Connect with us

පුවත්

රාජ්‍ය නිලධාරින්ගේ වාහන බලපත්‍ර අහෝසි කර නෑ

Published

on

රාජ්‍ය සේවයේ උසස් නිලධාරින්ට ලබා දෙන වාහන බලපත්‍රය අහෝසි කිරීමට රජය කිසිදු ප්‍රතිපත්තිමය තීරණයක් ගෙන නැතැයි කම්කරු අමාත්‍ය, ආර්ථික සංවර්ධන නියෝජ්‍ය අමාත්‍ය මහාචාර්ය අනිල් ජයන්ත ප්‍රනාන්දු මහතා පාර්ලිමේන්තුවේදී ඊයේ (23) ප්‍රකාශ කළේය.

රාජ්‍ය සේවයේ උසස් නිලධාරීන්ට මේ වන විට වාහන බලපත්‍ර 15,000ත් 20,000ත් අතර සංඛාවක් නිකුත්ව ඇති බවත් වාහන බලපත්‍ර සඳහා මේ මොහොතේ අවස්ථාව ලබාදුනහොත් අපේක්ෂිත ආර්ථික ඉලක්කවලට ළඟාවීම අපහසු වන බවත් ඇමැතිවරයා අවධාරණය කළේය.

ඒ අනුව මේ මොහොතේ පවතින්නේ ප්‍රමුඛතාව පිළිබඳ ගැටලුවක් මිස රාජ්‍ය නිලධාරීන්ට ලබාදෙන වාහන බලපත්‍ර අහෝසි කිරීම ගැන ගැටලුවක් නොවන බව ද කීවේය.

අමාත්‍ය අනිල් ජයන්ත ප්‍රනාන්දු මහතා මේ බව සඳහන් කළේ පාර්ලිමේන්තු මන්ත්‍රී නජිත් ඉන්දික මහතා මතු කරන ලද ප්‍රශ්නයකට පිළිතුරු දෙමිනි.

වාහන ආනයනය කිරීම සඳහා රජය තීරණය කළේ කරුණු ගණනාවක් කෙරෙහි දැඩි අවධානය යොමු කිරීමෙන් පසුව බව ද ඇමැතිවරයා පැවසීය. එවන් පසුබිමක් යටතේ තීන්දු තීරණ ගත යුත්තේ සමස්ත ආර්ථිකය කෙරෙහි අවධානය යොමු කරමින් බව ද ඇමැතිවරයා පැවසීය.

එහිදි වැඩිදුරටත් අදහස් දැක්වූ අමාත්‍යවරයා,

“වාහන ආනයනය නිදහස් කිරීමට පදනම් වුණේ සමස්ත ආර්ථිකය සැලකිල්ලට අරන්. 2025 වසර ක්‍රියාත්මක වන්නේ සාමාන්‍ය තලයක නෙවෙයි. ජාත්‍යන්තර මූල්‍ය අරමුදලේ පරාමිතීන් අනුව කටයුතු කිරීමට අපට සිදු වෙනවා. ඒ වගේම සංචිත ගැන අවධානය යොමු කරන්න වෙනවා

