ඉන්දීයාව හා පකිස්ථානය අතර මේ වනවිට ඇතිවී ඇති උණුසුම්කාරී තත්ත්වය සහ ඉදිරියේ දී ඇතිවිය හැකි ලෝක දේශපාලනික තත්ත්වයන් හේතුකොට ගෙන ලංකාවේ වරාය සහ ගුවන්තොටුපොළට එල්ල විය හැකි බලපෑම පිළිබඳව සාකච්ඡාවක් පසුගියදා පැවැත්විණි.

ඒ ප්‍රවාහන ,මහමාර්ග,වරාය සහ සිවිල් ගුවන්සේවා අමාත්‍ය බිමල් රත්නායක මහතාගේ ප්‍රධානත්වයෙනි.

ඉන්දු – පකිස්ථාන අර්බුදය නිසා වරායට අමතර නැව් පැමිණීමට ඉල්ලීම් පවතින අතර ඒවා කාර්යක්ෂමව මෙහෙයුම් කටයුතු සිදු කිරීමටත් දැනට සිදුවන මෙහෙයුම් කටයුතුවලට බාධාවක් නොවී එම කටයුතු සිදුකිරීමට ඇති හැකියාව සහ යෝජනා සම්බන්ධව ද මෙහිදී සාකච්ඡා කෙරුණි.

වරාය මෙන්ම ගුවන්තොටුපොළ ද ඉදිරියේදී ඇතිවිය හැකි තත්ත්වයන්ට සූදානමින් පවත්වා ගතයුතු බවට අවධාරණය කළ අමාත්‍යවරයා ලෝක දේශපාලන තත්ත්වයන්ට සාර්ථකව මුහුණ දෙමින් එය අවස්ථාවක් කර ගනිමින් කාර්යක්ෂම ව වරාය සහ ගුවන්තොටුපොළ මෙහෙයුම් කටයුතු සිදුකර ගතයුතු බවත් එහිදී පැවසීය.

වරාය අධිකාරියේ නිලධාරීන්,ගුවන්තොටුපල නිලධාරීන්, කොළඹ , හම්බන්තොට වරායන්වල පර්යන්ත භාර නිළධාරීන්, නැව් සමාගම් නියෝජිතයින් සහ රේගු නිලධාරීන් මෙම අවස්ථාවට සහභාගී විය.

කොත්මලේ ගැරඬිඇල්ල ලංගම බස්රථ අනතුරෙන් පසුව දුර ගමන් සේවා බස්රථවල සේවය කරන රියැදුරන්ට සහ කොන්දොස්තරවරුන්ට ලැබෙන විවේකකාලය පිළිබඳව වි⁣ශේෂ අවධානයක් යොමු කිරීමට සිදුව ඇති බව මෝටර් රථ ප්‍රවාහන කොමසාරිස් ජනරාල් නීතිඥ කමල් අමරසිංහ ප්‍රකාශ කළේය.

මෙම මාරක බස්රථවල අනතුර සම්බන්ධයෙන් මෝටර් රථ ප්‍රවාහන දෙපාර්තමේන්තුව විසින් ගනු ලබන ඉදිරි ක්‍රියාමාර්ග කවරේදැයි කළ විමසීමකදී ඔහු මේ බව ප්‍රකාශ කළේය.

එසේම මෙවැනි දුෂ්කර මාර්ග හරහා රාත්‍රි කාලයේදී සිදු කරන දුර ගමන් මගී ප්‍රවාහන සේවාවන් පිළිබඳවත් දැඩි අවධානයක් යොමු කිරීමට සිදුව තිබෙන බවද කොමසාරිස් ජනරාල්වරයා සඳහන් කළේය.

“කතරගම කුරුණෑගල කියන්නේ ඉතාම දීර්ඝ කාලයක් වැයවෙන ප්‍රවාහන සේවාවක්. මෙහිදී මෙවැනි ගමන්වල යෙදෙන බස්රථ සේවකයන්ට ලැබෙන විවේක කාලය පිළිබඳව විශේෂ අවධානයක් යොමු කළ යුතුව තිබෙනවා. එවැනි දිගු ගමනකට පෙර ඔවුන්ට නිසි විවේකයක් ලැබෙනවාද? ඒ සඳහා ඔවුන්ට අවශ්‍ය පහසුකම් බස් ඩිපෝවලින් සැපයෙනවාද? ඔවුන් ගමනේ අතරමගදී යම් විවේකයක් ගන්නවාද කියන කරුණු පිළිබඳවත් අවධානයක් අපි මේවනවිට යොමු කරලා තිබෙනවා.

මෙම අනතුර සම්බන්ධයෙන් විමර්ශන සිදු කිරීමට ප්‍රවාහන අමාත්‍යවරයාගේ උපදෙස් අනුව දෙපාර්තමේන්තුවේ තාක්ෂණික අංශයේ සහකාර කොමසාරිස්වරුන්ගෙන් යුත් කණ්ඩායමක් පත්කර ඇති බවද ඔහු වැඩිදුරටත් පැවසීය.

