අලුත් නීතියක් සම්පාදනය වන තෙක් පරණ නීතියට අනුව පළාත් සභා මැතිවරණය පැවැත්විය හැකි බව මැතිවරණ කොමිසමේ සභාපති ආර්. එම්. ඒ. එල් රත්නායක මහතා වෙත ලිපියක් යොමුකරමින් දේශපාලන විශ්ලේෂක හා ජ්‍යෙෂ්ඨ මාධ්‍යවේදී කුසල් පෙරේරා මහතා පෙන්වා දී තිබේ.
ඔහු සිය ලිපිය මගින් කිසිදු රාජ්‍ය අධිකාරයකින්, ආයතනයකින් හෝ දේශපාලන පක්ෂයකින් අවසරයක් ලබා ගැනීමේ අවශ්‍යතාවක් නොමැතිව පළාත් සභා මැතිවරණය පැවැත්වීම සඳහා මැතිවරණ කොමිසමට හැකි පහසු ඉක්මන් දිනයක් තීන්දු කරන මෙන්ද සිය ලිපිය මගින් ඉල්ලීමක් කර ඇත.
පෙරේරා මහතා විසින් මැතිවරණ කොමිසමට යවන ලද ලිපිය පහත දැක්වේ.
2025 මැයි 21 වන දින
ආර්. එම්. ඒ. එල් රත්නායක
සභාපති
ශ්‍රී ලංකා මැතිවරණ කොමිසම
මැතිවරණ ලේකම් කාර්යාලය
තැ. පෙ. අංක 02
සරණ මාවත
රාජගිරිය
[email protected]
සභාපති තුමනි,
දිගු කාලයක් ප්‍රමාද කෙරුණු සහ මැතිවරණ කොමිසම මග හරින පළාත් සභා නීතිය සම්බන්ධයෙනි
දිගු කලක් ප්‍රමාද කෙරුණු පළාත් සභා මැතිවරණය බොහෝ විට මේ වසර අග හෝ ලබන වසර ආරම්භයේ පැවැත්වීමට ආණ්ඩුව කල්පනා කරන බැවින්, “ආණ්ඩුව ඒ සම්න්ධව තවම මැතිවරණ කොමිසම විමසා නැත” මැයෙන් වූ ප්‍රවෘත්තියක් පසුගිය මැයි 20 වන දින “ද මෝනිං” පුවත් පතෙහි මම කියවූයෙමි.
එම ප්‍රවෘත්ති වාර්තාවෙහි, “පළාත් සභා මැතිවරණය පැවැත්වීමට නම්, එක්කෝ සීමා නිර්ණ කටයුතු සම්පූර්ණ කළ යුතුයි. නැතිනම්, පරණ ක්‍රමයට මැතිවරණය පැවැත්වීමට පවතින නීතිය සංශෝධනය කළ යුතුයි. මෙයින් එකක් සිදු කළ යුතුයි” යනුවෙන් ඔබ පැවසූ බැව් සඳහන්ව තිබිණ.
මෙය කිව යුතු ය. මෙය පැරණි, අවලංගු වූ තර්කයකි. ඔබට පෙර මැතිවරණ කොමිසමේ සභාපති වූ මහින්ද දේශප්‍රිය ද ආණ්ඩුවේ දේශපාලනය සමග ගැට ගැසෙන්නට එය යොදා ගත්තකි. මීට සය වසරකට පෙර 2019 අප්‍රේල් 19 වන දින මා “ඩේලි මිර” පුවත් පතට ලියූ “අප රැගෙන යන්නට ලොල් දේශපාලන අවුල” මැයෙන් වූ ලිපියෙහි මේ හොර ගල් ඇහිලීම ගැන මම මෙසේ ලීවෙමි. “නව නීති සම්පාදනයට මැදිහත්වීමේ වගකීමක් මැතිවරණ කොමිසමට හෝ එහි සභාපතිට නැත. ඔවුන්ගේ වගකීම වන්නේ පවතින නීතිය ක්‍රියාත්මක කිරීම ය. මැතිවරණ කොමිසම නොකරන්නේද එයම ය. ඒ වෙනුවට ඔවුන්ගෙන් කෙරෙන්නේ මේ රටේ තවමත් වලංගු නීතිය වන 1988 අංක 02 දරණ පළාත් සභා මැතිවරණ පනත උල්ලංඝණය කිරීම ය”.
