සමගි ජන සන්ධානයේ ‘සැමට ජයක්’ ජනාධිපතිවරණ ප්‍රතිපත්ති ප්‍රකාශය අද (29) එළිදැක්වීය.

එය සිංහල, දමිළ, ඉංග්‍රීසි යන භාෂා ත්‍රිත්වයෙන් සමන්විතය.

සමගි ජන සන්ධානයේ ජනාධිපති අපේක්ෂක සජිත් ප්‍රේමදාස මහතා මල්වතු අස්ගිරි මහානායක හිමිවරුන්ට සිය ප්‍රතිපත්ති ප්‍රකාශය පිළිගැන්වීම සඳහා ගොස් තිබේ.

එම කටයුතු මේ වනවිට මහනුවර ශ්‍රී දළදා මාළිගාවේදී සිදුකෙරෙමින් පවතින බව වාර්තා වේ.

ඒ අතරතුර සන්ධාන නායකයින්ගේ සහභාගිත්වයෙන් මේ වනවිට මහනුවර රැජිණ හෝටලයේ විශේෂ මාධ්‍ය සාකච්ඡාවක් ද පැවැත්වෙයි.

එහිදී අදහස් දක්වමින් සමගි ජනබලවේග පාර්ලිමේන්තු මන්ත්‍රී එරාන් වික්‍රමරත්න මහතා පැවසුවේ සමගි ජන සන්ධානයේ මෙම ප්‍රතිපත්ති ප්‍රකාශය නිර්මාණය කළේ මැතිවරණය ඉලක්ක කරගනිමින් නොවන බවය.

එය සෑම විෂයක්ම අධ්‍යයනය කිරීමෙන් අනතුරුව වෘත්තීයවේදීන්ගේ සහ විද්වතුන්ගේ එකමුතුවෙන් සකස් කළ ආණ්ඩුකරණ ප්‍රතිපත්ති ප්‍රකාශයක් බවද ඒ මහතා කියා සිටියේය.

ඉන් අනතුරුව සමගි ජන බලවේග පාර්ලිමේන්තු මන්ත්‍රී හර්ෂ ද සිල්වා මහතා මෙලෙස අදහස් පළකලේඅය.

“සජිත් ප්‍රේමදාස මහතා යනු දුක හඳුනන නායකයෙක්.. ඒ නිසා තමයි එතුමා කිව්වේ ජනසවියට 20000ක් දෙන්න ඕන කියලා.. මොකක්ද මේකෙන් කියන්නේ.. ඔහු සූදානම් නැහැ අපිත් සූදානම් නැහැ එහෙම බෙද බෙදා යන්න.. එහෙම බෙද බෙද ගිහින් ඒ ජනතාව කවදාවත් දරිද්‍රතාවයෙන් එළියට එන්නේ නැහැ.. 20000ක් දෙනවනම් පවුලකට එක්කෝ ඒ පවුල යම්කිසි විදියකට දායක වෙන්න ඕන තමන්ගේ ගමේ හෝ නගරයේ කුමන හෝ වැඩකට..”

මෙම මාධ්‍ය හමුව සඳහා එරාන් වික්‍රමරත්න, පාඨලි චම්පික රණවක, හර්ෂ ද සිල්වා, ඩලස් අලහප්පෙරුම යන මන්ත්‍රීවරුන් ඇතුළු විශාල පිරිසක් එක්ව සිටියහ.

අදාළ වීඩියෝව පහතින්