මිදිගම දී පුද්ගලයෙකුට වෙඩිතබා ඝාතනය කර තවත් පුද්ගලයින් දෙදෙනෙකුට බරපතළ තුවාල සිදුකිරීමේ සිද්ධියට සම්බන්ධ සැකකරුවන් 8 දෙනෙකු මාතර කොට්ඨාස අපරාධ විමර්ශන කාර්යාංශය විසින් අත්අඩංගුවට ගෙන තිබේ.

පසුගිය සැප්තැම්බර් මස 19 වන දින මිදිගම පොලිස් වසමේ ගොවියාපාන ප්‍රදේශයේදී යතුරු පැදියකින් පැමිණ ගිනිඅවිවලින් වෙඩිතබා මෙම ඝාතනය සිදුකලේය.

වෙඩිතැබීම සිදුකළ සැකකරු, අපරාධයෙන් පසු ගිනිඅවිය සහ පතරොම් 05ක් ළඟ තබා ගෙන සිටි සැකකරුවෙකු සහ අපරාධයට ආධාර අනුබල දුන් තවත් සැකකරුවන් 05 දෙනෙකු සහ සැකකාරියක් ඊයේ (03) වැල්ලවාය, අහංගම හා මිදිගම ප්‍රදේශවලදී අත්අඩංගුවට ගත් බව පැවසේ.

පසුව ඔවුන්ව මාතර පොලිස් ස්ථානය වෙත ඉදිරිපත් කර ඇති අතර, වෙඩි තැබීමෙන් පසු අවිය ප්‍රවාහනය සඳහා යොදා ගත් ත්‍රිරෝද රථයද පොලිස් භාරයට ගෙන තිබුණි.

අත්අඩංගුවට ගත් සැකකරුවන් අවුරුදු 20 ත් 42 ත් අතර වයස්වල පසුවන අහංගම, වැලිගම හා වැල්ලවාය ප්‍රදේශවල පදිංචිකරුවන් වන අතර, සැකකාරිය වයස අවුරුදු 41ක් වන අහංගම ප්‍රදේශයේ පදිංචිකාරියකි.

පිස්තෝල අවිය සන්තකයේ තබා ගෙන සිටි සැකකරු සන්තකයේ තිබී හෙරොයින් ජාවාරමෙන් උපයාගත් බවට සැකකරන මුදල් රුපියල් 1,542,000/- පොලිස් භාරයට ගෙන ඇති අතර, මොහු විදේශ රටක සිට මෙරට සංවිධානාත්මක අපරාධ හා මත්ද්‍රව්‍ය ජාවාරම් සිදුකරනු ලබන පුද්ගලයෙකුගේ සමීපතමයෙකු බවට අනාවරණය වි තිබේ.

මාතර කොට්ඨාස අපරාධ විමර්ශන කාර්යංශය වැඩිදුර විමර්ශන සිදුකරනු ලබයි.