මෙරටට පැමිණෙන යුක්රේනය, නයිජීරියාව, බල්ගේරියාව සහ ඉන්දියානු ජාතිකයන් අන්තර්ජාලය ඔස්සේ සූක්ෂම අයුරින් සිදු කරන මහා පරිමාණ මුදල් වංචාවන් සමස්ත බැංකු පද්ධතියටම බරපතළ තර්ජනයක් වී ඇතැයි අපරාධ පරීක්ෂණ දෙපාර්තමේන්තුව, අධිකරණයට ඊයේ (30) දැනුම් දුන්නේය.

මෙම විදෙස් ජාතික සැකකරුවන් සමාජ මාධ්‍ය හරහා සංවිධානය වෙමින් ඉතිරි කිරීම් හා ස්ථාවර තැන්පතු ගිණුම්වල පවතින මුදල් ද අන්තර්ජාල පිවිසුම් මගින් වංචා කර ඇතැයි අධිකරණයට දන්වා සිටි අපරාධ පරීක්ෂණ දෙපාර්තමේන්තුවේ නිලධාරීන්, අදාළ සිද්ධිය හේතුවෙන් මෙරට බැංකු පද්ධතිය කඩාවැටී ආර්ථිකයට දැඩි හානියක් සිදු විය හැකි බව ද පෙන්වා දුන්නේය.

මෙම සැකකරුවන් සිදු කර ඇති අපරාධය මෙරට බැංකු පද්ධතිය හා ගිණුම් හිමියන් අධෛර්යමත් කරන ක්‍රියාවක් බවද අපරාධ පරීක්ෂණ දෙපාර්තමේන්තුවේ නිලධාරීන්, කොළඹ ප්‍රධාන මහෙස්ත්‍රාත් තිලිණ ගමගේ මහතා වෙත වාර්තාවක් ඉදිරිපත් කරමින් දන්වා සිටියේය.

සම්පත් බැංකුවෙ තම බැංකු ගිණුමට අනවසරයෙන් ඇතුළු වී රුපියල් 18,10,000 ක මුදලක් ලබාගෙන වංචා කරන ලදැයි කඩවත, ගනේමුල්ල පාර පදිංචි අයේෂා කාංචනී බොතේජු නමැත්තිය විසින් කරන ලද පැමිණිල්ලක් පිළිබඳව විමර්ශනය කිරීමේදී අදාළ අපරාධය පිළිබඳ තොරතුරු අනාවරණය වූයේ යැයිද අපරාධ පරීක්ෂණ දෙපාර්තමේන්තුවේ නිලධාරීන් අධිකරණයට දන්වා සිටියේය.

සම්පත් බැංකුවේ 35 වැනි සංවත්සරය වෙනුවෙන් දිනුම් ඇදීමක් පවතින බවට මුහුණුපොත ඔස්සේ පළවූ දැන්වීමක් දැක, ඒ වෙත සිය බැංකු ගිණුම් පිළිබඳ තොරතුරු ලබාදීමෙන් අනතුරුව පැමිණිලිකාරිය අදාළ වංචාවට හසුවී ඇතැයි ද අපරාධ පරීක්ෂණ දෙපාර්තමේන්තුවේ නිලධාරීන් දන්වා සිටියේය.

මෙම වංචාවට අදාළව යුක්රේන් ජාතිකයන් වන Liubomyr shvets සහ Nikita arhunov සැකකරුවන් දෙදෙනා අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන අධිකරණය හමුවට ඉදිරිපත් කර තිබිණි.

එම සැකකරුවන් දෙදෙනා මෙම මස 10 වන දින තෙක් රිමාන්ඩ් භාරයේ තබන ලෙස ප්‍රධාන මහෙස්ත්‍රාත්වරයා නියෝග කළේය.

මෙම අපරාධයට සම්බන්ධ සියලු විදේශ ජාතික සැකකරුවන් සහ ඔවුන්ට අන්තර්ජාලය හරහා මුදල් වංචාවන් සිදු කිරීමට පහසුකම් සපයන ලද මෙරට සියලු පුද්ගලයන් වහාම අත්අඩංගුවට ගන්නා ලෙසද ප්‍රධාන මහෙස්ත්‍රාත්වරයා අපරාධ පරීක්ෂණ දෙපාර්තමේන්තුවට නියෝග කළේය.

සබැඳි පුවත්
සම්පත් බැංකුවේ CEO ට අධිකරණ නියෝගයක් ! 

සම්පත් බැංකුවේ මහ වංචාවකට ලොක්කෝ 5කට රටයාම අධිකරණය තහනම් කරයි
සම්පත් හා DFCC බැංකු වලට මහබැංකුවෙන් දඩ