රාජ්‍ය ආදායම, බදු ක්‍රමය මේ සියල්ල ගැනම අවධානය යොමු කරන්නට වෙනවා. රජයට යම් ආදායමක් ලබා දෙන්නත් වෙනවා. වාහන පර්මිට්වලදී, රජයේ උසස් නිලධාරීන්ට ලබාදෙන ප්‍රතිලාභය අහිමි කරන්නට කිසිම අදහසක් නැහැ. මෙම ප්‍රතිලාභය ලබාදීමේදී අතීතයේදී ගත්ත ක්‍රියාමාර්ගවල වැරදි තිබිය හැකියි. නමුත් ඔවුන්ට සාධාරණ වැටුපක් හෝ වෙනත් කරුණු නිසා මේ වරප්‍රසාදය නොලැබුණා විය හැකියි. කෙසේ වෙතත් ඒවා වෙනම අධ්‍යයනය කළ හැකියි. ජාතික ජන බලවේගයේ ආණ්ඩුව විසින් කිසිම තීන්දුවක් අරගෙන නැහැ වාහන බලපත්‍ර අහෝසි කිරීමට. නමුත් මේ වසරට සාපේක්ෂව එන සීමාවන්ගේ පෙළගැස්වීම ප්‍රමුඛතාව අනුව දැනට නිකුත් වී ඇති බලපත්‍ර ප්‍රමාණය ගත්තම විශාල ප්‍රමාණයක්. එය 15,000ක් – 20,000ක් පමණ වෙනවා. විදේශීය සංචිත පිළිබඳව අවධානය යොමුකර පර්මිට්වලට ඉඩ ඇරියොත් අපගේ ඉලක්කවලට ළඟාවීමට බැරිව යනවා. ඒ නිසා ප්‍රමුඛතාව පිළිබඳ ප්‍රශ්නයක් මිස අහෝසි කිරීමට කිසිදු ප්‍රතිපත්තිමය තීරණයක් අරගෙන නැහැ”.

එමෙන්ම පාර්ලිමේන්තු මන්ත්‍රීනි ලක්මාලි හේමචන්ද්‍ර මෙණෙවිය මතු කරන ලද ප්‍රශ්නයක් සඳහා ඇමැතිවරයා මෙසේ ද පැවසීය.

“ජාත්‍යන්තර මූල්‍ය අරමුදලේ විවිධ එකඟතා අනුව අපට කටයුතු කිරීමට සිදු වෙනවා. ඒ වගේම පැවැති තත්ත්වය අනුව වසර ගණනාවක් වාහන ආනයනය නතර කර තිබුණා. වාහන ආනයනය කිරීමට යම් ඉඩක් ලබාදිය යුතුයි කියන මතයේ අපි ඉන්නවා. ඒ වගේම ආර්ථිකය ප්‍රසාරණය වීමේදී නිෂ්පාදනය වැඩි වෙන කොට වාහන අවශ්‍ය වෙනවා. ඒ නිසා පියවර කිහිපයක් යටතේ, අදියර කිහිපයක් යටතේ කටයුතු කිරීමට අපට සිදු වෙනවා. එහිදි ආර්ථිකයට සම්බන්ධ වන කොටසට තමයි මූලික අවස්ථාව ලබා දුන්නේ. ඒ වගේම භාණ්ඩ ප්‍රවාහනය සඳහා දෙවනුවත් තෙවනුව පෞද්ගලික වාහන සඳහාත් අවස්ථාව ලබාදීමට තීරණය කර තිබෙනවා.

අපි තේරුම්ගත යුතුයි සිරවෙලා, වට්ටලා තිබුණු තැනකදී වාහන ආනයනයේදී විදෙස් සංචිත මෙතෙන්ට බලපානවා. දේශීය සංචිතවල යම් වර්ධනයක් තිබෙනවා, ඩොලර් බිලියන 6 ඉක්ම වන පරිදි. වාහන ආනයනය සඳහා ඒ සියල්ල භාවිත කරන්නත් බැහැ. ඉල්ලුමට සරිලන පරිදි වෙළෙඳපොළ විවෘත කළොත් මේ සංචිත සියල්ල අවසාන වෙන්න පුළුවන්. මෙතනදී සැලකිය යුතු මට්ටමක් කෙරෙහි තමයි අපට අවධානය යොමු කරන්න පුළුවන් වෙන්නේ. ඒ අනුව මුදල් අමාත්‍යාංශය හා මහ බැංකුව දෙන උපදෙස්, විශ්ලේෂණ සැලකිල්ලට ගෙන ඉදිරියට ගෙන යනවා. ලීසිං සමාගම් ආරක්ෂා කර ගැනීම වෙනුවෙන් විවිධ උත්සාහයන් දරනවා කියලා සමාජ මාධ්‍ය තුළත් විවිධ මත පළ වෙනවා. නමුත් ජාතික ජන බලවේගයේ ආණ්ඩුව කිසිම පුද්ගලයෙක්, කණ්ඩායමක් ආරක්ෂා කර ගැනීම වෙනුවෙන්, එක් පිරිසකට පහර දීම වෙනුවෙන් කටයුතු කරන්නේ නැහැ. සමස්තය ආරක්ෂා කර ගැනීම වෙනුවෙන් කටයුතු කරනවා.

