මෙරට පුද්ගලයන්ගෙන් හරි අඩකටත් වැඩි පිරිසකට පිළිගත් මූල්‍ය ආයතනයකින් ණයක් ලබා ගැනීමට නොහැකි වන පරිදි ණය තොරතුරු කාර්යාංශයේ (ක්‍රිබ්) ලේඛනගත වී ඇති බව ශ්‍රී ලංකා ණය තොරතුරු කාර්යාංශයේ සාමාන්‍යාධිකාරී පුෂ්පික ජයසුන්දර මහතා මාධ්‍ය වතෙ දැනුම් දී තිබේ.
දකුණු ආසියානු කලාපයේ සෙසු රටවලට සාපේක්‍ෂව ශ්‍රී ලාංකිකයන්ගේ ණය කළමනාකරණය පිළිබඳ දැනුම ඉතා අවම මට්ටමක පැවතීම මීට හේතුව බව ද ජයසුන්දර මහතා සඳහන් කරයි.
බොහොමයක් පුද්ගලයන් සිය ණය හා ලීසිං වාරික නිසි පරිදි ගෙවා ඇතත් ඇතැම් මූල්‍ය සමාගම් එම තොරතුරු නිසි පරිදි යාවත්කාලීන නොකිරීම ද මෙම තත්ත්වයට හේතු වී ඇතැයි ද ඒ මහතා පෙන්වාදෙයි.
මෙම තත්ත්වය නිවැරදි කිරීමේ අරමුණින් ණය කළමනාකරණය පිළිබඳ මෙරට ජනතාව දැනුවත් කිරීම සඳහා ශ්‍රී ලංකා ණය තොරතුරු කාර්යාංශය මේ වනවිට පියවර රැසක් ගෙන ඇත.
ඒ යටතේ ඕනෑම පුද්ගලයකුට මූල්‍ය සමාගමකට නොගොස් ශ්‍රී ලංකා ණය තොරතුරු කාර්යාංශයේ http://www.crib.lk වෙබ් අඩවිය ඔස්සේ සිය ණය තොරතුරු වාර්තාව ලබා ගැනීමේ පහසුකම් සපයා ඇතැයි ද සාමාන්‍යාධිකාරිවරයා කීවේය.
මේ අතර, ආර්ථික විශ‌ේෂඥයින් පෙන්වා දෙන්නේ CRIB එක ණය හා බැංකු පද්ධතියේ ආරක්ෂාවේ මෙවලමක් වුවද, ඉන් මෙරටට ආර්ථික බංකොලොත් බවින් මිදීමට විශාල අභියෝගයක් එල්ල කර ඇති බවයි.
විශේෂයෙන් ලංකාවේ අවිධිමත් ගනුදෙනු වර්ධනයට CRIB තොරතුරු බලපා ඇති බවයි.
ඒ CRIB එකේ තොරතුරු අඩංගු අයකුට බැංකු පද්ධතියෙන් ණය ගැනීමට නොහැකියාව හේතුවෙන් ඔවුන් විකල්ප ආයෝජන ලබා ගැනීමට ගොස් අවසානයේ ව්‍යාපාර පවා විනාශකර ගන්නා බවයි.
එය සියදිවි නසා ගැනීම් වැඩි කිරීමට ද හේතු සපයන බව ඔවුන් පෙන්වා දෙයි.
