රේගුවට ව්‍යාජ ප්‍රකාශ කර සංවිධානාත්මක අපරාධ කල්ලියක් විසින් මෙරටට ආනයනය කරන ලද බහලුම් තුනක තිබී රුපියල් මිලියන 120 කට අධික ආහාර ද්‍රව්‍ය, රූපලාවණ්‍ය ආලේපන ඇතුළු භාණ්ඩ විශාල තොගයක් රේගුවේ අභ්‍යන්තර කටයුතු ඒකකය විසින් සිය භාරයට ගෙන ඇත.
ඩුබායි සිට මෙරටට ආනයනය කරන ලද මෙම බහලුම් තුන තුළ තිබී රුපියල් මිලියන 120 කට අධික වටිනාකමකින් යුතු කහ, ඉඟුරු, කෝපි, කජු ඇතුළු ආහාර ද්‍රව්‍ය ඇතුළු භාණ්ඩ තොගයක් කොළඹ, දෙමටගොඩ ප්‍රදේශයේ පුද්ගලික භාණ්ඩ නිෂ්කාශන ආයතනයකදී සොයාගෙන තිබේ.
මෙම භාණ්ඩ තොගය පරීක්ෂා කිරීමට රේගු අධ්‍යක්ෂ ජනරාල් සරත් නෝනිස් මහතා, රේගු මාධ්‍ය ප්‍රකාශක, අතිරේක අධ්‍යක්ෂ ජනරාල් සීවලී අරුක්ගොඩ මහතා ඇතුළු නිලධාරීන් කණ්ඩායමක් සහභාගි වී ඇත.
මෙම භාණ්ඩ අතර රූපලාවණ්‍ය ද්‍රව්‍ය, සබන්, චොකලට්, ඇඳුම්, සපත්තු ආදියද විය.
කාඩ්බෝඩ් පෙට්ටි තුළ කජු, කෝපි ඇට ආදීය අසුරා ඒවා නොපෙනෙන ලෙස රූපලාවණ්‍ය ද්‍රව්‍ය අසුරා තිබුණි.
දැනට විවෘත කරන ලද බහලුම්වල කහ මෙට්‍රික් ටොන් හයක තොගයක්ද, ඉඟුරු මෙට්‍රික් ටොන් තුනක්ද, කජු මෙට්‍රික් ටොන් තුනක් සහ කෝපි ඇට මෙට්‍රික් ටොන් එකහමාරක්ද තිබී ඇත.
මෙම ආහාර ද්‍රව්‍ය ආනයනය කර ඇත්තේ ශාක නිරෝධායන අංශයේ අනුමැතියකින් තොරව බවත්, රූපලාවණ්‍ය ද්‍රව්‍ය ආනයනයේදී ජාතික ඖෂධ නියාමන අධිකාරියේ (NMRA) අනුමැතිය ලබාගත යුතු වුවත් රුපියල් මිලියන ගණනක් වටිනා මෙම රූපලාවණ්‍ය ද්‍රව්‍ය ආනයනයේදී එම අනුමැතියද ලබාගෙන තොතිබුණි.
මෙම භාණ්ඩ තොගය අත්අඩංගුවට නොගත්තේ නම් රජයට අහිමිවන තීරු බද්ද රුපියල් මිලියන 120 කට අධික බවද රේගු මාධ්‍ය ප්‍රකාශකවරයා පැවසීය.
මෙම භාණ්ඩ සහිත පාර්සල්වල හිමිකරුවන් ලෙස යොදා තිබූ ලිපිනයන් ව්‍යාජ ඒවා බවද රේගු පරීක්ෂණවලදී තහවුරුවී තිබේ.
මෙම ජාවාරමට අදාළ පුද්ගලයන් අත්අඩංගුවට ගැනීම කටයුතු කරන බවද රේගු මාධ්‍ය ප්‍රකාශකවරයා කියා සිටියේය.
මෙවැනි ගමන් බඩු නිෂ්කාශනය කරන ආයතන හතක් පමණ කොළඹ ප්‍රදේශයේ ක්‍රියාත්මක බවත්, මෙම සංවිධානාත්මක කල්ලි මෙම ආයතනවලට සම්බන්ධ වී සිටින බවත් ඔහු පැවසීය.
අත්අඩංගුවට ගන්නා ලද කහ සහ ඉඟුරු තොග ජාතික ශාක නිරෝධායන සේවයේ පරීක්ෂාවට ලක් කිරීමෙන් පසු, සතොස ආයතනය හරහා මහජනතාවට අලෙවි කිරීමට කටයුතු කරන බවත්, ඇඳුම්, සපත්තු ආදිය ටෙන්ඩර් කර අලෙවි කරන බවත් රේගුව කියයි.
එමෙන්ම, ජාතික ඖෂධ නියාමන අධිකාරියේ (NMRA) අනුමැතිය රහිතව ආනයනය කරන ලද සබන් ඇතුළු රූපලාවණ්‍ය ආලේපන විනාශ කිරීමට කටයුතු කරන බවද රේගු මාධ්‍ය ප්‍රකාශකවරයා පැවසීය.
