ස්වදේශී කර්මාන්තායතනයෙ (Swadeshi Industrial Works PLC) හි රුපියල් එක්කෝටි විසිතුන් ලක්ෂයක් වටිනා සබන්, ෂැම්පෝ, පවුඩර් ආදිය පැටවූ ලොරියක් සොරකම් කරගෙන පලාගිය සැකකරුවන් තිදෙනකු කිරිබත්ගොඩ පොලිසිය විසින් පෙරේදා (22) අත්අඩංගුවට ගෙන තිබේ.

මෙම සැකකරුවන් අතර සිටින ප්‍රධාන සැකකරු ලොරියේ හිමිකරු බවත් සෙසු සැකකරුවන් දෙදෙනා අපරාධය සඳහා ආධාර අනුබල ලබාදී ඇති බවත් පොලිසිය පවසයි. 

කෙසේවුවද, ලොරියේ හිමිකරු මෙවැනිම වංචා කිහිපයකට සම්බන්ධ අයෙක් බවද පසුව හෙළිව තිබේ.

කඳානේ පිහිටි ස්වදේශී කර්මාන්තායතනයෙ (Swadeshi Industrial Works PLC) සබන් සමාගමට අයත් සබන් තොගයක් ලොරියක පටවා කිරිබත්ගොඩ ප්‍රදේශයේ පිහිටි ගබඩාවකට යවා තිබුණේ පසුගිය 16 වැනිදාය.

මෙදින ලොරි රථයේ රියැදුරු හා සහායකයා ලොරි රථ හිමිකරු පැමිණ පිටත්කර යවා තිබුණේ භාණ්ඩ තොගය බෑම පසුදින සිදුකරන බව කියමිනි.

ඒ බව ගබඩාවටත් සබන් සමාගමටත් ලොරි රථයේ හිමිකරු දැනුම් දී තිබිණි.

කෙසේ වෙතත් පසුදින රුපියල් එක්කෝටි විසිතුන් ලක්ෂයක් වටිනා සබන් තොගය සමගින් ලොරිය අතුරුදන්ව තිබෙන අතර මේ සම්බන්ධයෙන් කිරිබත්ගොඩ පොලිසිය විසින් පරීක්ෂණ ආරම්භ කර තිබිණි.

සහකාර පොලිස් අධිකාරී වීරසිංහ හේරත් ගේ අධීක්ෂණය මත කිරිබත්ගොඩ පොලිසියේ අපරාධ අංශයේ ස්ථානාධිපති පොලිස් පරීක්ෂක රෝහණ ඇතුළු නිලධාරීන් කරන ලද විමර්ශනයට අනුව තොරතුරක් ලැබී තිබුණේ අනුරාධපුර ප්‍රදේශයේ අඩු මිලට සබන් අලෙවි කරන බවය.

මේ අනුව අනුරාධපුරයට ගිය පොලිස් නිලධාරීන්ට සබන් අලෙවි කළ පුද්ගලයකු පවසා ඇත්තේ මෙම සබන් ලොරියකින් තමන් මිලදී ගත් බවය.

මේ අනුව සබන් අලෙවි කළ පුද්ගලයාගේ දුරකතන අංකය ලබාගත් පොලිසිය උපායදූතයකු මාර්ගයෙන් රුපියල් දහසය දහස බැගින් වටිනා සබන් පෙට්ටි තුනක් කොළඹට ගෙන්වා ගනිමින් සැකකරු අත්අඩංගුවට ගත් අතර ඒ අනුව මෙම සබන් තොගය සොරකම් කර ඇත්තේ ලොරියේම හිමිකරු බවට අනාවරණය වී ඇත.

මේ අනුව සැකකරුවන් තිදෙනකු අත්අඩංගුවට ගෙන තිබේ.

මෙහි ප්‍රධාන සැකකරු මෙවැනිම ආකාරයෙන් ප්‍රසිද්ධ නූඩ්ල්ස්, බිත්තර, සීනි සමාගම්වලින් ද භාණ්ඩ තොග වශයෙන් සොරකම් කර තිබෙන බවට අනාවරණය වී ඇති අතර අනාවරණය නොවූ තවත් සොරකම් අටකට වැඩි ප්‍රමාණයක් ද සැකකරු විසින් සිදුකර තිබෙන බවට තොරතුරු වාර්තා වී ඇත.

සැකකරු පසුගිය වසරේ මාර්තු මාසයේදී මොරටුමුල්ල ප්‍රදේශයේ තොග සහ සිල්ලර වෙළෙඳසලක රුපියල් ලක්ෂ 22ක පමණ සීනි තොගයක් ද සහිත ලොරියක් රැගෙන පලාගොස් තිබූ අතර එම ලොරිය සීනි තොගය නොමැතිව පිළියන්දල ප්‍රදේශයේදී අතහැර දමා තිබියදී සොයා ගෙන තිබිණි.