චීනයේ කුංමිං සහ කටුනායක ගුවන් තොටුපොළ අතර නව භාණ්ඩ ප්‍රවාහන ගුවන් සේවයක් ඊයේ (26) සිට ආරම්භ විය.

එහි ප්‍රථම මංගල ගුවන් යානය ඊයේ කටුනායක ගුවන් තොටුපොළ වෙත පැමිණ තිබිණි.

එම මංගල ගුවන් ගමන සඳහා එස්.එෆ්. ගුවන් සේවය විසින් බෝයිං-747-200 වර්ගයේ ගුවන් යානයක් යොදවා තිබිණි.

එම ගුවන් යානය චීනයේ කුංමිං නගරයේ සිට මෙට්‍රික් ටොන් 22ක භාණ්ඩ තොගයක් ද රැගෙන කටුනායක ගුවන් තොටුපොළ වෙත පැමිණ ඇති බව වාර්තා වේ.

ඒ අනුව, සෑම සඳුදා සහ බ්‍රහස්පතින්දා දිනකම චීනයේ කුංමිං සහ කටුනායක ගුවන් තොටුපොළ අතර එම ගුවන් ගමන් මෙහෙයුම් ක්‍රියාත්මක වීමට නියමිතය.

ශ්‍රී ජයවර්ධනපුර කෝට්ටේ පිහිටි සුව සැරිය ප්‍රධාන කාර්යාලය පවත්වාගෙන යන ගොඩනැගිල්ලේ තක්සේරු වටිනාකමට වඩා වසරකට රුපියල් ලක්ෂ පනහක් ගෙවන බව අනාවරණය වී තිබේ.

මේ බව අනාවරණය වී ඇත්තේ ජාතික විගණන කාර්යාලය කළ පරීක්ෂණයකිනි.

ගොඩනැගිල්ලේ හිමිකරු රජයේ තක්සේරු වටිනාකමට එකඟතාව පළ කර නොමැති අතර ගිවිසුම්ගත කුලී මුදල ද ඉක්මවන වෙනත් තක්සේරු වාර්තාවක් හිමිකරු ඉදිරිපත් කර තිබෙන බව ද එම පරීක්ෂණ වාර්තාව හෙළි කර ඇත.

ගොඩනැගිල්ලක් කුලියට ගැනීමේ දී ආයතන ප්‍රධානියා ප්‍රධාන තක්සේරුකරු විමසිය යුතු වන අතර ප්‍රධාන තක්සේරුකරුගේ තීරණය භාර ගැනීමට ප්‍රධානියාට නොහැකි වන්නේ නම් එම ගොඩනැගිල්ල කුලියට ගන්නා ආයතනය අදාළ ලේකම් වෙත තීරණයක් සඳහා එම කාරණය යොමු කළ යුතු වුවද එම නියමය අනුව පදනම කටයුතු කර නොමැති බව ද පරීක්ෂණ වාර්තාව පෙන්වා දෙයි.

පසුගිය මාර්තු මස පැවැති අධ්‍යක්ෂ මණ්ඩල රැස්වීමේ ගත් තීරණයක් මත ගොඩනැගිල්ලේ කුලිය සම්බන්ධව අනුමැතිය ලබා ගැනීම සඳහා සෞඛ්‍ය අමාත්‍යාංශයේ ලේකම්වරයා වෙත යොමු කිරීමට තීරණය කර ඇතැයි මීට පිළිතුරු වශයෙන් පදනමේ කළමනාකාරීත්වය විගණන කාර්යාලයට දන්වා තිබේ.

මූලාශ්‍රය – අරුණ

මෙරට ප්‍රධාන පෙළේ රාජ්‍ය බැංකුවක් වන මහජන බැංකුව රුපියල් ලක්ෂ 900 ක මුදලක් සොරකම් කර ඇතැයි කියන සිද්ධියක් සම්බන්ධයෙන් වහාම පුළුල් විමර්ශනයක් කරන ලෙස කොටුව මහෙස්ත්‍රාත් නිලුපුලී ලංකාපුර අපරාධ පරීක්ෂණ දෙපාර්තමේන්තුවට නියෝග කළාය.

