ඉන්දියාවෙන් ගෙන්වන බිත්තරයක් රුපියල් 30 බැගින් බේකරි හිමියන්ට ලබාදීමට කටයුතු කළද පාන්, බනිස් ඇතුළු බේකරි නිෂ්පාදනවල මිල අඩු කිරීමට නොහැකි බව සමස්ත ලංකා කුඩා හා මධ්‍ය පරිමාණ කර්මාන්තකරුවන්ගේ සංගමය සඳහන් කරයි.

මීට අමතරව බිත්තර ලක්ෂ විස්සක ප්‍රමාණය බේකරි හා කේක් නිෂ්පාදනවලට ප්‍රමාණවත්වන්නේ දින දෙක තුනක කාලයකට පමණක් බවද එම සංගමයේ සභාපති නිරුක්ෂ කුමාර මහතා කියා සිටී.

බේකරි නිෂ්පාදන සඳහා යොදාගන්නා අමුද්‍රව්‍ය, විදුලිබිල සහගෑස් මිල ඉහළයෑම නිසා බේකරි කර්මාන්තය දැඩි අර්බුදයකට ලක්ව තිබෙන බවත්, මේ නිසා දවසක් දෙකක් අඩු මිලට බිත්තර ලබාදුන් පමණින් බේකරි නිෂ්පාදන මිල පහළ දැමීමට නොහැකි බවත් හෙතෙම සඳහන් කළේය.

මේ අතර, ඉන්දියාවෙන් ගෙන්වන බිත්තර කල් ඉකුත්වන දිනයක් පිළිබඳ නොදන්නා නිසාත්, එහි සෞඛ්‍යාරක්ෂිත තත්ත්වය පිළිබඳ නොදන්නා නිසාත් බොහෝ බේකරි හිමියන් විදේශ රටවලින් ගෙන්වන බිත්තර මිලදී නොගැනීමට තීරණය කර ඇතැයි දකුණු පළාත් කුඩා හා මධ්‍ය පරිමාණ බේකරි හිමියන්ගේ සංගමය සඳහන් කරයි.

දේශීය වශයෙන් බිත්තර තොග ලබාගැනීමේදී තොග සැපයුම්කරුවන් හරහා කිකිළි බිත්තර දමා තිබෙන දිනය වකවානු පිළිබඳ තහවුරුවක් ලබා ගැනීමට හැකි බවත්,මේ අනුව බිත්තරයක්  භාවිතකළ හැකි දින ගණන බේකරි හිමියන් දන්නා බවත් එම සංගමයේ සභාපති කමල් පෙරේරා මහතා සඳහන් කළේය.

ඉන්දියාවෙන් ගෙන්වන බිත්තර ප්‍රමිතියෙන් තොරවුවහොත් දැනට ක්‍රියාත්මක වන බේකරි ටික පවා වසා දැමීමට සිදුවන බවත්, මේ නිසා දේශීය බිත්තර කර්මාන්තය වැඩිදියුණු කිරීමට බලධාරීන් කටයුතු කළ යුතු බවත් සමස්ත ලංකා කුඩා හා මධ්‍ය පරිමාණ කර්මාන්තකරුවන්ගේ සංගමය හා දකුණු පළාත් කුඩා හා මධ්‍ය පරිමාණ බේකරි හිමියන්ගේ සංගමය ඉල්ලා සිටියි.

මූලාශ්‍රය – අද