හිටපු ජනාධිපති රනිල් වික්‍රමසිංහ මහතා සම්බන්ධයෙන් සිදු කරනු ලබන අසත්‍ය තොරතුරු තරයේ හෙළා දකින බව එක්සත් ජාතික පක්ෂය පවසයි.

එහි නියෝජ්‍ය නායක රුවන් විජේවර්ධන මහතා අද (07) පැවැති මාධ්‍ය හමුවකට එක්වෙමින් කියා සිටියේ, රනිල් වික්‍රමසිංහ මහතා ඉලක්ක කරමින් අඛණ්ඩව අපහාසාත්මක දුස්තොරතුරු රැසක් සමාජගත කරමින් තිබෙන බවය.

අටවන විධායක ජනාධිපතිවරයාගේ ප්‍රධාන ආරක්ෂක නිලධාරී ඇතුළු සෙසු ආරක්ෂක නිලධාරීන්ට නම් කරන ලද පොලිස් කොට්ඨාශ වෙත වහාම ක්‍රියාත්මක වන පරිදි වාර්තා කරන ලෙස ඔක්තෝබර් 06 වනදා ලිඛිත නියෝග ලබා දී ඇති බව සමාජ මාධ්‍ය තුළ ප්‍රචාරය විය.

කෙසේ වෙතත් මේ වන විට වැඩබලන පොලිස්පතිවරයා එම පුවත ප්‍රතික්ෂේප කර ඇති බව රුවන් විජේවර්ධන මහතා අවධාරණය කළේය.

එමෙන්ම කිසිදු අවස්ථාවකදී ජනාධිපති රනිල් වික්‍රමසිංහ මහතා සහ මෛත්‍රී වික්‍රමසිංහ මහත්මිය මැතිණිය ජනාධිපති මන්දිරය පෞද්ගලික පරිහරණය සඳහා යොදා නොගත් බව ද ඔහු කියා සිටියේය.

එය භාවිත කළේ නිල රාජකාරි කටයුතු සඳහා පමණක් බවයි ඔහු පෙන්වා දෙයි.

සුඛෝපභෝගී ආහාර සහ විදේශීය සූපවේදීන්ගේ සේවය ලබාගැනීම සම්බන්ධයෙන් සිදුකරන ප්‍රකාශ ද අසත්‍ය මෙන්ම මුලුමුනින්ම දේශපාලන වෛරයක් පිරිමහගැනීම සඳහා කරනු ලබන පහත් ගණයේ ප්‍රකාශ පමණක් බව ද රුවන් විජේවර්ධන මහතා පෙන්වා දෙයි.

“ජනාධිපති මන්දිරයේ නිල උත්සව අවස්ථාවන්වලදී පැමිණෙන අමුත්තන්ට දේශීය ආහාරපානවලින් සංග්‍රහ කිරීම සඳහා අවශ්‍ය ආහාර ද්‍රව්‍ය මිලදී ගනු ලැබුවේ ජනාධිපති මන්දිරයේ සේවය කරන සූපවේදීන්ගේ උපදෙස් මත දේශීය සැපයුම්කරුවන් මාර්ගයෙන් වන බවත් අවධාරණය කළ යුතුයි.

කිසිදු අවස්ථාවකදී ජනාධිපති රනිල් වික්‍රමසිංහගේ හෝ වික්‍රමසිංහ මැතිණියගේ අවශ්‍යතාවයන් මත මුද්‍රිත ආහාර වට්ටෝරු, විදේශීය සුඛෝපභෝගී ආහාර පිළියෙල කිරීම හෝ විදේශීය සූපවේදීන්ගේ සේවය ලබාගැනීම සිදුකර නොමැති අතර ඒ සම්බන්ධයෙන් සිදුකරන අසත්‍ය ප්‍රකාශයන් මුලුමුනින්ම දේශපාලන වෛරයක් පිරිමහගැනීම සඳහා කරනු ලබන පහත් ගණයේ මඩ ප්‍රකාශයක් පමණක් බවත් මා සඳහන් කරනවා.

ශ්‍රී ලංකාව මුහුණ දුන් අසීරුතම අවස්ථාවකදී වගකීමෙන් පළා නොයා දැවැන්ත අර්බුදයකින් රට ගොඩගත් නායකයාගේ චරිත ඝාතනය සඳහා දියත්කර ඇති පහත් පෙළේ මඩ ව්‍යාපාරය පිළිබඳව එක්සත් ජාතික පක්ෂය වශයෙන් අපි අතිශය කණගාටුවට පත්වන අතරම, මේ රටේ ජනතාවට සත්‍ය කුමක්ද අසත්‍ය කුමක්ද යන්න පිළිබඳව වටහාගැනීම සඳහා වන විචාර බුද්ධිය ඇතැයි අපි විශ්වාස කරනවා.

ඒ වගේම මඬ ගහමින් කාලය කා දමන්නේ නැතුව තමන් ලද ජනවරම ප්‍රකාරව රටේ ජනතාවගේ බලාපොරොත්තු ඉෂ්ට කරන්න කැපවීමෙන් ක්‍රියාකරන ලෙස අප වත්මන් ආණ්ඩුවෙන් ඉල්ලා සිටිනවා.”