායකවරයාට මැදිහත් වන ලෙසයි.

අග්‍රාමාත්‍යවරයාගේ ප්‍රකාශය අතරතුරද මැති සබයෙන් විවිධ බාධා එල්ල වු අතර ඉන්පසු පක්ෂ විපක්ෂ මැති ඇමතිවරුන් ඒ සම්බන්ධයෙන් සිය ප්‍රතිචාර දැක්වූහ.

ඒ හේතුවෙන් පාර්ලිමේන්තුවේ ඇතිවූයේ දැඩි උණුසුම්කාරි තත්ත්වයකි.

ඒ සම්බන්ධයෙන් විපක්ෂනායක සජිත් ප්‍රේමදාස මහතා දැක්වූයේ මෙවන් අදහසක්,

“ආණ්ඩුක්‍රම ව්‍යවස්ථාව කියන රටේ උත්තරීතර නීතිය පිළිපදින්නේ නැතුව, එය මඟහැරලා අපිට අහිතකර තීන්දු ආවොත් ඒවට විරුද්ධ වෙන්නයි.. පක්ෂපාතී තීන්දු ආවොත් ඒවා ප්‍රශංසා කරන්නයි.. ව්‍යවස්ථාවට පටහැනිව හිතන හිතන විදියට තීන්දු තීරණ ගන්න පුලුවන්ද? ශ්‍රේෂ්ඨාධිකරණයෙන් අතුරු තහනමක් ලබාදුන් පොලිස්පතිවරයා සිවිල් ඇඳුමෙන් ඇවිත් පොලීසිය පාලනය කරනවා.. ඒක සම්පූර්ණයෙන්ම වැරදියි..”

ඊට ප්‍රතිචාර දක්වමින් ආරක්ෂක රාජ්‍ය අමාත්‍ය ප්‍රමිත බණ්ඩාර තේනනකෝන් මහතා කියා සිටියේ විපක්ෂනායවරයා සඳහන් කළ පරිදි මේ මොහොතේ පොලිස්පතිවරයා කිසිඳු ලෙසකින් සිවිල් ඇඳුමෙන් හෝ නිල ඇඳුමෙන් සැරසී රාජකාරි නොකරන බවයි.

මේ පාර්ලිමේන්තු මන්ත්‍රී දයාසිරි ජයසේකර මහතා,

“මෙවැනිම තත්ත්වයක් ඉතිහාසයේ තිබුණා.. පූජිත් ජයසුන්දර මහතාව අනිවාර්ය නිවාඩු යැව්වා… මොකක්ද වුණේ එතකොටත් පොලිස්පතිධූරය හිස්වෙලා තිබුණේ නැහැ.. එතකොට කවුද සී.ඩී වික්‍රමරත්න මහතාව පත්කළේ.. කොහොමහරි එයාව පත්කරලා වැඩබලන් ගියා… එතකොටත් පොලිස්පතිධූරය හිස්වෙලා තිබ්බේ නැහැ.. ඉතින් මේ තත්ත්වයත් ඒකට අදාළයි ඒ තත්ත්වයමයි මේ.. ඉතින් ජනාධිපතිවරයෙකු ලෙස තමුන්ගේ යුතුකම් කොටස කරන්න බැරිනම් කරුණාකර ඉල්ලා අස්වී ජනාධිපතිධූරයේ කටයුතු ඉදිරියට කරගෙන යාමට අගමැතිවරයාට අවස්ථාව ලබාදෙන්න…”

පක්ෂ විපක්ෂ මත විමසුම්වලින් අනතුරුව කථානායක මහින්ද යාපා අබේවර්ධන මහතා මෙලෙස අදහස් පළකලේය.

“මම කිසිඳු වැරදි තීරණයක් ගත්තේ නැහැ.. නියමිත ව්‍යවස්ථානුකූලව, නිවැරැදිව, බොහොම සාක්ෂාත්ව හිතලා බළලා තමයි තීන්දු තීරණ අරන් තියෙන්නේ.. ඔබතුමන්ලට වැරදි වෙන්න පුලුවන් ඒ වුණාට හෘද සාක්ෂියට එකඟව තමයි මේ තීරණ ගත්තේ.. පොලිස්පතිතුමාගේ සේවය තහනම් කරලා තියනවා.. ව්‍යවස්ථා සභාවේ අනුමැතිය සහ පාර්ලිමේන්තුවේ එකඟතාව මත මේ නිළධාරින් ගැන වෙනම හැඳින්වීමක් තියනවා 41 සී වගන්තිය යටතේ.. ඒ අනුව අදාළ නිළධාරීන්ගේ තනතුර හිස් කරනවානම් විශේෂ වැඩපිළිවෙලක් තියනවා.. ඒ වැඩපිළිවෙල යටතේ තමයි කටයුතු කරන්න ඕන.. නැත්තම් ශේෂ්ඨාධිකරණයට ගිහිල්ලා තීරණයක් ගන්න ඕන.. මං හිතන විදියට ජනාධිපතිතුමාටත් මේ සම්බන්ධයෙන් තීන්දු තීරණයක් ගන්න බැහැ.. මේක වැරදි නම් ඔබතුමාලා උසාවියට ගිහින් නිවැරැදි කරගන්න…”