ඒ වාහන ආනයනය කිරීමට කලින් මිල වැඩි වීම වුණොත් උද්ධමනයට සාපේක්ෂව මිල ගණන් ගැළපීමක් සිදු කළ යුතුයි. ඒ උද්ධමන අනුපාතය අනුවයි මිල ගණන් වැඩි වීම සිදුව ඇත්තේ. තෝරා ගත්ත කණ්ඩායමක් ආරක්ෂා කිරීමටවත්, තෝරා ගත්ත කණ්ඩායමකට අසාධාරණයක් සිදු කිරීමටවත් ජාතික ජන බලවේගය කටයුතු කරන්නේ නැහැ. එසේ තීන්දු තීරණ ගන්නෙත් නැහැ.”

පුවත්

දත්ත වංචා චෝදනා ඇති “එපික්”හි මෘදුකාංග පාස් පෝට් ඔෆිස්එකෙන් අයින් කරන්න නඩුවක් දාලා

Published

on

By

ජාතික ඖෂධ නියාමන අධිකාරිය සහ විද්යුත් ගමන් බලපත්‍ර නිකුත් කිරීමේ කටයුතු සඳහා එපික් ලංකා සමාගමේ මෘදුකාංග භාවිතා කිරීම වළක්වාලන අතුරු තහනම් නියෝගයක් නිකුත් කරන ලෙස ඉල්ලා සිවිල් අයිතිවාසිකම් පිළිබඳ වෛද්‍යවරුන්ගේ සංගමය විසින් ගොනුකර තිබූ මූලික අයිතිවාසිකම් පෙත්සම සලකා බැලීම සඳහා ජූනි 09 දා කැඳවන ලෙස ශ්‍රේෂ්ඨාධිකරකරණය ඉකුත් 08දා නියෝග කළේය.

මෙම පෙත්සම යසන්ත කෝදාගොඩ සහ සම්පත් අබේකෝන් යන මහත්වරුන්ගේ සමනවිත ශ්‍රේෂ්ඨාධිකරණය විනිසුරු මඩුල්ල ඉදිරියේ කැඳවනු ලැබූ අවස්ථාවේදී වග උත්තර කරුවන් වෙනුවෙන් නීතිපතිවරයා පමණක් අධිකරණය හමුවේ පෙනී සිටියේය.

ඒ අනුව සෙසු වගඋත්තරකරුවන්ට නොතිසියැවීමට පියවර ගන්නා ලෙසත් විනිසුරු මඩුල්ල විසින් පෙත්සම්කාර පාරිශ්‍රවයේ නීතිඥවරුන්ට දැනුම් දුන්හ. 

මෙම පෙත්සමේ වග උත්තරකරුවන් ලෙස එපික් ලංකා සමාගම, නීතිපතිවරයා ඇතුළු පිරිසක් නම් කරනු ලැබ සිටිති.

පෙත්සම්කරුවන් කියා සිටින්නේ වග උත්තරකාර එපික් ලංකා සමාගම විසින් නිර්මාණය කරන ලද මෘදුකාංගය ඖෂධ නියාමන අධිකාරිය මෙන්ම විද්‍යුත් ගමන් බලපත් නිකුත් කිරීමේ කටයුතු සඳහා මේ වනවිටත් යොදා ගන්නා බවයි. 

