හිටපු ඇමැතිවරයෙකු වූ රෙජිනෝල්ඩ් කුරේගේ මරණය සිදුවූයේ තමා හා සිදුවූ වචන හුවමාරුවක් බවට නැගෙන චෝදනාව ප්‍රතික්ෂේප කරන බව උත්තරලංකා සභාගයේ නියෝජිත ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රි ගෙවිදු කුමාරතුංග මහතා කියයි.

නැගෙන චෝදනාව ගැන මාධ්‍ය හමුවේ අදහස් දක්වමින් මන්ත්‍රිවරයා මේ බව කීවේය.

හෘද සැත්කමකට ලක්කර සිටි ඔහු වෛද්‍ය උපදෙස් නොපිළිපැදීම නිසා මෙම මරණය සිදුව ඇති බව මන්ත්‍රිවරයා පෙන්වා දෙන්නේය. ‍

එහිදී වැඩිදුරටත් අදහස් දැක්වූ ගෙවිදු කුමාරතුංග මන්ත්‍රිවරයා මෙසේද කීවේය.

අලුතින් පිහිටුවන ලද ශ්‍රී ලංකා නිදහස් සන්ධානයේ කලුතර දිස්ත්‍රික්කයේ කැඳවුම්කරුවෙකු පත්කර ගැනීම සඳහා ඊට සම්බන්ධ පක්ෂවල නියෝජිතයන් රැස්වුණා. උත්තර ලංකා සභාගය වෙනුවෙන් මමත් ජයන්ත කැටගොඩ මන්ත්‍රිවරයාත් ඊට සහභාගී වුණා. ශ්‍රී ලංකා නිදහස් පක්ෂය නියෝජනය කරමින් රෙජිනෝල්ඩ් කුරේත් එම පක්ෂයේ විධායක සභික සුරංජිතුත් සහභාගී වුණා. එදින රෙජිනෝල්ඩ් කුරේ ඇහුවා මෙම සභාගයේ හවුල්කාර සම සමාජ පක්ෂය නැත්තේ ඇයි කියලා. ඒ ගැන මම පැහැදිලි කරලා කීවා. අපේ උත්තර ලංකා සභාගය ගත්ත තීරණය ගැන. එතන වාද කරන්නවත් දෙයක් තිබුණේ නැහැ. එතුමා ආවේගශීලිව පිළිතුරු දෙන්න උත්සහා කළා. ඒ වෙලාවේ එතුමා එක්ක හිටපු අය කිව්වා සර් හෘද සැත්කම කරල දින තුනයිනේ. අවේගශීලි වෙන්න එපා කියලා. ඊට පස්සේ එතුමා නැගිටිලා ඇවිදගෙනම පිටතට ගියා. ඔහු පිටතට හැරලූ ශ්‍රී ලංකා නිදහස් පක්ෂයේ විධායක සභික සුරංජිත් යළි සාකච්ඡාවට පැමිණ කීවා එතුමා අසනීප තත්ත්වය නිසා පෞද්ගලික රෝහලකට ගෙන ගියා කියලා. එතකොටයි අපි දන්නෙත් මෙතුමා රෝගී තත්ත්වයකින් හිටියේ කියලා.

එතුමා දැන ගන්න ඕන හෘද සැත්කමක් කළා නම් වෛද්‍ය උපදෙස් පිළිපදින්න ඕන කියලා. එහෙම සැත්කමක් කළා නම් යම් කාලයක් විවේක සුවයෙන් පසුවෙන්න ඕන. එතුමා සාකච්ඡාවේදී මගේ ඉදිරියේ වැටුණා කියන්නෙත් බොරු. එතුමා එළියට ඇවිදගෙන ගියාට පසුවයි එතුමා එක්ක හිටපු අය එතුමව රෝහල් ගත කරල තියෙන්නේ. මොනව වුණත් එතුමා අවාසනාවන්ත අන්දමින් මිය යාම ගැන මා කනගාටු වෙනවා.

(අරුණ)