මිහින්තලා පුදබිම කේන්ද්‍ර කර ගනිමින් පැවැත්වෙන රාජ්‍ය පොසොන් උත්සවය සදහා මූල්‍ය ලෙසින් හෝ කිසිදු ආකාරයකින් අඩුපාඩුවක් සිදුනොකරන බව අග්‍රාමාත්‍ය දිනේෂ් ගුණවර්ධන අද (23) පාර්ලිමේන්තුවේදී ප්‍රකාශ කළේය.

ඒ, පාර්ලිමේන්තුවේ දී විපක්ෂ නායක සජිත් ප්‍රේමදාස මහතා විසින් කළ ඉල්ලීමකට පිළිතුරු ලබාදෙමිනි.

 අග්‍රාමාත්‍යවරයා පවසා සිටියේ, පොසොන් උත්සවය සඳහා රජයේ පූර්ණ අනුග්‍රහය දක්වන ලෙසට ජනාධිපතිවරයා සඳහන් කර ඇති බවයි.

මෙවර පොසොන් උත්සවය නිමිත්තෙන් මිහින්තලය විදුලි ආලෝක පූජාවට සහ බැතිමතුන්ට අවශ්‍ය පහසුකම් සැපයීම සඳහා ප්‍රමාණවත් මුදල් රජය විසින් ලබා දී නොමැති බවට පසුගියදා මාධ්‍ය හමුවකදී මිහින්තලා විහාරාධිපති පූජ්‍ය වලවාහැංගුණුවැවේ ධම්මරතන හිමියන් පවසා තිබුණි.

මිහින්තලය විදුලි ආලෝක පුජාව මෙවර කිසිදු ආයතනයක් විසින් මෙතෙක් භාරගෙන නොමැති බවත්, එම කටයුතු සඳහා රුපියල් මිලියන 06ක පමණ මුදලක් වැය වන බවත් උන්වහන්සේ සඳහන් කළේය. 

ඒ අනුව මුදල් සොයා ගැනීම සඳහා පිණ්ඩපාත චාරිකාවක් හෝ සිදුකරන බව උන්වහන්සේ වැඩිදුරටත් සඳහන් කර තිබුණි.

මේ සම්බන්ධයෙන් අද දිනයේදී පැවති කැබිනට් මාධ්‍ය හමුවේදීද මාධ්‍යවේදීන් ප්‍රශ්ණ නැගූ අතර, කැබිනට් ප්‍රකාශක බන්දුල ගුණවර්ධන මහතා පවසා සිටියේ බුද්ධශාසන අමාත්‍යංශ ලේකම්වරයාගෙන් මේ බව විමසූ විටදී ඔහුට දැනගැනීමට ලැබුණේ මිහින්තලේ පුදබිමට පමණක් බුද්ධශාසන අමාත්‍යංශයෙන් ලක්ෂ 31ක් දිසාපතිවරයා හට යවා ඇති බවයි.

සමස්ථ පොසොන් කලාපය වෙනුවෙන් රාජ්‍ය අංශය විසින් සිදුකරන දායකත්වය පිළිබඳව බුද්ධශාසන අමාත්‍යංශය ඉදිරියේදී පැහැදිලි කිරිමක් සිදුකරනු ඇති බවද අමාත්‍යවරයා වැඩිදුරටත් පැවසීය.