ඉකුත් කාලයේ ජාතික ඖෂධ නියාමන අධිකාරියේ දත්ත පද්ධතිය හරහා දත්ත වංචාවක් සිදු වී ඇති බවට කරුණු වාර්තා වී තිබුණු බවත් පෙත්සම්කරු සඳහන් කරයි.

එම වාතාවරණය හමුවේ වග උත්තර කාල සමාගමේ තවදුරටත් භාවිතා කිරීම තුළින් දැඩි අගතියක් සිදුවන බවත් පෙත්සමේ සඳහන් වෙයි.

එබැවින් මෙම කටයුතු සඳහා අදාළ මෘදුකාංගය භාවිතා කිරීම වළක්වාලන හතුරු තහනම් නියෝගයක් නිකුත් කරන ලෙසත් පෙත්සම්කරුවන් ශ්‍රේෂ්ඨාධිකරණයෙන් වැඩිදුරටත් ඉල්ලා සිටියේය.

මෙහිදී පෙත්සම්කාර පාර්ශ්වය වෙනුවෙන් වෙනුවෙන් ජනාධිපති නීතිඥ උදිත ඉගලහේවා පෙනී සිටියේය.

මේ අතර මෙම මූලික අයිතිවාසිකම් පෙත්සම ගොනු කළ පෙත්සම්කරු වන වෛද්‍ය හා සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානයේ සභාපති වෛද්‍ය චමල් සංජීව එම නඩුව විභාගයෙන් අනතුරුව ශ්‍රේෂ්ඨාධිකරකරණ පරිශ්‍රයෙන් පිටතට පැමිණ මාධ්‍යට මෙසේ අදහස් දැක්වීය.

“ජාතික ඖෂධ නියාමන අධිකාරියේ දත්ත පද්ධතිය හරහා සිදු වූ දත්ත වංචාව සහ ඊට සමගාමිව මේ රටේ විදේශ ගමන් බලපත්‍ර නිකුත් කිරීමේදී පාස්පෝර්ට් සදහා වන ටෙන්ඩරය ලබා දීමේ ප්‍රමාදය සහ එම මෘදුකාංග පද්ධතිය නිසි පරිදි රජයේ භාරයට පත් කර නොගැනීම සම්බන්ධයෙන් තමයි අපි මූලික අයිතිවාසිකම් පෙත්සම ගොනු කළේ. මිට පෙර ටෙන්ඩරය ලබා දුන් සමාගමම එම මෘදුකාංගයේ අයිතිය තහවුරු කර ගනිමින් ඒ සම්බන්ධ වන ගාස්තු අය කර ගැනීමට කටයුතු කිරීම නිසා මේ රටේ සාමාන්‍ය මහජනතාවට විදේශ ගමන් බලපත්‍රයක් සදහා ගෙවන්න වෙන මුදල වගේ විශාල මුදලක් පසුගිය කාලයේ දිගින් දිගටම ගෙවන්න සිද්ද වුනා. ඒ වගේම ඉතාම දීර්ඝ කාලයක් තිස්සේ ප්‍රශ්න සහගත සමාගමකට එකවර ටෙන්ඩර් ලබා දීම නිසා ඊට වඩා අඩු මුදලකට සහ වැඩි ප්‍රතිලාභ සහිතව විදේශ ගමන් බලපත්‍ර ලබා ගන්න තියෙන අවස්තාව අහිමි වුනා. නව රජය බලයට පත් වුණත් මේ පිලිබදව දිගින් දිගටම ගැටළු මතු වුණා. මිට පෙර කවුරුන් හෝ කෙනෙක් පාස්පෝර්ට් ටෙන්ඩරය ලබා දීමේදී මේ රටේ මහජනතාවට අවාසියක් වන විදියට කටයුතු කිරීම ගැන රජයටත් අපි කියනවා අපි අධිකරණ ක්‍රියමාර්ග ගන්නා අතරතුර මේ පිළිබද පසු විපරමක් කරලා කරුණාකරලා නිවැරදි ප්‍රසම්පාදන යටතේ මිල අඩු සමාගමකට අවස්ථාව ලබා දෙන්න ඕන.

