මේ වන විට සුළු හා මධ්‍ය පරිමාණ ව්‍යාපාරවලින් ලක්ෂ තුනක් පමණ වැසී ඇති අතර තවත් 20% ක පමණ ප්‍රමාණයක් වැසී යාමේ තර්ජනයට මුහුණ පා ඇතැයි ලාංකීය එක්සත් ව්‍යවසායකයන්ගේ සංසදයේ සභාපතිනි ටානියා අබේසුන්දර මහත්මිය කියයි.

මෙරට දළ දේශීය නිෂ්පාදිතයෙන් 52% කට දායකත්වය දක්වන්නේ කුඩා හා මධ්‍ය පරිමාණ ව්‍යවසායකයන්ය.

පසුගිය කාලයේ දස ලක්ෂයකට අධික කුඩා හා මධ්‍යම පරිමාණ ව්‍යවසායකයන් පිරිසක් ව්‍යාපාර පවත්වාගෙන ගොස් තිබිණි.

මෙම ව්‍යවසායකයන්ගෙන් වැඩි පිරිසක් බැංකුවල නොපියවූ ණයකරුවන්ගේ නාමලේඛනයට (CRIB) ඇතුළත් කර ඇති හෙයින් බොහෝ පිරිසකට යළි ණයක් ලබාගැනීමට නොහැකි තත්ත්වයක් නිර්මාණය වී ඇත.

මේ වන විට ආයතන නඩත්තු කිරීම සඳහා ප්‍රමාණවත් ආදායමක් නොමැති හෙයින් එම ආයතන ඉදිරියටත් පවත්වාගෙන යාම සඳහා ව්‍යවසායකයන්ට ණය ලබා දීමට කටයුතු කරන ලෙසටත් 2020න් පසු ලබාගෙන ඇති ණය ගෙවීම සඳහා කල් ලබා දෙන ලෙසටත් එම සංසදය මහ බැංකු අධිපතිවරයාගෙන් ඉල්ලීමක්ද කර තිබේ.

එහෙත් මේ වන තෙක් ඒ සම්බන්ධ ක්‍රියාමාර්ගයක් ගෙන නොමැති බවද ඇය පැවසුවාය.

සුළු සහ මධ්‍ය පරිමාණ ව්‍යවසායකයන් මුහුණදෙන ගැටලු සම්බන්ධයෙන් සාකච්ඡා කිරීම සඳහා පාර්ලිමේන්තුවේ දිනෙක විවාදයක් පවත්වන බවට ප්‍රකාශ වූ නමුදු මේ වන තෙක් ඒ සම්බන්ධයෙන් කිසිදු විවාදයක් ත‌ොපැවැත්විණි.

වර්තමානයේ රට තුළ පවතින උද්ධමනය පාලනය කර ඇතැයි ප්‍රකාශ කළද සිදුවී ඇත්තේ උද්ධමනය සංකෝචනය වීමක් පමණක් බවත් ටානියා අබේසුන්දර මහත්මිය වැඩිදුරටත් සඳහන් කළාය.

මූලාශ්‍රය ‌- දේශය