Update – හිටපු ජනපති මහින්ද රාජපක්ෂ මහතා කොළඹ වරාය නගරයේ නිතර ගැවැසෙන්නෙකු බවට පත්ව ඇතැයි යන්න මුලින්ම වාර්තා කර ඇත්තේ නෙත් කණින් කොනිනි බව වාර්තා වේ.

අදාළ පුවත අනුව මූලාශ්‍රය උපුටා දැක්වීමක් නොකොට “ද සන්ඩේ මොර්නිං” පුවත්පත එය අද (08) වාර්තාකර තිබිණි.

කෙසේවුවද, මේ පුවතට මුල්ව ඇත්තේ රාජපක්ෂ මහතා පෙරවරු ව්‍යායාම සඳහා කොළඹ වරාය නගරයට පැමිණීමය.

හිටපු ජනපතිවරයා ඔහුගේ ආරක්ෂක නිලධාරීන්ට අමතරව බොහෝ විට ඔහුගේ මිතුරන් කිහිප දෙනෙකුද කැටුව එන බවත්, ඔවුන් අතර හිටපු අමාත්‍ය ඒ.එච්.එම්. ෆවුසිගේ පුත්‍රයා වන නෞසර් ෆවුසි මහතා ද ඇතැයි “ද සන්ඩේ මොර්නිං” පුවතේ වැඩිදුරටත් දැක්වේ.

මහින්ද මහතාගේ වැඩිමහල් පුත් පාර්ලිමේන්තු මන්ත්‍රී නාමල් රාජපක්ෂ ද පාපන්දු ඇතුළු ක්‍රීඩා කටයුතුවල නිරත වීමට කොළඹ වරාය නගරයට නිතර පැමිණෙන අයෙක් බවත් පැවසේ.

නාමල් පසුගිය වසරේ ටබටා (Tabata) නම් ක්‍රීඩාවක නිරත වීමට පටන් ගත් අතර පාර්ලිමේන්තුවේ සිටින ඔහුගේ මිතුරන් සහ ඔවුන්ගේ අඹුසැමියන් ද ඔහු සමඟ ව්‍යායාම සඳහා එක්වී සිටින බව වාර්තා වේ.

මෙම ව්‍යායාම සඳහා නාමල් සමඟ එක්ව සිටින මන්ත්‍රීවරුන් අතර ඩී.වී. චානක, ඉන්දික අනුරුද්ධ සහ සනත් නිශාන්ත ද ඇතැයි එහි දැක්වේ.

කෙසේවුවද, හිටපු ජනාධිපතිවරයාගේ පොර්ට් සිටිගමන හෙළි කිරීම ඔහු අනාරක්ෂිත කිරීමට දැරූ තැතක්ද යන්න පිළිබඳව සැකයක් ඇතැයි දේශපාලන විචාරකයෝ කියා සිටිති.

මේ අතර, පසුගිය කාලයේ මහින්ද රාජපක්ෂ මහතා මෙන්ම හිටපු ජනපති ගෝඨාභය රාජපක්ෂ මහතා ද අදාළ ධූරවලින් ඉවත් කිරීමට ජාත්‍යන්තර බලවේගයක් ක්‍රියාත්මක වූ බවට මේවන විට විවිධ පාර්ශවවලින් චෝදනා එල්ලව තිබේ.

මෙය එහිම දිගුවක්ද යන්න සැකය ද දේශපාලන විචාරකයන් මතුකර සිටී.

අදාළ පුවත පහත දැක්වේ.