අයථා ලෙස විදුලිය ලබාගැනීම් හේතුවෙන් මාස 08ක් තුළ රුපියල් කෝටි 08කට ආසන්න මූල්‍ය අලාභයක් සිදු ව ඇති බව ලංකා විදුලිබල මණ්ඩලය නිවේදනයක් නිකුත් කරමින් කියා සිටී.

ඇතැම් පුද්ගලයන් විසින් විදුලි මීටර් වෙනස් කිරීම් හා විවිධ උපකරණ යොදා ගනිමින් අයථා ලෙස විදුලිය ලබාගැනීම හේතුවෙන් මෙම පාඩුව සිදු වන බව එම කිවේදනයේ වැඩිදුරටත් දැක්වේ.

මේ වසරේ ජනවාරි සිට අගෝස්තු දක්වා කාලය තුළ එලෙස විදුලිය ලබාගැනීමෙන් රුපියල් හත්කෝටි අනූ ලක්ෂ හැත්තෑ හතර දහස් අටසිය පනස් හතක මූල්‍ය පාඩුවක් මණ්ඩලයට සිදු ව තිබේ.

මාස 08ක කාලය තුළ විදුලි මීටර් වෙනස් කිරීම් සම්බන්ධයෙන් වැටලීම් 1,041ක් සිදු කර ඇත.

එලෙස විදුලි මීටර් වෙනස් කිරීම මඟින් ලංකා විදුලිබල මණ්ඩලයට හත්කෝටි හැට හතර ලක්ෂ විසි හත්දහස් හයසිය හතළිස් නවයක අලාභයක් සිදු ව ඇති බව ද සඳහන් වේ.

තවද විදුලි රැහැන්වලට විවිධ උපකරණ සවිකර විදුලිය ලබාගැනීම් සම්බන්ධයෙන් වැටලීම් 81ක් සිදු කර ඇති අතර එම වැටලීම් තුළින් රුපියල් විසි හය ලක්ෂ හතළිස් හත්දහස් දෙසිය හතක අලාභයක් සිදු ව ඇති බව ද වැඩිදුරටත් පවසයි.

එලෙස අදාළ පුද්ගලයන් අධිකරණය වෙත ඉදිරිපත් කිරීමෙන් අනතුරුව රුපියල් තිස් හය ලක්ෂ අනූ පන්දහස් පන්සියයක මුදලක් දඩ වශයෙන් අය කර ගත් බවද මණ්ඩලය නිකුත් කළ නිවේදනයේ දැක්වේ.