නුවරඑළියේ වෙනම වවන කාබනික එළවළු කිලෝ හැට බැගින් හැම සිකුරාදාම ජනාධිපති ලේකම් කාර්යාලට ගෙන ගිය බව ජනාධිපති අනුර කුමාර දිසානායක පැවැසීය.

ජනාධිපතිවරයා මේ බව සඳහන් කළේ නුවරඑළියේ ඊයේ ( 03 වැනිදා ) පැවති ජාතික ජන බලවේගයේ මැතිවරණ ප්‍රචාරක රැලියේ දී ය. 

පුරවැසියන් යටත් වැසියන් බවට පත් කර හැමදාම බලයේ සිටීමට හැකි වනු ඇත යන්න ඒ අයගේ විශ්වාසය වූ බව ද කී ජනාධිපතිවරයා මෙසේද කීවේය. 

මේ දක්වා ඉතා උඩ ඉන්න ප්‍රභූ පන්තියක් අතේ තමයි බලය තිබුණෙ. වලව් අතේ බලය තිබුණෙ. ඒ අය හැමදාම හිතුවෙ ජනතාව පාගාගෙන විරාජමානව වැජඹෙන්න පුළුවන් කියලා. හැම අප්‍රියෙල් පළමුවැනිදා ම ජනවාරි පළමු වැනිදාම හිටපු ජනාධිපති නුවරඑළියෙ. කට්ටිය හිතනවා ජනතාවගෙ දුක අහන්න කියලා. නෑ. අන්තිමට එයා නුවරඑළියේ ආවෙ නෝනගෙ උපන් දිනය දවසෙ. අපි දන්නවා මේවා. පාවිච්චි කරන්නෙ රාජ්‍ය දේපොළ. නතර වෙන්නේ රාජ්‍ය බංගලාවල. ඒගොල්ල හැමදාම හිතුවෙ පුරවැසියන් යටත්වැසියන් බවට පත් කරලා ඒ ගොලන්ගෙ ජීවිතය ගෙන යන්න පුළුවන් කියලා. නුවරඑළියේ ජනාධිපති මන්දිරය තියෙන ඉඩමෙ වවන්න ඉඩ තියෙනවාලු. ඒ ඉඩේ කාබනික එළවළු වගා කරනවා. එහෙම වගා කරලා හැම සිකුරාදාම ජනාධිපති ලේකම් කාර්යාලයට කිලෝ හැටක් එනවා. ලොරියෙ පිටකොටුවට එන එළවළු කන්න ඒ අයට බැහැ. ඇයි ඒගොල්ල ඉන්නෙ උඩ. ඒ අයට වෙනම වවන්න ඕනෑ. මම කිව්වා අපිට ආරක්ෂාව සපයන නිලධාරීන්ගේ ආහාර වෙනුවෙන් ඒ කිලෝ හැට දෙන්න කියලා. ඒ ගොල්ල හැමදාම හිතුවෙ ඒ පැත්තෙන් මේ පැත්තට මාරු වෙයි කියලා. හැබැයි ඉතිහාසයේ පළමු වරට පොදු ජනතාව අතට දේශපාලන බලය මාරු වුණා. මේ කියන කතා අහලා රෑට මතක් කර කර අඬනවා ඇති . අනේ අපි හිටියෙ කොහොමද දැන් ඉන්න වෙලා තියෙන්නෙ කොහොමද කියලා. ඇයි නොහිතන දෙයක් වෙලා තියෙන්නේ. ඒකයි මේ දුක. වේදනාව. දැන් දරා ගන්න බැහැ . ඒ අය හිතුවෙ නැහැ පහළ පන්තියට බලය මාරු වෙයි කියලා. පහළ පන්තියට බලය මාරුවීම දැඩි කම්පාවක්. ඒ කම්පාව සමනය කරන ගන්නේ තව සති තුනයිනෙ නැත්නම් මාස තුනයිනෙ කියලා හිතලා. මතක තියා ගන්න මේ ආණ්ඩුව කපේකට වට්ටන්න ලැබෙන්නෙ නැහැ.