ඒ වගේම ආගමන විගමන දෙපාර්තමේන්තුව ජාතික ඖෂධ නියාමන අධිකාරියේ දත්ත වංචාවේදී දත්ත පරිපාලනය කල සමාගමටම ආගමන විගමන දෙපාර්තමේන්තුවේ දත්ත පරිපාලනය කරන්න අවස්තාව ලබා දීම ගැන නැවත පසුවිපරමක් කරලා කරුණාකරලා ආගමන විගමන දෙපාර්තමේන්තුවේ මේ රටේ මහජනතාවගේ දත්ත පරිගණකගත කිරීමේ අයිතිය අනිවාර්යෙන්ම ආගමන විගමන දෙපාර්තමේන්තුවේ භාරයට අරගෙන අපේ රටේ ජනතාවගෙන් පාස්පෝර්ට් එකක් ගන්න විට ඒ සදහා අමතරව අය කරන මෘදුකාංග ගාස්තුව අය කර ගැනීම අත්හිටුවන්න කියලා එම දෙපාර්තමේන්තුවෙන් සහ විෂය භාර ඇමතිගෙන් ඉල්ලනවා.”

Continue Reading

පුවත්

පුංචි ආණ්ඩුවට මහ ආණ්ඩුවෙන් මුදල් නැහැ – IMF කොන්දේසියක්

Published

on

By

පළාත් පාලන ආයතන පවත්වාගෙන යාම සඳහා මධ්‍යම රජයෙන් ලැබෙන අරමුදල් 2028 වසරේදී නතර කිරීමට නියමිතව ඇතැයි වාර්තා වේ.

ජාත්‍යන්තර මූල්‍ය අරමුදල ලබාදුන් කොන්දේසි අනුව මෙසේ පළාත් පාලන ආයතන සඳහා ලබාදෙන අරමුදල් 2028 වනවිට නතර කිරීමට සිදුවනු ඇතැයි ශ්‍රී ලංකා අධ්‍යාපන සංසදයේ සම සම්බන්ධීකාරක ආචාර්ය සුජාතා ගමගේ මහත්මිය පැවැසුවාය.

පළාත් පාලන ආයතනවල සේවය කරන සේවකයන්ට වැටුප් ගෙවීම සහ අනෙකුත් පුනරාවර්තන වියදම් සඳහා මේ වනවිට මුදල් වෙන්කරනු ලබන්නේ මධ්‍යම ආණ්ඩුවේ ප්‍රතිපාදන මගිනි.

පළාත් පාලන හා පළාත් සභා අමාත්‍යාංශයට අයවැය මගින් මෙම මුදල් වෙන්කරන අතර පළාත් සභා හරහා පළාත් පාලන ආයතන වෙත අදාළ අරමුදල් ලැබේ.

ඒ අනුව ණය ප්‍රතිව්‍යුහගතකරණය යටතේ ණය ගෙවීම් ආරම්භ වන 2028 වසරේ සිට පළාත් පාලන ආයතන සඳහා මධ්‍යම ආණ්ඩුවේ අරමුදල් නොලැබී යනු ඇතැයි අනාවරණය වේ.

2028 වසරේ සිට පළාත් පාලන ආයතනවල පුනරාවර්තන වියදම් සඳහා කරනු ලබන වෙන් කිරීම් නතර කරන ලෙසට ජාත්‍යන්තර මූල්‍ය අරමුදල මීට පෙර දැනුම් දී තිබෙන බවත්, ඒ පිළිබඳ සාකච්ඡාවක් පවත්වා තිබෙන බවත් පළාත් සභා හා පළාත් පාලන අමාත්‍ය ආචාර්ය චන්දන අබේරත්න මහතා පැවසුවේය.

