අද (15) ලෝක තරුණ නිපුණතා දිනය (World Youth Skills Day) යි.
ශ්‍රී ලංකාවේ යෝජනාවක් අනුව ලොව තරුණ තරුණියන්ට වෙන්වූ ‘‘ලෝක තරුණ නිපුණතා දිනය‘‘ සෑම වසරකම ජූලි මස 15 වැනි දිනට යොදා ගැනීමට එක්සත් ජාතීන්ගේ මහා මණ්ඩලය ඒකමතිකව තීරණය කර තිබේ.
එක්සත් ජාතීන්ගේ මහා මණ්ඩලයේ ශ්‍රී ලංකා තානාපති කාර්යාලයේ නිත්‍ය නියෝජිත ආචාර්ය පාලිත කොහොන මහතා එවක ශ්‍රී ලංකා ජනාධිපති මහින්ද රාජපක්ෂ මහතාගේ අදහසක් අනුව මෙම යෝජනාව ඉදිරිපත් කල අතර ඊට රටවල් 134 ක එකඟත්වය හිමිවිය.
මෙම යෝජනාව ගෝලීය මට්ටමෙන් වර්තමානයේ පෙනෙන තරුණ විරැකියාව සහ ඌණ සේවා නියුක්ති ගැටලුවට පිළියමක් ලෙස රැකියා අරමුණු කරගත් නිපුණතාවන් වර්ධනය කිරීමේ ඇති වැදගත්කම අවධාරණය කරයි.
එක්සත් ජාතීන් විසින් අනුමත කළ මෙම යෝජනාව විවිධ ක්ෂේත්‍ර සම්බන්ධයෙන් තරුණ තරුණියන් සතු නිපුණතාවන් හඳුනාගැනීම, රැකියා වෙළෙඳපොලෙහි පවත්නා ඉල්ලුමට සරිලන නිපුණතාවන් ප්‍රවර්ධනය මෙන් ම රැකියා අවස්ථා පුළුල් කිරීමේ අවශ්‍යතාවය සම්බන්ධයෙන් දැනුවත් කිරීම අරමුණු කර ගත්තකි. මෙය ගෝලීය වශයෙන් පවත්නා විරැකියාව සහ ඌණ සේවා නියුක්ති ගැටලුව අවම කිරීම සම්බන්ධයෙන් ගනු ලැබූ සාර්ථක පියවරක් ලෙස ද ඒ සම්බන්ධයෙන් ශ්‍රී ලංකාව ලබාදුන් දායකත්වය ලෙස ද සැලකිය හැකිය.
මෙම යෝජනාව සාර්ථක ලෙස එක්සත් ජාතීන්ගේ මහා මණ්ඩලයේ අනුමත කරගැනීම සඳහා දායක වු පිරිස් අතර එ වනවිට තරුණ කටයුතු සහ නිපුණතා සංවර්ධන අමාත්‍ය ඩලස් අලහප්පෙරුම මහතා සහ එම අමාත්‍යංශයේ කාර්ය මණ්ඩලය මෙන් ම ජාතික තරුණ සේවා සභාවේ නිලධාරී පිරිස් ද, නිව්යෝර්ක් නුවර එක්සත් ජාතීන්ගේ ආර්ථික හා සමාජ කටයුතු පිළිබඳ කාර්යාලය, එක්සත් ජාතීන්ගේ මහ ලේකම්වරයාගේ තරුණ කටයුතු පිළිබඳ විශේෂ නියෝජිත අහමඩ් අල්හෙන්දාවි මහතා සහ කොළඹ පිහිටි එක්සත් ජාතීන්ගේ නියෝජිත කාර්යාලය විශේෂ සහායක් ලබා දී ඇත.