මීට වසර 10 කට පමණ ඉහතදී සිදුව ඇතැයි කියන එම සිද්ධිය සම්බන්ධයෙන් නිසි විමර්ශනයක් සිදුකර රුපියල් ලක්ෂ 900 ක් මහජන බැංකුවෙන් හොරා කෑවේ කවුරුන්ද යන්න පිළිබඳව සොයා බලන ලෙස ජ්‍යෙෂ්ඨ නීතිඥ ගුණරත්න වන්නිනායක මහතා මෝසමක් මාර්ගයෙන් ඉදිරිපත් කළ කරුණු සලකා බැලීමෙන් අනතුරුව මහෙස්ත්‍රාත්වරිය එම නියෝගය කළාය.

මෙම සිද්ධිය සම්බන්ධයෙන් සිදුකර ඇති විමර්ශනයේ ප්‍රගතිය ලබන මස 30 වැනිදා අධිකරණය වෙත වාර්තා කරන ලෙස මහෙස්ත්‍රාත්වරිය අපරාධ පරීක්ෂණ දෙපාර්තමේන්තුවේ වාණිජ අපරාධ විමර්ශන අංශයේ විමර්ශන නිලධාරියාට නියෝග කළාය.

පැමිණිල්ල යශෝධා අයිතිකරුගෙයි…

කූට ලේඛනයක් සකස් කර දේපළ පවරා ගැනීමක් කළ බවට සඳහන් කරමින් බොරලැස්ගමුව, පැපිලියාන පදිංචි ව්‍යාපාරිකයකු වන යසසිරි කස්තුරිආරච්චි මහතා (යශෝධා එන්ටප්‍රයිසස් හි අධිපති) විසින් 2015 ඔක්තෝබර් 28 වැනිදා අපරාධ පරීක්ෂණ දෙපාර්තමේන්තුවට කරන ලද පැමිණිල්ලකට අනුව පවරා ඇති නඩුවකට අදාළව මෝසමක් මාර්ගයෙන් නීතිඥ ලක්මාලි අස්සලආරච්චි මහත්ගේමියගේ උපදෙස් මත ජ්‍යෙෂ්ඨ නීතිඥ ගුණරත්න වන්නිනායක මහතා කරුණු ඉදිරිපත් කරමින් මෙසේ පැවැසීය.

‘‘මාගේ සේවාදායකයා වන පැමිණිලිකාර ව්‍යාපාරිකයාට ඔහුගේ දෙමාපියන්ගෙන් හිමිවූ පස්යාලේ පිහිටි රුපියල් කෝටි 400 ක් පමණ වටිනා අක්කර 48 ක ඉඩමක් අදාළ රාජ්‍ය බැංකුවට උකස් කරලා රුපියල් ලක්ෂ 900 ක ණය මුදලක් ලබාගත් බවට ව්‍යාජ ලේඛන සකස් කර තිබෙනවා. මේ රුපියල් ලක්ෂ 900 ක මුදල ගියේ කාටද? එවැනි මුදලක් තම සේවාදායකයාගේ ගිණුම්වලට වැටිලා නැහැ.

සාමාන්‍යයෙන් මෙවැනි රාජ්‍ය බැංකුවකින් රුපියල් ලක්ෂ 900 ක වැනි ණය මුදලක් ලබාදෙනවා නම් ඒ සඳහා අධ්‍යක්ෂ මණ්ඩලයේ තීරණයක් තිබිය යුතුයි. නමුත් එවැනි තීරණයක් ගැන දැනගන්නට ලැබෙන්නෙත් නැහැ. එහෙනම් රුපියල් ලක්ෂ 900 ක් බැංකුවෙන් හොරා කෑවේ කවුද? ඒ පිළිබඳ විමර්ශනයක් කරන ලෙස ඉල්ලා සිටිනවා.’’