දිවයින පුරා ඇති ලංකා සතොස හරහා අද (06) සිට එක් අයකුට වරකට පොල් ගෙඩි 3ක් සහ සහල් කිලෝ 5ක් බැගින් නිකුත් කරන බව ලංකා සතොස සභාපති ආචාර්ය සමිත පෙරේරා මහතා පවසයි.

ඔහු සඳහන් කළේ සතොස ආයතනයෙන් සහල් කිලෝ පහක සීමාවක් පනවා ඇත්තේ අවශ්‍යම අයට පමණක් පැමිණ රැගෙන යාමට බවය.

පොල් ගෙඩියක් රුපියල් 130කට අලෙවි කරන බවත්  අවශ්‍ය පොල් තොග සහ සහල් වෙළෙඳපොළට බෙදාහැරීමට ඊයේ (05) දහවල් කාලයේදී සතොස අලෙවිසල් වෙත යැවූ බවත් සභාපතිවරයා පවසා තිබේ.

ඒ අනුව, කොළඹ අවට ඇති සතොස ශාඛාවලින් ඊයේ සිටත් කොළඹින් බැහැර ප්‍රදේශවල සතොස ශාඛාවලින් අද (06) සිට පොල් සහ සහල් මිල දී ගත හැකි බව ලංකා සතොස සභාපති සමිත පෙරේරා මහතා වඩිදුරටත් සඳහන් කලේය.

එමෙන්ම, ඊයේ දහවල් වන විට සියලු සතොස ජාලාවලට නාඩු සහල් යැවීමට කටයුතු කළ බවත්, නාඩු සහල් රුපියල් 220ක පාලන මිලට ලබා දෙන බවත් ඔහු පවසා සිටියේය.

සභාපතිවරයා වැඩිදුරටත් සඳහන් කර සිටියේ, එසේ සීමා නොකළහොත් තොග වෙළෙඳුන් පැමිණ එම මිලට ලබාගෙන නැවත රුපියල් 235-240 වැනි වැඩි මිලකට විකුණනු ඇති බවය.

ඔබ දන්නව දැන් අද නඩු මිල මේ තියෙන ව්‍යාපාරිකයන්ගේ තත්ත්වය මත 235-240 ඒ වගේ ගණන්වලට එළිය විකුණනවා. ඉතින් අපි සතොස මගින් ලබා දෙනකොට සමහර වෙලාවට විශේෂයෙන් තොග වෙළඳුන් මේ අය සතොසෙන් 220ට අරගෙන එළියෙ 240ට විකුණනවා. ඉතින් අපි ඒක නවත්තන්න හින්දයි අවශ්‍යම අපේ පාරිභෝගිකයන්ට අවශ්‍යම අයට පමණක් ඇවිල්ලා අරගෙන යන්න කිලෝ පහක් ලබාදෙන්නෙ ඒ පදනම මතය.

බොරැල්ල, හේනේමුල්ල, කොටහේන, නාරාහේන්පිට, මාලිගාවත්ත, පිටකෝට්ටේ, තලවතුගොඩ, වොක්ෂල්වීදිය ඇතුලු ස්ථාන ගණනාවක මේවන විට සහල් බෙදැහරීමේ කටයුතු ආරම්භ කර තිබෙනවා. “ යනුවෙන් සභාපතිවරයා වැඩිදුරටත් පැවසීය.