පාස්කු ප්‍රහාරයට අදාළ තොරතුරු වාර්තා කිරීම ගැන අපරාධ පරීක්ෂණ දෙපාර්තමේන්තුව සහ නීතිඥවරයකු විසින් මාධ්‍යවේදී තරිඳු ජයවර්ධනට එරෙහිව නියෝගයක් ඉල්ලා සිටි නඩුව අද (27) කොටුව මහේස්ත්‍රාත් අධිකරණය හමුවේ කැඳවන ලදී.

එහිදී, තරිඳු ජයවර්ධන වෙනුවෙන් පෙනී සිටි නීතිඥ තිෂ්‍ය වේරගොඩ අධිකරණය හමුවේ පවසා සිටියේ, මාධ්‍යවේදී තරිඳු ජයවර්ධනට එරෙහිව  නියෝගයක් ඉල්ලා සිටි නීතිඥවරයා (සංජීව ගමගේ), සේවාදායකයකුගේ උපදෙස් නොමැතිව අගතියට පත් පාර්ශවය වෙනුවෙන් යැයි කියමින් පෙනී සිටීම බරපතල තත්ත්වයක් බවය.

මෙම නඩුව මෝසමක් මගින් කැඳවූ නීතිඥ සජීව ගමගේ මහතා පසුගිය නඩු දිනයේ අධිකරණයට දැනුම් දුන්නේ තමා පෙනී සිටින්නේ පාස්කු ප්‍රහාරයෙන් තුවාල ලැබූ නීතිඥ මෝදිත මහතා වෙනුවෙන් බවය.

අද මහේස්ත්‍රාත්වරිය දැනුම් දුන්නේය තමා වෙනුවෙන් පෙනීසිට කරුණු දැක්වීමට කිසිවෙකුට තමා උපදෙස් දී නැති බවට නීතිඥ මෝදිත ඒකනායක මහතා මෝසමක් මගින් අධිකරණයට දැනුම් දී ඇති බවය.

නීතිඥ මෝදිත මහතා තම නිවසට පැමිණ කෝපි පානය කළ බවත්, මෛත්‍රීපාල සිරිසේන මෙන් ඔහු වෙනස් වී ඇති බවත්, මාධ්‍යවේදී තරිඳු ජයවර්ධනගේ පාර්ශ්වයෙන් නීතිඥ මෝදිත මහතාව මුදලට ගෙන ඇති බවත් නීතිඥ සජීව ගමගේ මහතා අද අධිකරණය හමුවේ පවසා සිටියේය.

මේ සම්බන්ධයෙන් කරුණු දැක්වූ නීතිඥ තිෂ්‍ය වේරගොඩ මහතා ප්‍රකාශ කළේ නීතිඥ සජීව මහතා අධිකරණය සහ නීතියේ ආධිපත්‍යය හෑල්ලුකරමින් වගකීම් විරහිතව කටයුතු කරන බවය.

එහිදී  ඊට ප්‍රතිචාර දක්වමින් මෙම නඩුවේ සැකකරුවකු නම් කර නොමැති හෙයින් නීතිඥ තිෂ්‍ය වේරගොඩ මහතාට පෙනී සිටීමට හැකියාවක් නොමැති බව නීතිඥ සජීව ගමගේ මහතා සඳහන් කලේය.

එම අවස්ථාවේදී නීතිඥ වේරගොඩ මහතා පෙන්වා දුන්නේ මාධ්‍යවේදී තරිඳු ජයවර්ධනට එරෙහිව මෙම නඩුවේ නියෝග ඉල්ලා ඇති හෙයින් ඔහු වෙනුවෙන් තමා පෙනී සිටින බවය.

මෙම නඩුවට අදාළ ගොනුව ඊයේ (26) නීතිපති දෙපර්තමේන්තුවට යොමු කළ බවත්, ඉදිරියේදී නීතිපති උපදෙස් අනුව කටයුතු කරන බවත් අපරාධ පරීක්ෂණ දෙපාර්තමේන්තුව දැනුම් දුන්නේය.

ඒ අනුව නඩුව වැඩිදුර කැඳවීම සඳහා අප්‍රේල් 30 දින තෙක් කල් තැබුණි.

මෙහිදී මාධ්‍යවේදී තරිඳු ජයවර්ධන වෙනුවෙන් නීතිඥ වැලිකුඹුර, ඩිලාන් නාලක, මනුෂිකා කුරේ ඇතුළු නීතිඥවරු පිරිසක් සමඟ නීතිඥ තිෂ්‍ය වේරගොඩ මහතා පෙනී සිටියේය.  

අගතියට පත් පාර්ශවය වෙනුවෙන් බව කියමින් නීතිඥ සජීව ගමගේ මහතා පෙනී සිටියේය.

අපරාධ පරීක්ෂණ දෙපාර්තමේන්තුව වෙනුවෙන් එහි මිනීමැරුම් විමර්ශන අංශයේ ස්ථානාධිපතිවරයා පෙනී සිට තිබුණි.