සභාපති තුමනි, මෙය අදටත් සත්‍ය වන අතර අදටත් වලංගු ය. “ද මෝනිං” පුවත් පතේ ප්‍රවෘත්තියෙන් ඉහතින් උපුටා දැක්වුනු ඔබගේ තර්කය, පවතින නීතියෙහි වලංගුභාවය සම්බන්ධ විකෘතියකි. ඔබට අනුව, 2018 නොවැම්බර දක්වා බලාත්මක වූ සීමා නිර්ණ කොමිසම මගින් තීන්දු කළ නව සීමා නිර්ණ මත පවතින නීති සංශෝධනය කිරීමේ ක්‍රියාවලිය පාර්ලිමේන්තුව මගින් අරඹා ඇති හෙයින්, මැතිවරණ පැවැත්වීමට දැන් නීතියක් නැත. ඒ අනුව ඔබ කියන්නේ, එක්කෝ සීමා නිර්ණ ක්‍රියාවලිය සම්පූර්ණ කළ යුතුය. නැතිනම් පවතින නීතිය සංශෝධනය කළ යුතු යැයි කියා ය.
ඔබ කියන අයුරු අලුත් නීතියක් සම්පාදනය වන තෙක් පරණ නීතිය අත හැර දැමෙන්නේ නැති බව කවුරුත් දන්නා කාරණාවකි. පාර්ලිමේන්තු ක්‍රියාවලිය අවසන් කරමින් සම්මත වූ පනතකට කතානායක සිය අත්සන තබන තෙක් එය බලාත්මක නොවන හෙයින්, එතෙක් පවතින නීතය බලාත්මකව පවතින්නේය. එයට මූලික සරළ හේතුව නම්, සමාජයක නෛතික හිඩැසක් රික්තයක් පැවතිය නොහැකි වීමය. මේ කාරණයේදී ඔබ දක්වන අදහස අනුව, 2017 සැප්තැම්බරයේ සිට ශ්‍රී ලංකාවේ පළාත් සභා මැතිවරණ නීතියක් තිබී නැත. එවගේම කවදා හෝ දවසක සීමා නිර්ණ ක්‍රියාවලිය සම්පූර්ණ කිරීමට නැතිනම් පවතින නීතිය සංශෝධනය කිරීමට ආණ්ඩුව තීන්දු කරන තෙක් පළාත් සභා සඳහා මැතිවරණ නීතියක් නොතිබෙනු ඇත.
ඔබ කියන අයුරු, කවදා හෝ සීමා නිර්ණ කටයුතු සම්පූර්ණ කිරීමට හෝ පවතින නීතිය සංශෝධනය කරන්නට ආණ්ඩුව තීන්දු කරන තෙක්, පළාත් සභා මැතිවරණ අත්හිටුවා තැබීම ඔබගේ වගකීම නොවේ. ඔබගේ වගකීම වන්නේ “ස්වාධීන” කොමිසමක් ලෙස මැතිවරණ කොමිසම සහ එහි සභාපති ලෙස ඔබව නඩත්තු කරන මේ රටේ බදු ගෙවන්නන්ගේ ස්වෛරී අයිතිය බොල් තර්ක මත සහ දේශපාලන අවශ්‍යතා මත උල්ලංඝණය නොවන ලෙස ආරක්ෂා කිරීම ය.
ඒ අනුව මා ඔබෙන් ඉල්ලා සිටින්නේ, කිසිදු රාජ්‍ය අධිකාරයකින්, ආයතනයකින් හෝ දේශපාලන පක්ෂයකින් අවසරයක් ලබා ගැනීමේ අවශ්‍යතාවක් නොමැති පළාත් සභා මැතිවරණය පැවැත්වීම සඳහා මැතිවරණ කොමිසමට හැකි පහසු ඉක්මන් දිනයක් තීන්දු කරන මෙන් ය.
ස්තුතියි.
මෙයට විශ්වාසී,
කුසල් පෙරේරා
බෙල්ලන්විල
පිටපත් – කොමිසමේ සියලු සභිකයින් වෙත
සියලු මාධ්‍ය වෙත
පුවත්4 days ago
පුවත්6 days ago
පුවත්3 days ago
පුවත්1 week ago
පුවත්5 days ago