වන සත්ත්ව සංගණනයට පත්‍රිකා ලක්ෂ 73ක් මුද්‍රණය කර ඇතැයි කෘෂිකර්ම අමාත්‍යාංශයේ කෘෂි තාක්ෂණ අංශයේ අධ්‍යක්ෂ හේමන්ත අමරසිංහ පවසයි.

සංගණනය පැවැත්වෙන ලබන 15 වන දා පෙර දිවයිනේ සියලු ම නිවාසවලට මෙම පත්‍රිකා බෙදාහැරීමට සැලසුම් කර ඇතැයි ද අධ්‍යක්ෂවරයා සඳහන් කළේ ය.

ගෘහ අංකය, නම, ලිපිනය, දුරකතන අංකය මෙන් ම සංගණන කාලයේදී රිලවා, වඳුරා, මොනරා සහ දඬු ලේනා යන සතුන් පෞද්ගලික ඉඩම තුළ කොපමණ සිටීදැයි නිවැසියන් පත්‍රිකාවේ සටහන් කළයුතු බවද හෙතෙම වැඩිදුරටත් කියා සිටියේය.

සංගණනයේ පත්‍රිකා මුද්‍රණයට හා බෙදාහැරීමට පමණක් මුදල් වැය වන බව ත් මෙම වැඩසටහනේදී වෙනත් අමතර මුදලක් වියදම් නොවන බව ත් අමරසිංහ මහතා ප්‍රකාශ කළේය.

මේ අතර, සංගණනය පැවැත්වීමට යොදාගෙන ඇති කාලය සංශෝධනය කරන්නැයි ඇතැම් පාර්ශ්ව ඉල්ලා ඇති නමුත් සංගණනයට සුදුසු ම වේලාව යොදාගෙන තිබෙන බව ත් ඒ අනුව උදෑසන 8;00 – 8:05 කාලය වෙනස් කිරීමේ අවශ්‍යතාවක් නොමැති බව ත් ඔහු පැවසීය.

ඉංගිරිය ප්‍රදේශයේදී පෙර පුහුණු සමීක්ෂණයක් පවත්වා අධ්‍යයනයක් සිදුකිරීමෙන් අනතුරුව මෙම කාලය යොදාගත් බවද හේමන්ත අමරසිංහ මහතා කියා සිටියේය.

වන සතුන් උදෑසන 6:00ට පමණ ඇහැරී ගමන් කරන බව ත් සමීක්ෂණ කාලය තුළ ඔවුන් වනාන්තරවලින් පිටවී කුමන හෝ ස්ථානයක සිටිය හැකි බව ත් අධ්‍යක්ෂවරයා සඳහන් කළේ ය.

එම සතුන් ඇතැම් වතුවලට උදෑසන කාලය මඟහැර සවස් කාලයේදී පැමිණිය හැකි නමුත් සංගණනයට එය ගැටලුවක් නොවන බවද ඒ මහතා සඳහන් කරයි.

පෞද්ගලික ඉඩම්වලට පැමිණෙන වන සතුන් පිළිබඳව තොරතුරු එක්රැස් කිරීමට දුරකතන මෘදුකාංග (ඇප්) මාර්ගයෙන් මෙන්ම වට්ස්ඇප් හා එස්.එම්.එස්. මඟින් උත්සාහ කළ නමුත් දුරකතන සංඥාවල දුර්වලතා මෙන්ම දුරකථන සාක්ෂරතාවේ දුර්වලතාව හේතුවෙන් එම වැඩපිළිවෙල අසාර්ථක වූ බව ත් ඒ අනුව මෙවර සංගණනය පැවැත්වීමට යොදාගත් බව ත් හෙතෙම පැවසීය.

මූලාශ්‍රය  – මව්බිම පුවත්පත