හිටපු අමාත්‍ය මහින්දානන්ද අලුත්ගමගේ මහතා විදෙස්ගතවීම සඳහා ඊයේ (10) රාත්‍රියේ කටුනායක ගුවන්තොටුපොළ වෙත පැමිණි අවස්ථාවේ ඔහු විදෙස්ගතවීම වැළැක්වීමට ආගමන විගමන පාලක නිලධාරීන් කටයුතු කර තිබේ.
ඒ, ඔහුට එරෙහිව මතුගම අධිකරණයෙන් ලබාගත් විදෙස් ගමන් තහනමක් ඇති බව පවසමිනි.
ඒ අනුව මහින්දානන්ද අලුත්ගමගේ මහතා සිය විදෙස් ගමන අවලංගු කර ඇත.
කෙසේවෙතත් මහින්දානන්ද අලුත්ගමගේ මහතා සඳහන් කර ඇත්තේ තමන්ට එරෙහිව එවැනි කිසිදු නඩු කටයුත්තක් හෝ විදෙස් ගමන් තහනමක් මතුගම අධිකරණයකින් පනවා නොමැති බවය.
මේ සම්බන්ධයෙන් මන්ත්‍රීවරයා ආගමන විගමන පාලකවරයාවද අද දැනුම්වත් කර තිබේ.
මේ අතර, දත්ත පද්ධතියේ දෝෂයක් හේතුවෙන් මෙවැනි වැරැදීමක් සිදුවන්නට ඉඩ ඇතැයි සිදුකළ මූලික සොයාබැලීමකදී පෙනී ගොස් ඇති බව ආගමන විගමන පාලකවරයා මාධ්‍යට පවසා තිබේ.
කෙසේවෙතත් මීට සත්‍ය වශයෙන්ම බලපෑ හේතුව කුමක්දැයි අනාවරණය කරගැනීම සඳහා ලබන සඳුදා පරීක්ෂණයක් පවත්වන බව ආගමන විගමන පාලකවරයා වැඩිදුරටත් පවසා තිබේ.
පරීක්ෂණ අවසන්වනතුරු මෙම සිද්ධිය හා සම්බන්ධ ආගමන විගමන දෙපාර්තමේන්තුවේ නිලධාරීන් දෙදෙනෙකුගේ වැඩ තහනම් කිරීමට ආගමන විගමන පාලකවරයා පියවර ගෙන තිබේ.
මහින්දානන්ද අලුත්ගමගේ හිටපු අමාත්‍යවරයාට කොළඹ මහාධිකරණයෙන් මීට පෙර විදෙස් ගමන් තහනමක් පනවා තිබූ නමුත් ඒ මහතා අධිකරණයට කරුණු දැක්වීමකින් පසු අදාළ තහනම ඉවත් කිරීමට පියවර ගෙන තිබුණි.
මහින්දානන්ද අලුත්ගමගේ හිටපු අමාත්‍යවරයාගේ දත්ත සම්බන්ධයෙන් පද්ධතියේ පැවති දෝෂය නිවැරදි කිරීමෙන් අනතුරව ඔහුට විදෙස්ගතවීම සඳහා අද (11) අවසර ලබාදුන් බවද ආගමන විගමන පාලකවරයා පවසා ඇත.
