රාජ්‍ය ඇමැතිවරුන් නඩත්තුව සඳහා මාසයකට රුපියල් කෝටි දහයකට අධික මුදලක් වැය වන බැවින් ඔවුන්ට ඉල්ලා අස්වෙන්නැයි  කළුතර දිස්ත්‍රික් පාර්ලිමේන්තු මන්ත්‍රි ලලිත් එල්ලාවල මහතා යෝජනාවක් ඉදිරිපත් කර තිබේ.

එසේම රාජ්‍ය ඇමැතිවරුන් නඩත්තුව සඳහා වැය කරන මුදල රෝහල්වලට ඖෂධ ගෙන්වීමට වෙන් කන්නැයි ද ඔහු ඉල්ලා සිටී.

රටේ වත්මන් තත්ත්වය සම්බන්ධයෙන් කරුණු දැක්වීම සඳහා කළුතරදී ඊයේ (26 ) පැවැති මාධ්‍ය හමුවක දී මේ බව කී ඒ මහතා මෙසේද සඳහන් කළේය.

‘‘පසුගිය මැයි මාසයේ සිට මහරගම පිළිකා රෝහලේ ඇති පෙට් ස්කෑන් යන්ත්‍රයෙන් සිදු කරන පරීක්ෂණ කටයුතු නවත්වා තිබෙනවා. මේ හේතුවෙන් පිළිකා රෝගින් බලවත් පීඩාවට පත්ව සිටිනවා. පිළිකා රෝගියකුට මෙම පරීක්ෂණය පෞද්ගලික රෝහලකින් කරන්න රුපියල් ලක්ෂ තුනක මුදලක් වැය වෙනවා.

රෝහල්වල බෙහෙත් නෑ, බෙහෙත් තුණ්ඩුව ලියන්නෙ ෆාමසියට. රටේ බහුතරයක් මිනිස්සුන්ට කන්න නෑ. මෙහෙම තත්ත්වයක රට තියාගෙන නැවතත් මැති ඇමැතිවරුන් සුපුරුදු විදිහට රට සවාරි යන්න පුරුදු වෙලා. ඒ විතරක් නොවෙයි තව මන්ත්‍රිවරුන් කිහිපදෙනකුත් කාර්ය මණ්ඩලයේ කිහිපදෙනකුත් අරගෙන තමයි මේ විනෝද සවාරි යන්නේ. මේ සියල්ල ජනතාවගේ බදු මුදල්. මේවා වහාම නැවැත්විය යුතුයි. රාජ්‍ය ඇමැතිවරුන් අද වන විට සතපහක වැඩක් කරන්නේ නෑ, වරප්‍රසාද ටික පමණක් භුක්ති විඳිමින් කටයුතු කරනවා. එම ආයතනවල වැඩ කරන්න මුදල් නෑ, රාජ්‍ය ඇමැතිවරු නඩත්තු කරන්න මාසෙකට කෝටි දහයකට වඩා වැය වෙනවා. මම යෝජනා කරනවා රාජ්‍ය ඇමැතිවරුන්ට ඉල්ලා අස්වෙන්න කියලා. ඒ මුදල් රෝහල්වලට ලබා දී බෙහෙත් ගෙන්වන්න කටයුතු කරන්න. වැඩක් නැතුව ඇමැතිකම් කිරීමේ ඵලය කුමක්ද? සියලු‍ රාජ්‍ය ඇමැතිවරුන් ඉල්ලා අස්වී කැබිනට් ඇමැතිවරුන් විසි දෙනා පාර්ලිමේන්තු මන්ත්‍රිවරු 225න් තෝරගෙන අනිත් මන්ත්‍රිවරු කාරක සභා තුළට පත්වී රටට සේවය කරන්නැයි මම යෝජනා කරනවා.’’