ඉකුත් වසරේ සිදුවූ රිය අනතුරක් සම්බන්ධයෙන් වැල්ලවත්ත පොලිසිය විසින් තමන්ව අත්අඩංගුවට ගෙන රක්ෂිත බන්ධනාගාර ගත කිරීම තුළින් සිය මූලික මිනිස් අයිතිවාසිකම් උල්ලංඝනය වූ බවට තීන්දුවක් ලබා දෙන ලෙස ඉල්ලා අපරාධ පරීක්ෂණ දෙපාර්තමේන්තුවේ හිටපු ජ්‍යෙෂ්ඨ නියෝජ්‍ය පොලිස්පති සහ මහජන ආරක්ෂක අමාත්‍යාංශයේ වර්තමාන ලේකම් රවි සෙනෙවිරත්න මහතා විසින් ඉදිරිපත් කළ මූලික අයිතිවාසිකම් පෙත්සමක් විභාගයට නොගෙන නිෂ්ප්‍රභ කිරීමට ශ්‍රේෂ්ඨාධිකරණය ඊයේ (18) තීන්දු කළේය.

මෙම පෙත්සම ඊයේ එස්.තුරෙයි රාජා, ඒ.එච්.එම්.ඩී. නවාස් සහ ප්‍රියන්ත ප්‍රනාන්දු යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබූ අවස්ථාවේදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල් දිස්නා වර්ණකුල මහත්මිය ඉදිරිපත් කළ මූලික විරෝධතා සලකා බැලීමෙන් අනතුරුව මෙම නියෝගය නිකුත් කෙරිණි.

පෙත්සම ඊයේ කැඳවූ අවස්ථාවේදී වගඋත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජනරාල්වරිය අධිකරණය හමුවේ කරුණු දක්වමින් මෙම පෙත්සම ශ්‍රේෂ්ඨාධිකරණ රීතීන්ට පටහැනි ආකාරයෙන් ගොනුකර තිබෙන බව පෙන්වා දුන්නාය.

මෙම පෙත්සම මූලික අයිතිවාසිකම් පෙත්සමක් වුවත් එය අභියාචනා පෙත්සමක ඇතුළත් ඉල්ලීම් ඉදිරිපත් කර ඇති බවත් ශ්‍රේෂ්ඨාධිකරණ රීතීන්ට අනුකූලව එය විභාග කිරීමට අධිකරණයට බලයක් නොමැති බවත් නියෝජ්‍ය සොලිසිටර් ජනරාල්වරිය තර්ක කළාය.

රවී සෙනවිරත්න වෙනුවෙන් පෙනී සිටි නීතිඥ රවී වෛද්‍යලංකාර මහතා අධිකරණය හමුවේ කරුණු දක්වමින් මෙම දෝෂය තාක්ෂණික දෝෂයක් බවත් එය නිවැරැදි කිරීමට අවස්ථාවක් ලබා දෙන ලෙසත් ඉල්ලා සිටියේය.

එහෙත් ශ්‍රේෂ්ඨාධිකරණ විනිසුරු තුරෙයි රාජා මහතා පෙන්වා දුන්නේ මෙම පෙත්සම ගොනුකර මේ වන විට වසරකට වැඩි කාලයක් ගතව තිබෙන බවයි. කෙසේ වෙතත් ශ්‍රේෂ්ඨාධිකරණ රීතීන්ට අනුකූලව මෙම පෙත්සම ගොනුකර නොමැති බව පෙන්වා දුන් විනිසුරු මඩුල්ල ඒ අනුව පෙත්සම නිෂ්ප්‍රභ කරන බවත් නියෝග කළහ.

මෙම පෙත්සමේ වගඋත්තරකරුවන් ලෙස පොලිස්පතිවරයා, වැල්ලවත්ත පොලිසියේ ස්ථානාධිපතිවරයා ඇතුළු නිලධාරින් පිරිසක් සහ නීතිපතිවරයා නම් කරනු ලැබ සිටිති.

පෙත්සම්කාර රවී සෙනෙවිරත්න මහතා කියා සිටින්නේ ඉකුත් වසරේ ඔක්තෝබර් මස 28 වනදා වැල්ලවත්ත පොලිස් වසම තුළ බීමත්ව රිය පදවා අනතුරක් සිදුකළ බවට චෝදනා කරමින් වැල්ලවත්ත පොලිසිය විසින් තමන්ව අනීතික ලෙස අත්අඩංගුවට ගෙන ගල්කිස්ස මහෙස්ත්‍රාත් අධිකරණයට ඉදිරිපත් කර රක්ෂිත බන්ධනාගාර ගත කළ බවයි.

ඇප මත මුදා හැරීමට නීතියෙන් හැකියාව තිබියදී තමන්ව රක්ෂිත බන්ධනාගාර ගත කිරීම තුළින් සිය මූලික මිනිස් අයිතිවාසිකම් පොලිසිය විසින් උල්ලංඝනය කළ බවට තීන්දුවක් ලබාදෙන ලෙසත් ඔහු අධිකරණයෙන් ඉල්ලා සිටියේය.

මූලාශ්‍රය – අරුණ