මූලාශ්‍රය – අරුණ

ඉන්දීය පාකිස්තාන ගැටුමත් සමග පාකිස්තානයට මෙරට බුලත් අපනයනය නතර කිරීම හේතුවෙන් මෙරට බුලත් ගොවීන් දැඩි දුෂ්කරතාවට පත්ව ඇති බවට එම ගොවීහු මැසිවිලි නගති.

මෙම ගැටලුව විසඳෙන දිනයක් නිශ්චිතවම නොමැති වීම හේතුවෙන් ගොවීන්ට යළි වගාවන්වලට ප්‍රවේශවීමට නොහැකිව බලාසිටීමට සිදුව ඇතැයිද ඔවුහු පවසති.

මේ පිළිබඳව අදහස් දක්වමින් බුලත් ගොවීන් සුරැකීමේ සංවිධානයේ සභාපති ඩබ්ලිව්. එල්. සරත් චන්ද්‍රසිරි පැවසුවේ පාකිස්තානයට බුලත් කොළ දහසක් අපනයනය කරනු ලබන්නේ රුපියල් විසිපන්දහසකට වැනි මුදලකට බවය.

කෙසේ වෙතත් ඉන්දීය පාකිස්තාන ගැටුම අවසන් වන තෙක් බලා සිටීමට නොහැකි බැවින් බුලත් සඳහා එංගලන්තය, ජර්මනිය ආදී යුරෝපීය රටවල් ගණනාවක මෙන්ම මාලදිවයින, මැලේසියාව ආදී රටවලට විශාල ඉල්ලුමක් නිර්මාණය වී ඇති මොහොතක එම රටවලට බුලත් අපනයනය කිරීමට අවස්ථාව ලබාදෙන ලෙස සභාපතිවරයා රජයෙන් ඉල්ලීමක්ද කරයි.

“අපි ණය ඉල්ලන්නෙ නැහැ. වෙනත් සහනාධාර ඉල්ලන්නෙත් නැහැ. අපි සබඳතා ගොඩනගලා ඇතිකරගන්න වෙළෙඳ අවබෝධතා අනුව බුලත් අපනයනය කරන්න අවශ්‍ය යටිතල පහසුකම් සපයලා දෙන්න කියලා විතරයි ඉල්ලන්නෙ. ඒක කරල දුන්නම අපි රටට අපේ ශක්ති ප්‍රමාණයෙන් ඩොලර් ගෙන එන බව අපි රජයට කියනවා. අපිට අනුකම්පා කරන්න අවශ්‍ය නැහැ. රජයකට පමණක් කරන්න පුළුවන් කොටසක් තියනවානෙ අන්න ඒ ටික පමණයි අපි ඉල්ලන්නෙ. බුලත් රෝග, වෛරස් ගැටලු කළමනාකරණය කර ගන්න දැනට අපේ ගොවීන්ට පුළුවන්. ගොවීන් කිව්වහම බොහෝ දෙනෙක් හිතන්නෙ අමුඩය ගසාගන ඉන්න කෙනෙක් කියලා. ගොවිතැන වේලාවෙ ඒක එහෙම වුණත් එදිනෙදා ජීවිතයේ ඒ හැම කෙනෙක්ම කාටත් අතනොපා ලස්සනට ජීවත්වෙනවා. තොරතුරු තාක්‍ෂණය උපයෝගී කරගන විදෙස් රටවල සබඳතා අනුව වෙළෙඳපොළත් සොයාගන්නවා. රජයෙන් ඉල්ලන පොඩි දේ නොවුණොත් මේ තියන එකම පාකිස්තාන වෙළෙඳපොළ අහිමිවුවහොත් බුලත් වගාව ඉවරටම ඉවරයි.

මේ කර්මාන්තය එන්න එන්න දියුණු වෙමින් බුලත් ගොවීන් කාටත් අත නොපා ස්වයංව නැගිටිමින් මෙරටට ඩොලර් ගේන කාර්යාවලියට සක්‍රීය දායකත්වය දෙමින් ඉන්න අවස්ථාවෙ තමයි මේ යුද ගැටුම් නිර්මාණය වුණේ. අපේ බුලත්වලට තිබුණ හොඳම වෙළෙඳපොළ වෙලා තිබුණෙ පාකිස්තානය. එරට බොහෝ පිරිසක් බුලත් කනවා. එරට අවශ්‍යතාවයෙන් සියයට 35ක් පමණයි අපි බුලත් යවන්නෙ. ඉතිරි අවශ්‍යතාව ඉන්දියාවෙන් වගේම දැන් දැන් පාකිස්තානයේ බුලත් වවන්නත් පටන් අරගන. ඒත් භූගෝලීය සාධක හේතුවෙන් වෙන්න ඇති අපේ රටේ බුලත්වලටට තියන ඉල්ලුම හරිම ඉහළයි. බුලත් තියාගන්න බැහැ දින දෙකකට වඩා. ඒ නිසා තමයි ගුවණින් අපි බුලත් යවන්නෙ. අපේ රටේ අවශ්‍යතාවට වඩා බුලත් ප්‍රමාණයක් මේ රටේ දැන් පවත්නා නිසා තමයි මේ බුලත් ඉතාම අඩු මුදලට විකිණෙන්නේ.

මූලාශ්‍රය – අරුණ