කෙසේ වෙතත් අවසන් වරට ජාත්‍යන්තර මූල්‍ය අරමුදල ලංකාවට පැමිණ කළ සාකච්ඡාවලදී මේ පිළිබඳ අවධානය යොමු නොවූ බවද අමාත්‍යවරයා වැඩිදුරටත් කීවේය.

මූලාශ්‍රය – අරුණ

Continue Reading

පුවත්

 තරුණයකුගේ වෘෂණ කෝෂ තැලූ සිද්ධියකට “ටීචර් අම්මා” පොලිසිය සොයයි

Published

on

By

පහ ශ්‍රේණිය ශිෂ්‍යත්ව උපකාරක පන්ති පවත්වන ජනප්‍රිය ගුරුවරියක් වන හයේශිකා ප්‍රනාන්දු හෙවත් ‘ටීචර් අම්මා’ අත්අඩංගුවට ගැනීමට පොලීසිය විමර්ශන ආරම්භ කර ඇතැයි වාර්තා වේ.

ඒ, ඇයගේ ආයතනයේ සේවය කළ තරුණයෙකුට පහරදීමේ සිද්ධියක් සම්බන්ධයෙනි.

සිද්ධියට මුහුණදුන් තරුණයා පොලීසියට පවසා ඇත්තේ සමාජ මාධ්‍යයේ පළ වූ පෝස්ටුවකට අදාළව ගුරුවරිය ඇතුළු කිහිපදෙනෙකු විසින් තමන්ට පහර දුන් බවයි. 

එසේම, හයේශිකා ප්‍රනාන්දු විසින් තරුණයාට එල්ල කළ බව කියන පා පහරක් එම තරුණයාගේ වෘෂණ කෝෂවලට වැදී ඇති බවද පැවසේ.

ඒ අනුව පහරකෑමට ලක්වූ එම තරුණයා මීගමුව රෝහලේ නේවාසිකව ප්‍රතිකාර ලබන බවද වාර්තා වේ.

චෝදනාවට ලක්ව සිටින ටීචර් අම්මා නමැති අදාළ ගුරුවරිය අත්අඩංගුවට ගැනීම සඳහා ඇයගේ නිවස සහ උපකාරක පන්ති පවත්වන ස්ථානය පරික්‍ෂා කළද එම ස්ථාන ඉබි යතුරු දමා වසා දමා තිබූ බව පොලිස් ආරංචි මාර්ගවලින් වාර්තා වේ.

ඒ අනුව ඇය ප්‍රදේශයෙන් පලා ගොස් ඇති බවට පොලීසිය සැක පළකරයි.

කෙසේවෙතත් අදාළ තරුණායට පහරදීමේ සිද්ධියට ඇයගේ සැමියා හා ඇයගේ ආයතනයේ කළමනාකරු අත්අඩංගුවට ගත් බවයි පොලීසිය පැවසුවේ. 

ඒ අනුව සැකකරුවන් මීගමුව අධිකරණයට ඉදිරිපත් කිරීමෙන් අනතුරුව ලබන 14 වැනිදා දක්වා රක්ෂිත බන්ධනාගාරගත කර ඇත.

එහිදී අධිකරණය පොලීසියට නියෝග කර ඇත්තේ හයේශිකා ප්‍රනාන්දු හෙවත් ‘ටීචර් අම්මා‘ නම් උපකාරක පන්ති ගුරුවරිය සම්බන්ධයෙන් ඉදිරි විමර්ශන සිදුකර ඇය අත්අඩංගුවට ගෙන අධිකරණයට ඉදිරිපත් කරන ලෙසයි.

Continue Reading
Advertisement

Trending

Copyright © 2023 Sri Lanka Mirror. All Rights Reserved