කාන්තාවක ඔස්ට්‍රේලියාවට යවන බව පවසා රුපියල් ලක්ෂ තිහක් වංචා කළ බව කියන සිද්ධියක් සම්බන්ධව රාජ්‍ය අමාත්‍ය අරුන්දික ප්‍රනාන්දු මහතාව පෙරේදා (09) මීගමුව කොට්ඨාස වංචා විමර්ශන අංශය වෙත කැඳවා පැය පහකට ආසන්න කාලයක් ප්‍රශ්න කර ප්‍රකාශයක් ලබාගෙන ඇත.
රාජ්‍ය අමාත්‍යවරයා විදේශගතවන දිනයක තමාටත් ප්‍රභූ පර්යන්තයෙන් ගුවන් තොටුපළට ඇතුළු වන ලෙස අමාත්‍යවරයාගේ සම්බන්ධීකරණ ලේකම් යැයි කියන තැනැත්තා දැනුම් දුන් බවත්, අමාත්‍යවරයාද විදේශගතවන දිනයේ තමාට ඇමතුමක් දුන් බවත් මෙම කාන්තාව පොලිසියට පැමිණිලි කර තිබේ.
තමාට අමාත්‍යවරයා පසුපසින් පැමිණෙන ලෙස දැනුම් දුන්නද සකස් කර ඇති ලේඛනවල ගැටලුවක් නිසා තමාට ආගමන විගමන නිලධාරීන් ගමනට අවසර නොදුන් බවත් එම කාන්තාව පැමිණිලි කර ඇත.
ඇමැති සම්බන්ධීකරණ ලේකම් යැයි කියාගත් රොෂාන් සේනානායක නමැත්තා ඔහුගේ සහ අමාත්‍යවරයාගේ නමින් ඇති බැංකු ගිණුම් දෙකකට මුදල් තැන්පත් කරන ලෙස දැනුම් දුන් බවත් ඒ අනුව ජනවාරි මසදී ගිණුම් දෙකට රුපියල් ලක්ෂ දාහතක් තැන්පත් කළ බවත් පැමිණිලිකාරිය සඳහන් කර ඇත.
ඊට අමතරව ඇමැති සම්බන්ධීකරණ ලේකම්ව තමාට හඳුන්වා දුන් මොහොමඩ් අලි නමැත්තාට රුපියල් ලක්ෂ දොළහක් අතට ලබාදුන් බවත් ඇය පැමිණිල්ලේ සඳහන් කර ඇත.
තමාගෙන් මුදල් ලබාගෙන ඔස්ට්‍රේලියා යවන බවට පැවැසුවත් එය ඉටු නොවීමෙන් පසු මුදල් ඉල්ලා සිටිය බවත් එම මුදල් ගෙවීමට ප්‍රතිචාර නොදැක්වූ නිසා පැමිණිල්ල කළ බවත් මීගමුව කොට්ඨාස වංචා විමර්ශන අංශයට පැමිණි බවත් වින්දිත කාන්තාව පැමිණිල්ල කරමින් සඳහන් කර ඇත.
මීගමුව කොට්ඨාස වංචා විමර්ශන අංශය මෙම චෝදනාවට ලක්වූ ඇමැති සම්බන්ධීකරණ ලේකම් යැයි කියාගත් පුද්ගලයා සහ බ්‍රෝකර්වරයා අත්අඩංගුවට ගෙන ඇති අතර, ඔවුන්ගෙන් ප්‍රශ්න කිරීමේදී තමන්ට ලද රුපියල් ලක්ෂ පහළවක මුදලක් රාජ්‍ය අමාත්‍යවරයාටත් ලබාදුන් බවට හෙළිකර ඇත.
මෙම චෝදනා සම්බන්ධව රාජ්‍ය අමාත්‍යවරයා කැඳවා ප්‍රකාශ ලබාගත් බවත්, වැඩිදුර විමර්ශන තවදුරටත් ක්‍රියාත්මක බවත් පොලිසිය පවසයි.
මීගමුව ජ්‍යෙෂ්ඨ පොලිස් අධිකාරී එරික් පෙරේරාගේ උපදෙස් මත ඉදිරි විමර්ශන ක්‍රියාත්මකය.
නාගරික සංවර්ධන හා නිවාස රාජ්‍ය අමාත්‍ය අරුන්දික ප්‍රනාන්දු පාර්ලිමේන්තුවේ විශේෂ ප්‍රකාශයක් කර ස්වාධීනව කටයුතු කරන බවද පසුගියදා ප්‍රකාශ කළ‍ේය.
මීට පෙර ව්‍යාජ ගුවන් ගමන් බලපත්‍රයක් යොදාගනිමින් මෙරටට ඇතුළුවීමට උත්සහ කළ චීන ජාතිකු නිදහස් කිරීමට කටයුතු කිරීමේ සිද්ධියක් සම්බන්ධයෙන්ද රාජ්‍ය අමාත්‍ය අරුන්දික ප්‍රනාන්දු මහතාට චෝදනා එල්ලවිය.
සබැඳි පුවත්
4දා ස්වාධීන වූ අරුන්දික 5දා සන්ධාන උත්සවයේ !
අරුන්දික ස්වාධීන වෙයි
අරුන්දික ඉල්ලන්නත් කලින් ඉලුක්පිටිය චීනා යවලා!
