බරපතල වැඩ සහිත සිර දඩුවම් නියම වූ හිටපු ක්‍රීඩා අමාත්‍ය මහින්දානන්ද අලුත්ගමගේ සහ සතොස ආයතනයේ හිටපු සභාපති මෙන්ම හිටපු වෙළඳ අමාත්‍ය නලින් ප්රනාන්දු වැලිකඩ බන්ධනාගාරයේ සාමාන්‍ය වාට්ටු වෙත යොමු කර තිබේ.
ඊයේ(29) කොළඹ ත්‍රිපුද්ගල මහාධිකරණ විනිසුරු මඩුල්ල විසින් හිටපු වෙළඳ අමාත්‍ය නලින් ප්‍රනාන්දුට බරපතල වැඩ සහිත වසර 25ක සිර දඬුවමක් පැනවූ අතර හිටපු අමාත්‍ය මහින්දානන්ද අලු‍ත්ගමගේට බරපතල වැඩ සහිත වසර 20 සිර දඬුවම් නියම කෙරුණි.
(පෙර පුවත 2025 30 මැයි පෙ.ව.8.54 )
මහින්දානන්දට හා නලින්ට “කේ” වාට්ටුවේදී ජම්පර් ගස්සයි!
සිර දඬුවම් නියම වූ හිටපු ක්‍රීඩා අමාත්‍ය මහින්දානන්ද අලුත්ගමගේ මහතා සහ ස.තො.ස. ආයතනයේ හිටපු සභාපති සහ හිටපු වෙළඳ අමාත්‍ය නලින් රුවන්ජීව ප්රනාන්දු මහතා වැලිකඩ බන්ධනාගාරයේ “කේ” වාට්ටුවේ රැඳවූ බව බන්ධනාගාර දෙපාර්තමේන්තු ආරංචි මාර්ගවලින් වාර්තා වේ.
වැලිකඩ බන්ධනාගාරය වෙත ඊයේ (29) පස්වරුවේ රැගෙන ආ ඔවුන් දෙදෙනා පළමුව සිරකරුවන් ලෙස ලියාපදිංචි කර තිබිණි.
ඉන් අනතුරුව ඔවුන් දෙදෙනාට ජම්පරය ද ලබාදී ‘කේ’ වාට්ටුවේ රැඳවූ බව වාර්තා වේ.
දීර්ඝ කාලීන සිරදඬුවම් නියම වී සිටින තවත් සිරකරුවන් 100 දෙනෙකු සමඟ එම වාට්ටුවේ හිටපු ක්‍රීඩා අමාත්‍ය මහින්දානන්ද අලුත්ගමගේ මහතා සහ හිටපු වෙළඳ අමාත්‍ය නලින් ප්රනාන්දු මහතා රඳවා ඇතැයි පැවසේ.
සිර දඬුවම් නියම වූ උතුරු මැද පළාත් හිටපු ප්‍රධාන අමාත්‍ය එස්. එම්. රංජිත් මහතා ද රඳවා සිටින්නේ එම වාට්ටුවේම බවද වාර්තා වේ.
මේ අතර හිටපු අමාත්‍යවරුන් දෙදෙනා අද දිනයේ බන්ධනාගාර වෛද්‍යවරයෙකු හමුවට ඉදිරිපත් කිරීමට නියමිතව ඇතැයි ද පැවසේ.
බන්ධනාගාරගත වන ඕනෑම රැඳවියෙකු පළමුව වෛද්‍යවරයෙකු හමුවට ඉදිරිපත් කිරීම සාමාන්‍ය ක්‍රමවේදයයි.
ඒ, ඔවුන්ගේ සෞඛ්‍ය තත්ත්වය පරීක්ෂා කිරීම සඳහායි.
හිටපු වෙළඳ අමාත්‍ය නලින් ප්රනාන්දු මහතාට බරපතල වැඩ සහිත වසර 25 ක සිර දඬුවම් සහ හිටපු අමාත්‍ය මහින්දානන්ද අලුත් ගමගේ මහතාට බරපතල වැඩ සහිත වසර 20ක සිර දඬුවම් මේවන විට නියමවී ඇත.
ඊට අමතරව නලින් ප්රනාන්දු මහතාට රුපියල් ලක්ෂ හතරක දඩයක් සහ මහින්දානන්ද අලුත්ගමගේ මහතාට රුපියල් ලක්ෂ දෙකක දඩයක්ද නියමකර ඇත.
ඒ, කොළඹ ත්‍රිපුද්ගල මහාධිකරණ විනිසුරු මඩුල්ල ඒකමතිකව දුන් තීන්දුවකට අනුවයි.
2015 වසරේ ජනාධිපතිවරණය පැවැති සමයේ ස.තො.ස. ආයතනය හරහා කැරම් බෝඩ් 14000 ක් සහ දාම් ලෑලි 11000 ක් මිලදීගෙන ක්‍රීඩා සංගම් වලට බෙදා දීම තුළින් රජයට රුපියල් මිලියන 53 ක පාඩුවක් සිදු කළේ යැයි ඔවුහු චෝදනා ලැබ සිටියහ.
පුරා වසර හයක් තිස්සේ පැවති දීර්ඝ නඩු විභාගයකින් අනතුරුව ත්‍රි පුද්ගල මහාධිකරණ විනිසුරු මඩුල්ල විසින් අදාළ තීන්දුව ලබාදී තිබිණි.
අල්ලස් හෝ දූෂණ චෝදනා විමර්ශන කොමිෂන් සභා පනතේ 70 වන වගන්තිය යටතේ ”දූෂණය” නැමැති වරද සිදු කළේ යැයි චෝදනා කොට අධි චෝදනා 06 ක් යටතේ මෙම විත්තිකරුවන් දෙදෙනාට එරෙහිව ඉකුත් යහපාලන රජය සමයේ අල්ලස් කොමිසම විසින් මෙම නඩුව ගොනු කර තිබිණි.
