පසුගියදා අභාවප්‍රාප්ත වූ හිටපු මුදල් ඇමැතිවරයකු වූ රොනී ද මැල් ගේ දෙවිනුවර වැල්ලමඩමේ පිහිටි නිවසක් බිඳ දොරවල්වල සවිකර තිබූ ඉපැරණි පිත්තල සරනේරු 37 ක් සොරාගෙන ගොස් ඇතැයි ගන්දර පොලිසිය පවසයි.

මෙම සොරකම ඊයේ (05 වැනිදා) රාත්‍රියේ සිදුව ඇති අතර මේ සම්බන්ධයෙන් නිවසේ මුරකරු විසින් අද (06 වැනිදා) ගන්දර පොලිසියට කරන ලද පැමිණිල්ල මත පොලිසිය විමර්ශන ආරම්භ කර තිබේ.

මෙම නිවස රොනීද මැල්ගේ කාර්යාලයක් ලෙස පවත්වාගෙන ගිය ස්ථානයක් බවත් මෙය කලක පටන් භාවිතයට නොගත් ගරා වැටුණු ස්ථානයක් බවත් පොලිසිය සඳහන් කරයි.

මෙම නිවසේ පිටුපස දොරටුවෙන් ඇතුළු වූ සොරුන් නිවසේ පිටුපස හා ඇතුළත කාමරවලට සවිකර තිබී දොරවල්වල පිත්තල සරනේරු 37 ට අමතරව එහි නාන කාමරයේ සවිකර තිබූ වැසිකිළි කොමඩ්ඩුවද ගලවාගෙන ගොස් තිබෙන බව අනාවරණය විණි.

මෙම සොරකම සම්බන්ධයෙන් රොනී ද මැල්ගේ පුද්ගලික ලේකම්වරයාද පොලිස්පති දේශබන්දු තෙන්නකෝන් වෙත දැනුම් දී ඇති අතර පොලිස්පති උපදෙස් මත මාතර කොට්ඨාස භාර ජ්‍යෙෂ්ඨ පොලිස් අධිකාරී පණ්ඩුල වීරසිංහ විසින් මේ පිළිබඳ සොයා බැලීමට විමර්ශන කණ්ඩායම් කිහිපයක්ම යොදවා ඇත.

මෙම සොරකම මත්ද්‍රව්‍යවලට ඇබ්බැහිවූ අයගේ ක්‍රියාවක් ද නැතිනම් වෙනත් සැලසුම්සහගත ක්‍රියාවක් ද මෙතෙක් අනාවරණය වී නොමැත.

(අරුණ)