(පෙර පුවත; 2024 නොවැම්බර් 27; පෙ .ව. 11:39)

මාධ්‍යවේදී තරිඳු ජයවර්ධනට එරෙහිව CIDය ගොනු කළ නඩුව අද

පාස්කු ප්‍රහාරයට අදාල තොරතුරු වාර්තා කිරීම ගැන අපරාධ පරීක්ෂණ දෙපාර්තමේන්තුව සහ නීතිඥවරයකු විසින් මාධ්‍යවේදී තරිඳු ජයවර්ධනට එරෙහිව නියෝගයක් ඉල්ලා සිටි නඩුව අද (27) කොටුව මහේස්ත්‍රාත් අධිකරණය හමුවේ කැඳවීමට නියමිතය.

පාස්කු ඉරිදා ප්‍රහාරයෙන් තුවාල ලැබූ නීතීඥ මෝදිත්ත මහතා  වෙනුවෙන් (අගතියට පත් පාර්ශ්වය ලෙස) අධිකරණයේ පෙනී සිටි නීතීඥ සංජය ගමගේ පසුගිය නඩු වාරයේදී අධිකරණය හමුවේ කරුණු දක්වීමට  අවසර  ඉල්ලා සිටියේය.

එදින අධිකරණ රෙජිස්ට්‍රාර්වරයා මැතිවරණ රාජකාරි සඳහා ගොස් තිබූ අතර එම නඩුවේ මුල් ලේඛනය  සේප්පුවේ  රඳවා තබා තිබුණි.

අනතුරුව, එහි යතුර රෙජිස්ටාර්වරයාගේ භාරයේ  බැවින් නඩුව අද (27) දක්වා කල් තැබුණි.

ඒ අනුව මෙම නඩුව අද කැඳවීමට නියමිතය.

පසුගිය නඩු දිනයේදී මාධ්‍යවේදී තරිඳු ජයවර්ධන වෙනුවෙන් නීතීඥ තිෂ්‍ය වේරගොඩ ඇතුළු නීතිඥවරු කණ්ඩායමක් පෙනී සිටියහ.

මින් පෙර පාස්කු ප්‍රහාරයට අදාළව ජ්‍යෙෂ්ඨ නියෝජ්‍ය පොලිස්පති රවී සෙනවිරත්න මහතාට එරෙහිව විශ්‍රාමික නියෝජ්‍ය පොලිස්පති පාලිත සිරිවර්ධන මහතා කළ පැමිණිල්ලකට අදාළ විමර්ශනයට මාධ්‍යවේදී තරිඳු ජයවර්ධන දිගින් දිගටම බාධා කරන බැවින් ඒ සම්බන්ධයෙන් විමර්ශනයක් කර ඊට අදාළ ප්‍රගතිය වාර්තා කරන බව අපරාධ පරීක්ෂණ දෙපාර්තමේන්තුවේ මිනීමරුම් විමර්ශන අංශයේ හිටපු ස්ථානාධිපති පොලිස් පරීක්ෂක ඉන්දුක සිල්වා කොටුව මහේස්ත්‍රාත් අධිකරණයට දී තිබුණි.

ඒ අනුව විමර්ශනයේ  ප්‍රගතිය  අධිකරණයට දැනුම් දෙන ලෙස කොටුව මහේස්ත්‍රාත්වරයා නියෝග කලේය.

මෙම සිද්ධිය සම්බන්ධයෙන්  මාධ්‍යවේදී තරිඳු ජයවර්ධන මහතා මීඩියා එල් කේ යූටියුබ් නාලිකාව හරහා විමර්ශනයට දිගින් දිගටම බලපෑම් කරන බව අපරාධ පරීක්ෂණ දෙපාර්තුමේන්තුව දැනුම් දී තිබුණි.

ජනමාධ්‍යවේදියාගේ වාර්තාකිරීම් නිසා විමර්ශනයට දැඩි හානියක් හා විශාල බලපෑමක් එල්ල වී තිබෙන බවද අපරාධ පරීක්ෂණ දෙපාර්තුමේන්තුව සඳහන් කර තිබේ.

ඒ අනුව ඔහු සම්බන්ධයෙන් විමර්ශනය කර ඊට අදාළව ගන්නා  ක්‍රියාමාර්ග ඉදිරියේදී අධිකරණයට දැනුම් දෙන බව අපරාධ පරීක්ෂණ දෙපාර්තුමේන්තුව දැනුම් දුන්නේය.

මේ අතර පාස්කු ඉරිදා ප්‍රහාරයෙන් තුවාල ලැබූ නීතීඥ මෝදිත්ත මහතා වෙනුවෙන් (අගතියට පත් පාර්ශ්වය ලෙස) අධිකරණයේ පෙනී සිටි නීතීඥ සංජය ගමගේද මේ සම්බන්ධයෙන් අධිකරණය හමුවේ කරුණු දක්වීමට  අවසර  ඉල්ලා සිටියේය.

තරුණ ජනමාධ්‍යවේදීන්ගේ සංගමයේ සභාපතිවරයා වන තරිඳු ජයවර්ධන මහතා 2019 අප්‍රේල් මාසයේ සිදුවූ පාස්කු ඉරිදා ප්‍රහරය ගැන එම වසරේ සිටම දිගින් දිගටම කරුණු අනාවරණය කලේය.